ئه‌مريكا له‌وه‌ر رازيكردن كۆرياى باكوور گام گه‌ورايگ نه‌ێد
2018-06-19T06:47:00+00:00
شه‌فه‌ق نيوز/ وه‌زاره‌ت وه‌رگرى ئه‌مريكى"پنتاگۆن"وه فه‌رمى جه‌خت له وسانن مانۆڕاى سه‌ربازێ هاوبه‌ش ئاينده‌ى ناونى وڵاته‌يل يه‌كگرتگ و كۆرياى باكوور كرد دوياى ئه‌وه‌گ دوناڵد ترامپ سه‌رۆك ئه‌مريكى هه‌فته‌ى گوزه‌يشت ئاشكراى وسانن ئه‌و مه‌شقه‌يله كرد له يه‌ك لايه‌نه‌و.
دانا وايت قسه‌كه‌ر وه‌ناو وه‌زاره‌ته‌گه له به‌ياننامه‌يگ ك شه‌فه‌ق نيوز ئاگادارێ بوێ، وت: وه گووره‌ى په‌يماننامه‌گه‌ێ ترامپ و وه مشاوه‌ركردن كۆرياى باشوور هاوپه‌يمانمان، سوپاى ئه‌مريكى گشت ئاماده‌كارييگ ئه‌را مه‌شقه‌يل جه‌نگى وه‌رگرى له ئاب ئاينده وسان.
جى باسه، بريار بوێ ئى مانۆڕاى هاوبه‌ش سه‌ربازيه له ناونى كووتايى مانگ ئاب و سه‌ره‌تاى مانگ سبته‌مبه‌ر ئه‌نجام بگرتياد، وه‌لێ وه قسه‌ى وايت هيمان هويچ بڕياريگ تر نه‌درياگه له‌ى باوه‌ته‌و.
