كورد فه‌يلی وه‌رجه پاشای عراق پاسه‌پۆرت داشتگه!
مايه‌ی سه‌رسوڕمه‌نينه ك ئی حكومه‌ت تازه‌ى عراقيه وه‌رگرى له ماف موسڵمانه‌یل وڵاتيگ جوور به‌حره‌ین يا فلستين يا لوبنانی ئه‌كاو له‌هه‌مان وه‌خت خوه‌یشى زوڵم له به‌شیگ ره‌سه‌ن هاووڵاتیه‌یلی قه‌بول كردگه.
مێژوو كورد فه‌يلی له عراق فريه فريه له دامه‌زرانن وڵاته‌گه كويه‌نتره، يه‌يش به‌ڵگه‌يگ حاشا هه‌ڵنه‌گره. نويسه‌ريگ كورد فه‌يلی وه‌ناو به‌هلول ئه‌لكوردی له باوه‌تيگی ئاماژه وه پاسه‌پۆرت هاووڵاتييگ فه‌يلی كردگه وه‌ناو "حاجی حسێن محه‌مه‌د فه‌يلی" ك شماره‌ی پاسه‌پۆرته‌گه‌ی ٢١٢ بويه‌و يه‌كيگ له عه‌تاره‌يل بازاڕ شۆرجه بويه‌و له‌ساڵ ١٩٠٠ له ناوچه‌ی عه‌گد ئه‌لئه‌كراد هاته‌سه دونيا.
ئه‌و نويسه‌ر كورد فه‌يليه ئويشيد: هه‌نای په‌نجه‌يلم لاپه‌ڕه‌يل پاسه‌پۆرته‌گه‌ی حاجی حسێن دا يه‌كا په‌ڵمه‌گيری فريه‌يگ ئه‌رام هات له‌وه‌ر ئه‌و زوڵم وسته‌مه ك له كورده‌يل فه‌يلی كريا، چوينكه حاجی حسێن فه‌يلی له يه‌كه‌مين كه‌سه‌يليگ بويه له‌ی عراقه پاسه‌پۆرت داشتگه‌و له په‌ڕ خواريش له پاسه‌پۆرته‌گه‌ی نويسياگه "عراقی الولاده"، وه‌و مانا ك له‌عراق له‌دايگ بويه.
بیجگه ئه‌وه‌یش ئه‌گه‌ر ته‌ماشاى ره‌سم سیه‌و چه‌رمگ قه‌ى پاسه‌پۆرته‌گه بكه‌یم، دوينيم ره‌سه‌نایه‌تى كورده‌یل فه‌یلى به‌غدا وه‌پیه‌وه دیاره‌و ئه‌و پوله‌يليشه ك دریانه‌سه قه‌یه‌و ره‌سم فه‌یسه‌ڵ پاشای دویه‌م عراقه ك ئه‌و وه‌خته ته‌مه‌نی مناڵ بویه‌و هيمان پاسه‌پۆرت نه‌ياشتگه، يه‌يش مانای ئه‌وه‌سه كورد فه‌يلی وه‌رجه پاشای عراق پاسه‌پۆرت عراقی داشتگه، وه‌لی جی داخه هيمان كورد فه‌يلی له‌ی وڵات پڕ له سياسه‌ت چه‌فته وه ماف ره‌وای خوه‌ی نه‌ڕه‌سيه‌و لايه‌نه‌يليگ بازرگانی وه وجووديان ئه‌كه‌ن و چاره‌نويسيان ناديار و ته‌ماوی كردنه.
جه‌ماڵ ئه‌ركه‌وازی
