ئیران تاوانبار ئەمریکا کەێد وە شکانن ئاگربەسی وە "هاوکاری وەگەرد دەوڵەتەیلیگ لە ناوچەگە"
شەفەق نیوز - تاران
بارەگای ناوەندی "خاتەمولئەنبیا" لە ئیران، شەو پەنجشەممە لەبان جمعە، راگەیان کە هیزە چەکدارە ئیرانییەیل پارچەیلیگ دەریایی ئەمریکی لە خوەرهەڵات گەروو هورمز و باشوور بەندەر چابەهار کردنە ئامانج، وە وەڵامیگ ئەرا ئەوەگ وەسفی کرد وە پێشێلکردنیگ ئەمریکی ئەرا وەسانن تەقەکردن وە "هاوکاری وەگەرد دەوڵەتەیل لە ناوچەگە" و ئامانجگردن کەشتییەیل و ناوچەیلیگ کەناراوی ئیرانی.
وقسەکەر بارەگاگە لە بەیاننامەیگ وت: سوپای ئەمریکی هەڵگریگ نەفت ئیرانی کردە ئامانج کە لە ئاوە کەناراوییەیل لە ناوچەی جاسک وەرەو گەروو هورمز جویلە کرد، و کەشتییگ ترەک کە لە ری خوەی بوی ئەرا ناو گەرووەگە لەوەرانوەر بەندەر فوجەیرەی ئیماراتی"، وتیش: پەلامارەیل هاوەخت بوین وەگەرد گورزەیلیگ ئاسمانی کە رەسینە ناوچەیلیگ مەدەنی لە کەناراوەیل بەندەر خەمیر و سیریک و دوورگەی قشم.
وەپای بەیاننامە ئیرانییەگە، هیزە چەکدارەیلی "دەسوەجی" وەڵام دانەو وە پەلاماریگ لەبان پارچەیلیگ دەریایی ئەمریکی لە خوەرهەڵات گەروو هورمز و باشوور بەندەر چابەهار، و زیانەیلیگ گەورە وەپیان رەسانن، لە وەختیگ هیچ دووپاتکردنیگ دەسوەجی ئەمریکی دەرنەچگ لەبان ئی قسیە یا قەوارەی ئەو زیانەیلە کە راگەیاننە.
بارەگای "خاتەمولئەنبیا" هوشداری دا لەوە کە بایەسە ئەمریکا و ئەو دەوڵەتەیلە کە پاڵپشتیی کەن بزانن کە کۆمار ئیسلامی ئیرانی، و هەکاتی وەرجە ئیسە، وە هیز و وەبی کەمترین دوودڵی وەڵامیگ کوشەندە دەێدەو لەبان هەر دەسدرویژی یا سەرپێچییگ.
لە وەرانوەریش، "فۆکس نیوز" لە وەرپرسیگ باڵای ئەمریکی وت: سوپای ئەمریکی گورزەیلیگ لەبان بەندەر قشم و شار بەندەر عەباس کەناراوی لە ئیران جیوەجی کردگە، وەلی وتیش: ئی گورزەیلە "وە مانای دووارە دەسکردن وە جەنگ یا کۆتاییهاتن وەسانن تەقەکردن نییە" کە لە هەفت نیسان راگەیانریاس.
