لاداين له مێژوو
حاشاكردن و لاداين له مێژوو خوه‌ى له‌خوه‌ى كاره‌سات و نائنسافى گه‌ورياگه، ك جى داخه هه‌ر كه‌سیگ هه‌ڵسید و قه‌ڵه‌میگ ئه‌گریده ده‌س و هه‌رچى هاته خه‌ياڵى ياداشتى ئه‌كا وه‌بى پشتبه‌سانن وه بنه‌ماو سه‌رچه‌وه‌ى باوه‌ڕ وه‌پيكرياگ و نازانن ئاقبه‌ت ئه‌و نویساننه چه له‌لى ئه‌كه‌فیده‌و! یا هویر له‌وه ناكه‌ن وه‌و نویساننه‌یل بى مانا خوه‌یان له‌وه‌رچه‌و مه‌ردم ئه‌خه‌ن و رووشنهویريه‌ت خوه‌یان وه نه‌فام و نه‌دیده ئسپات كه‌ن و دژ واقعیه‌ت قسه كه‌ن.
مه‌ردمانيگ قه‌ڵه‌م وه‌ده‌س هه‌ن چنه گژ واقعیه‌ت وهه‌میشه دوینیده‌يان زوڵم له مێژوو ئه‌كه‌ن و خوازيارن له‌شانیه‌ت رویداگه‌یل سه‌خت مێژوويى كه‌مه‌و بكه‌ن، ئه‌ويش له‌ڕى ڕه‌خنه‌و ناونیتگ ناجوور و نادروس و خوازيارن وه‌و شيوازه ناودار خوه‌يانه‌و بكه‌ن، وه‌لى جوور ئه‌وه‌ك مه‌سه‌ڵه‌ت كورده‌وارى خوه‌مان ئویشید"بى ناوى فره خاستره له به‌دناوى" چوینكه ئه‌وانه‌گ قه‌درو حورمه‌ت مێژوو ملله‌ته‌گه‌یان ناگرن ته‌نيا به‌دناوى ئه‌ڕایان مینیده‌و.
مه‌سه‌له‌ى شووڕش له مێژوو هه‌ر ملله‌تیگ، مێژووه‌و تومار كریه‌ید، ئیمه‌یش جوور ملله‌ت كورد خاوه‌ن چه‌نه‌ها شووڕش بویمنه‌و خوه‌مانیش خاس زانیم ئامانج شووڕش و شووڕشكاره‌یلمان چه بویه. دكتۆر مسته‌فا مه‌حموود ئویشید"كه‌سه‌یلیگ هه‌ن خه‌بات كه‌ن له‌وه‌ر خاتر ئه‌وه‌گ ره‌ها بوون له‌ژیرده‌سه‌یى و، كه‌سه‌یلیگیش هه‌ن پابه‌ندن وه قویله‌وكردن به‌نه‌یى یا عبودیه‌ت".
بيگومان وشه شووڕش، وشه‌یگ سیاسیه‌و ئامانجى ده‌رچگنه له‌و بار یا وه‌زعه وه‌ره‌و خاستر یا خراوتر وه‌گووره‌ى تاریفه‌گه‌ى. ئمجا له‌یرا تویه‌نیم ده‌سنیشان شووڕشه‌یل كوردى بكه‌یم ك پاكترین و جوانترین ئامانجیگ بوینه ئه‌را گه‌ردین له‌شوون ژیان خاستر و ئاسووده‌تر و شكانن مه‌رز سته‌مكارى.
ئه‌گه‌ریش بایمنه بان تاریف شووڕشكار، ئه‌وه بیگومان یه‌كه‌مجار بایه‌سه هویر له‌به‌رژه‌وه‌ندى گشتى بكه‌یم ك هه‌میشه له‌لاى زوورم شووڕشكاره‌یلمان وجوود داشتگه‌و خه‌باتيش له‌وه‌ر خاتر ده‌سخستن مافه‌یل ملله‌ت كوردمان كردنه.
وه‌ل ئه‌وه‌يشا ئیمه ئه‌گه‌ر كه‌میگيش وه وژدانه‌و ته‌ماشاى شووڕشكاره‌یلمان بكه‌یم بایه‌سه نه‌ك هه‌ر له‌وه‌ختیگ ناویان ژنه‌فیم شانازى بكه‌یم، به‌ڵكوو هه‌میشه له‌دڵ و ده‌روینمان شوونیان دیارى بكه‌یم، چوینكه ئازایى و داناییه ئه‌را شووڕشكاریگ وه‌ته‌نیا متمانه‌ى مه‌ردمانیگ باریده ده‌س و هه‌مان ریڕه‌وى بگرنه‌وه‌ر!
دى ئه‌گه‌ر تا دویه‌كه شووڕش چه‌كدارى له وجوود بوی، ئه‌وه ئمڕوو هه‌وه‌جه وه شووڕش رووشنهویرى و ماریفه‌ت و زانیارى دیریم، وه‌لى بایه‌سه ئه‌وه‌یش له‌هویرمان بوود ك هویچ ملله‌تیگ ژیرده‌سه‌و سته‌مدیده وه‌بى شووڕش و شووڕشكاره‌یل نه‌ڕه‌سینه‌سه ئازادى و ئامانجه‌یلیان، ك هه‌ر وه‌و خاتريشه دى نه‌بایه‌د هه‌ركه‌سیگ وه‌ناو ئازادى و وه‌رچه‌رخان تازه‌وه پشت له هه‌وڵ و ته‌قلاى شووڕشكاره‌یل بكاو ئامانجى ناوزڕانن و سوكایه‌تیكردن شووڕش بدێ، چوینكه شووڕش مێژووه.
ره‌نجده‌ر ئاواره
ج . أ
