دادگای عراقی ئامار ئەیلول ئاشکرا کەێد: 220 سکاڵای بازرگانیکردن وە ئایەم و 30 خوەیکوشتن
شەفەق نیوز - بەغداد
ئەنجوومەن دادوەری باڵا، ئمڕوو سێشەممە، ئامار تایبەت وە تاوانەیل بازرگانیکردن وە مرۆڤ، و سەرپێچی یاسای نیشتەجیبۊن بیگانەیل، بیجگە لە خوەیکوشتن توومارکریاگ لە دادگایەیل جیاجیا لە ماوەی مانگ ئەیلول گوزەشتە لە ساڵ ئیسەی 2026 ئاشکرا کرد.
وەپەی ئامارەگە، سەرۆکایەتییەیل دادگایەیل (220) سکاڵای تایبەت وە تاوانەیل بازرگانیکردن وە ئایەم توومار کردن، کە سەرۆکایەتی دادگای بەغداد / کەرخ لە پلەی یەکەم هات وە (82) سکاڵا، وەشوین ئەویش سەرۆکایەتی دادگای بەسرە وە (38) سکاڵا، دۊای ئەوەیش سەرۆکایەتی دادگای بەغداد / رەسافە وە (27) سکاڵا، لە وەرانوەر یەیش، سەرۆکایەتییەیل دادگا لە نەجەف و زیقار و موسەننا هیچ سکاڵاییگ پەیوەندیدار وەی جۊرە توومار نەکردن.
لەباوەت سەرپێچی یاسای نیشتەجیبۊن بیگانەیل شمارە (76) ئەرا ساڵ 2017، (284) سکاڵا توومار کریا، کە سەرۆکایەتی دادگای بەغداد / رەسافە لەنوای لیستەگە بوی وە توومارکردن (115) سکاڵا، وەشوین ئەویش سەرۆکایەتی دادگای بەغداد / کەرخ هات وە (76) سکاڵا، دۊای ئەوەیش سەرۆکایەتی دادگای واسیت وە (70) سکاڵا، لە وەختیگ دادگایەیل نەینەوا و بابل و نەجەف و زیقار و ئەنبار و بەسرە و سەڵاحەدین و موسەننا و مەیسان و کەربەلا وە تەواوی بیبەش بۊن لە توومارکردن سکاڵایل پەیوەندیدار وە سەرپێچی یاسایەیل نیشتەجیبۊن.
لەبان ئاست خوەیکوشتن، ئامارەیل دەسنشان ئەرا توومارکردن (30) خوەیکوشتن کردن، کە سەرۆکایەتی دادگای کەرکووک بەرزترین رێژە توومار کرد وە (8) خوەیکوشتن، وەشوین ئەویش سەرۆکایەتی دادگای نەینەوا وە (6) خوەیکوشتن، لە وەختیگ دادگایەیل قادسیە و موسەننا (4) خوەیکوشتن لە هەر یەکیگیان چەودیاری کردن، و دادگای نەجەف (3)، و واسیت (2)، لە وەختیگ دادگایەیل یەک خوەیکوشتن چەودیاری کردن لە هەر یەک لە: دیالە، و زیقار، و کەربەلا.
