رووژنامه‌يگ داوا له ترامپ ئه‌كا ئه‌قڵ بارێده كار نه‌ك هه‌ڕه‌شه‌ى تويته‌ر
شه‌فه‌ق نيوز/ بارودوخ له سوريا رووژنامه‌يل بريتانى سه‌رقاڵ كردگه‌و رووژنامه‌يگ نيه وه‌بى شيه‌وكردن يا راپۆرت يا ناونيشانيگ له سه‌ره‌تا له‌ى باره‌وه، هه‌ر له‌وه‌ر ئه‌وه‌يش رووژنامه‌ى ئه‌لتايمز موخاتبه‌ى سه‌رۆك ئه‌مريكى ئه‌كا له سه‌ره‌تاى باوه‌ته‌يلێ و داوا له‌لى ئه‌كا ئه‌قڵ بارێده كار نه‌ك ماڵپه‌ڕ تويته‌ر له‌باره‌ى سوريا.
ئى رووژنامه باوه‌ڕێ ئه‌وه‌سه وڵاته‌يل يه‌كگرتگ و روسيا دو كه‌س سه‌ركردايه‌تييان ئه‌كا ك كه‌سايه‌تى هه‌ر يه‌كيگ له‌ليان وه‌و جوور خاسه نيه‌و هه‌ردوگيان خه‌مه‌يل ناوخوه‌يى ديرن و له‌يوا ئه‌كه‌ن كاره‌يليگ نادروس له‌باره‌ى بارودوخ ده‌ره‌كى ئه‌نجام بيه‌ن.
رووژنامه‌گه ئويشێد: نه‌بايه‌د كرده‌وه‌يل به‌شار ئه‌سه‌د وه‌بى سزا گوزه‌ر بدێ، ئه‌ويش له‌وه‌ر ئه‌وه‌گ ئه‌و كاره‌يل ده‌سدريژيه دوباره‌وه نه‌دێ له‌بان ده‌س ئه‌سه‌د و كه‌سه‌يل تر و هه‌ر وه‌و خاتريشه سه‌رۆك وه‌زيره‌يل بريتانى بڕيار خاسيگ دا سه‌باره‌ت وه پشتگيرى بريتانيا له هه‌ر كاريگ هاوبه‌ش سه‌ربازێ.
جى باسه، رووژنامه‌گه ره‌خنه‌يش له ترامپ گرتگه وه بوونه‌ى ره‌فتاريه‌و له ئداره‌كردن قه‌يران له‌رێ ماڵپه‌ڕ تويته‌ر وه ئه‌وه‌گ ئى ره‌فتاره‌يله ده‌سميه‌تده‌ر نيه له‌بان كه‌سايه‌تى سه‌رۆك ده‌وڵه‌تيگ گه‌وراهيز و باس له‌وه‌يش كردگه ك دويا هه‌واڵى له تويته‌ر به‌دره‌فتارى و گه‌مه‌بازيه.
