جه‌نگ فه‌يليه‌يل دژ"روسيا"ى قه‌يسه‌رى
له وه‌خت جه‌نگ جه‌هانى يه‌كه‌م" ١٩١٤-١٩١٨ " هيزه‌يل روسياى قه‌يسه‌رى په‌لامار ئيران داو ئه‌و سوپاى قه‌يسه‌ريه هه‌وڵ داگيركردن عراق دا، ئه‌وه بوى هه‌ناى رويكرده ئيران سابڵاغ پايته‌خت كوردستان سزان.
سوپاى روسيا شار راوه‌ندوزيش له كوردستان عراق داگير كردو فريه‌يگ له‌و شاريشه ويران و كاول كرد و باخ و بووسانه‌يلى سزان، چوينكه ئه‌و سوپاى قه‌يسه‌ريه په‌يڕه‌و ياساى باخه‌يل كردياد، ئمجا ده‌ستووريان له‌يوا بوى كوشتيان و سزانيان و كاولكارى ئه‌نجام ديان.
دى له‌يوا بوى ئه‌و سوپا روى بكرديانه هه‌ر شار و شوونيگ ويرانكارى فريه‌يگ له‌تى جيوه‌جى كرديان وه‌خاتر ئه‌وه‌گ مه‌ترسى بخه دڵ مه‌ردمه‌ى تواناى روى وه‌ڕوى بوينه‌وه‌يان نه‌ياشتوون، يه‌يش له‌وه‌ختيگ ك پيشڕه‌وى بكرديان وه‌ره‌و شار و ئاوايى و ئه‌و ناوچه‌يله ك مه‌راميان ئه‌وه بوى داگيرى بكه‌ن.
پلان ئه‌و هيزه‌يل قه‌يسه‌ريه ئه‌وه بوى ك عراق داگير بكه‌ن، ئه‌وه بوى په‌لامار شار خانه‌قين دان و داگيرى كردن، له‌شوون ئه‌وه‌يش كه‌فتنه‌ڕى وه‌ره‌و ناوچه‌ى لورستان و به‌شيگ له‌لى داگير كردن و دوياخريش پيشڕه‌وى كردن وه‌ره‌و پشتكويه.
ئمجا له‌وه‌ر سه‌ختى شوونه‌يل پشتكويه و سه‌ختى داگيركردنى، چوينكه ناوچه‌يگ جه‌وه‌ڵى بوى و ڕى وبانى ناڕه‌حه‌ت بوى و كورده‌يل فه‌يلييش ئازايانه خوه‌يان ئه‌را روى وه‌ڕوى بوينه‌وه‌ى ئه‌و په‌لامار داگيركاريه ئاماده كردوين، ئه‌وه بوى هووز له‌ك بيره‌وه‌ن دژ ئه‌و سوپاى قه‌يسه‌ريه هه‌ڵسان و 350 سه‌رباز له‌ليان كوشتن و له وه‌خت كه‌ميگيش هيز و سوپايه‌يل كورد ك پيكهاتن له هووزه‌يل داوودخان، كه‌ڵهوڕ، سنجاوى، هه‌ورامان، و هووزه‌يل والى پشتكويه گرده‌و بوين ئه‌را روى وه‌ڕوى بوينه‌وه‌ى ئه‌و هيز بيگانه هه‌ر له مه‌رزه‌يل پشتكويه تا ناوچه‌ى هه‌ورامان وه سه‌ركردايه‌تى حسێن قولى خان و بريگ له سه‌ركرده‌يل تر.
دوياخر له‌ئاكام جه‌نگ و نواگيرى له سوپاى روسياى قه‌يسه‌رى زه‌ره‌د فريه‌يگ دريا له قه‌يسه‌ريه‌يل و بڕ فريه‌يگ تووپ و تانك و چه‌ك و ته‌قه‌مه‌نييش وه غه‌نيمه‌ت كه‌فته ده‌س كورده‌يل فه‌يلى.
وه‌لى سه‌ربازه‌يل روسياى قه‌يسه‌رى له سه‌رتاوه باوه‌ڕيان ئه‌وه بويه ك وه سووك و ئاسان ئه‌تويه‌نن زاڵ بوونه بان ناوچه‌يل فه‌يلى نشين پشتكويه جوور ئه‌وه‌گ زاڵ بوينه بان توركه‌يل، وه‌لى داگيركارى پشتكويه وه كام و ئه‌زره‌ت ئه‌وان ناته وجوود و له‌وه‌رانوه‌ر هيز هووزه‌يل فه‌يلى شكه‌ست هاوردن.
حه‌سه‌ن فائز عه‌له‌وى
