مەشکە ژەنین لەناو شیعر فلکلۆر فەیلی
شەفەق نیوز/ لە وێژەی فلکلۆر یا دەمەکی ناو کارەیلیگ جویر، قالی چنین، یا گەلەدرەو، دەسکەنە، شوانی، مەشکەژەنین و... هاتیە و وە ئاوازەیلیگ فلکلۆر چڕیەن کە بەشیگ گرنگەن لە وێژەی فلکلۆر کوردی.
"بەێت مەشکە" یەکیگ لە ئێ "کارئاواز"ەیلەسە کە لە وەخت مەشکەژەنین وەکار چوو.
لە خوار، چەن نموونەیگ "بەێت مەشکە"ن کە ژنەیل ناوچەیل جووراوجوور فەیلی زوان وەگەرد خوەیان لووڕنن و چڕنەیان.
مەشکە بژەنیە لە کەف و کەرە
ئاو ئەڕاد بارم لە جوو سەیمەرە
مەشکە بژەنیە لە کەرەێ پەتی
ئاو ئەڕاد بارم لە جوو شەروەتی
مەشکە بژەنیە لە کەرەێ کەمدوو
ئاو ئەڕاد بارم لە ژێر سەرگوو
مشکە بژەنیە لە کەرەێ چڵچڵ
ئاو ئەڕاد بارم لە کیەنی بڵبڵ/دڵدڵ
مەشکە بژەنیە زەڕ لە باند بوو
ئووردی براگەم شەو میەواند بوو
مەشکە بژەنیە تا بەرد بۊنم
جەلاو هاتێیە شەۊ پید بسینم
مەشکە بژەنیه نۊرواراند کەم
ئووردی براگەم شەو میەواند کەم.
