کازمی: ئاگرەگەی ئبین خەتیب زەرەد ئاسایش نەتەوەیی دا
شەفەق نیوز/ موستەفا کازمی سەرۆک وەزیران، کۆبونەوەیگ ناکاوی وەگەرد بڕیگ لە وەزیر و فەرماندەیل ئەمنی و وەرپرسەیل لەناو بارەگای فەرماندەی ئۆپراسیۆنەیل بەغداد كرد، لە پشت رووداو ئاگرەگەی خەسەخانەی ئبین خەتیب ک دەیان قوربانی و زەخمدار لەلی بویەو.
کازمی لە بەیاننامەیگ وت: ئەو رووداوه ک ئمشەو بوی، رووداویگ زیاندارە و بایەدە لە خود وەختەگە و لەی ساعەت دیرە کۆبونەوە بکەیمن تا وەئاشکرایی قسە وەگەرد ئیوە و گەلەگەمان بکەیمن، و وەئاشکرایی ئویشمەی ک رووداوەگە زەرەد وە ئاسایش نەتەوەی رەسان، و خوەی شکستیگە وە گشت واتەیل وشەگە، و بایەدە نەیلیمن ئیجوور رووادەویگ و ئاسانی رەد بوود.
وتیش؛ ئیجوور رووداویگ بەڵگەس لەبان ئەوە ک کەموکوڕی هەس، ئەراوە فەرمان وە لێکۆڵینەوەیگ کوتپڕ دام، و وەڕێۆبەر خەسەخانەگە و وەڕێۆبەر ئاسایش و خاسەوکردن و گشت پەیوەندیدارەیل گیر بارن تا بڕەسیەێدە خاوەن کەموکوڕیەگە و سزایان بیریەێد.
وتیش؛ خەمسەردی لەیجوور کارەیلیگ تەنیا هەڵەیگ نییە، بەڵکم تاوانیگە وهالە گەردن گشت وەرپرسەیل، و بایەدە وەووردی چەودیری لە ریکارە ئەمنی و مقەیەتیەکان لە گشت خەسەخانەیل عراق بکریەێد، و ئەوەسا تیمیگ هونەری لە گشت وەزارەتە پەیوەندیدارەیل تا ریکارەیل سەڵامەتی لە گشت خەسەخانە وەهوتێلەیل وەشوونە گشتیەکان مسۆگەر بوود وەماوەی یەک هەفتە لە گشت عراق دروس کریەێد.
هەمیش وت؛ هەر خەمسەردیيگ ئەوەسا وەسەختی سزای دەیمن، ئمڕوو لە ئەنجام خەمسەردی شەهیدەیل بیگوناهیگ کەفتن، سوو ئەگەر کەمتەرخەمی کردیمن هەمیش کەفن، نەبایەد یەکیگ بویشێد شۆرتیگ کارەبایی بوی، ئی کارە شەرمە، گشت وایەریگ لە هەر فەرمانگەیگ گشتی یا خەسەخانەیگ بوەشکن، و هەر فەرمانگەیگ شۆرت کارەبایی بکەێدە دەسپیچگ ئەوەسا سزای گشت کەسەیل لەناوی دەم.
کازمی پرسیار کرد، ئايا سوپای فەرمانبەرەیل خاسەوکردن هانە کوو؟، هونەریەکان هانە کوو؟ لایەنە چەودیریەکان هانە کوو؟ کووا ئاسایش خەسەخانەیل و وەزارەتەیل و شوینە گشتیەکان؟، فەرمان ئاشکرایگ دیرین ک هەر وەڕێۆبەریگ بایەدە خوەی داوەزێد و وەچەو خوەی بنووڕێدە ریکارەیل سەڵامەتی، و بایەدە وەزارەت ناوخۆ تیمەیل تایبەتی ئەرا ئی کارە ئامادە بکەێد، و ری نییەم وەرپرسیگ لە وەرگری مەدەنی باێد و بویشێد کتاوەیلیگ فەرمی کل کردیمنە، خوەدان بچن و بنووڕن و تاقی ریکارە مقەیەتیەکان بکەن.
لە کۆتایی وت؛ داوای ئەنجام لێکولینەوەی رووداو خەسەخانەگە لە ماوەی ٢٤ ساعەت کەم و خاوەن کەموکوڕیەگە هەرکە بوود بایەدە سزای بیریەێد.
و هەمیش فەرمان وە راگەیانن پرسەی قوربانیەیل دا.
