ترامپ ديدار مێژوويى وه‌ل سه‌ركرده‌ى كۆرياى باكوور په‌سه‌ن ئه‌كا

شه‌فه‌ق نيوز/ ساره‌ ساندرز قسه‌كه‌ر وه‌ناو ماڵ چه‌رمگ له‌ به‌يانننامه‌يگ وت: دوناڵد ترامپ سه‌رۆك ئه‌مريكى ئه‌و داوه‌ته‌ قه‌بول ئه‌كا ئه‌را ديدار وه‌ل كيم جونغ ئون له‌ شوون و وه‌ختيگ ك ده‌سنيشان ئه‌كريه‌ێد.

له‌ى باوه‌ته‌و، رووژ په‌نجشه‌ممه‌ى گوزه‌يشت ماڵ چه‌رمگ جه‌خت له‌وه‌ كرد ك ترامپ رازيه‌ بويه‌ له‌بان ديدار وه‌ل سه‌ركرده‌ى كۆرياى باكوور له‌و شوون و وه‌خته‌ ك له‌ئاينده‌ ده‌سنيشان ئه‌كريه‌ێد و وت: ئيمه‌ هه‌وڵ داماڵين چه‌كه‌يل ئه‌تۆمى ئه‌يه‌ێم له‌ كۆرياى باكوور.

جى باسه‌، زويتريش تشونغ ئۆى- يونغ راوێژكار ئاسايش نه‌ته‌وه‌يى سه‌رۆك كۆرياى باكوور له‌ئاكام گفتگووه‌يل له‌ ماڵ چه‌رمگ ئه‌وه‌ ده‌رخست ك ديدارى له‌ناونى هه‌ردوگ سه‌رۆك ناوبرياێ وه‌ل سه‌ره‌تاى مانگ ئايار/ مايۆ ئه‌نجا ئه‌گرێد.