بن سه‌لمان: جه‌نگ ناونى سعوديه‌و ئيران ئابوورى جه‌هانى خراو ئه‌كا

شه‌فه‌ق نيوز/ محه‌مه‌د بن سه‌لمان شازاده‌ى سعودى، جه‌خت له‌وه‌ كرد ك ريككه‌فتگه‌ وه‌ل مايك په‌مپيۆ وه‌زير خارجيه‌ى ئه‌مريكى له‌بان ئه‌وه‌گ په‌لاماره‌يل 14ى سپته‌مبه‌ر ئه‌را بان هه‌ردوگ دامه‌زرياگه‌ نه‌فتيه‌گه‌ى سعوديه‌ كار جه‌نگ بويه‌ له‌لايه‌ن ئيرانه‌و.

بن سه‌لمان ئه‌را به‌رنامه‌ى "60 ده‌قه‌" له‌ كه‌ناڵ سى بى ئێس وت: ئه‌گه‌ر جه‌هان كار گه‌ورايگ نه‌كه‌ن ئه‌را جواودانه‌وه‌ى ئيران، گرژيه‌يل زياتر دوينيم ك هه‌ڕه‌شه‌ له‌ به‌رژه‌وه‌نديه‌يل جه‌هان بكا، وه‌لێ باس له‌وه‌يش كرد ك چاره‌سه‌ر سياسى خاستره‌ له‌ چاره‌سه‌ر سه‌ربازێ و يه‌يش ده‌رخست ك جه‌نگ له‌ناونى سعوديه‌و ئيران ئابوورى جه‌هانى خراو ئه‌كا.

جى باسه‌، بن سه‌لمان وشدارييش دا له‌باره‌ى ئه‌وه‌گ نرخ نه‌فت بڕه‌سيده‌ نرخه‌يليگ خه‌ياڵى ك ئه‌گه‌ر جه‌هان گرده‌و نه‌دێ ئه‌را جواودانه‌وه‌ى ئيران و وت: ئه‌گه‌ر جه‌هان هه‌ڵويستيگ وه‌هيز ئه‌را جواودانه‌وه‌ى ئيران نه‌ياشتوون، ئه‌وه‌ گرژيه‌يل زياتريگ ئه‌كه‌فێده‌و.