ماڵ حه‌رام
وه‌لی زانم هه‌ر تاويگه‌و ، بايه‌س دڵ وه‌پی خوه‌ش نه‌كه‌يم
له‌يره تا سوو نيه‌زايم چه‌بوو، ته‌نيا هه‌ر خودا خوه‌ی زانی
ئمجا مه‌به‌سم له‌ی شعره ، باس جووره كه‌سه‌يليگه
فره دڵخوه‌شن وه‌ی دونياو هه‌رخوه‌يان زانن له زوانی
تيه‌رن و به‌ن ، گشت كاريگ كه‌ن ،وه‌شه‌وخه‌ياڵ وه ڕووژ تاوده‌ن
دووس پويلن ، گيرفان پڕكه‌ن ، چه‌ويان تير نيه‌وگ وه‌ئاسانی
نه خه‌م ديرن ، نه خفه‌ت خوه‌ن ، نه‌يش شه‌رم وشوو له‌كه‌سيگ كه‌ن
توان هه‌ر خوه‌يان بژيه‌ن و نه‌داريش چووڵ بوو گيرفانی
موڵك دونيا جه‌مه‌و بكه‌ن هيمان له‌وه زياتر توان
حه‌راميش بووگ قرقينه‌ی ده‌ن ئاو سه‌رديش كه‌ن بانی
با ناويشی وه‌گه‌ن ده‌رچووگ ، با بويشنيش حه‌رامخوه‌ره
هه‌رچی قسه بارنه گووشيا ، نيه‌ژنه‌فيگ له دونيای فانی
زه‌كاتيش ده‌يگ ، خه‌يراتيش كه‌يگ ، وه‌رجه عه‌يديش سه‌رفتره نه‌يگ
وه‌ل گشت وايگا شه‌ن خوه‌ی كه‌يگ ، دڵی خوه‌شه وه خه‌رمانی
به‌زم وڕه‌زمی ئاشكراسه‌و له‌وه‌ر ترس خودا نيه
توايگ له‌يوا ڕه‌زای مه‌ردم باريگه ده‌س له‌ژيانی
گشت ئی كارو ئی ره‌فتاره ، زوورم ئه‌را ناوداريه
تا بويشن وه‌ڵڵا فڵانكه‌س ، كه‌س نيه شان به‌يگ له‌شانی
خوو دی فكر ئه‌وه نيه‌كه‌يگ بويشيگ سه‌فه‌ريگ ها وه‌رم
رووژ حه‌شر چه جواو به‌م له‌خاسيه‌يلم چه بمانی ؟
يه جوير ته‌وقه‌و ها له‌گه‌ردن ماڵ كه‌سيگ تره به‌يده‌ی
له‌و دونيا كی بايگه ته‌نگد قيامه‌ت خوه‌د سزانی
بنيان ماڵد وه‌حه‌رام نه‌يد ، خوه‌د وه‌ده‌س خوه‌د سزای خوه‌د ده‌يد
چوينكه ڕی چه‌فت گرديده وه‌ر ، وه‌حه‌رام ده‌س خوه‌د وه‌شانی
وه‌ختيگيش له‌مه‌جڵس نيشيگ خوه‌ی كه‌يگه قويخاو ده‌م چه‌رمگ
ئه‌گه‌ر يه‌كی نه‌ناسيگه‌ی سه‌د ره‌حمه‌ت كه‌يگ له‌باوانی
ئه‌ی هه‌ر نووش گيان خوه‌د بووگ ئه‌ڕا ئه‌و تيكه نه‌يده‌ی ده‌م
وه‌ڕه‌نج شان ناورديه‌سه‌ی ئه‌ره‌ق وه‌پيه‌و نه‌ڕشانی
ده‌رئه‌نجاميش كوڕای كوڕد له‌ی نه‌وبه‌ره‌ی شه‌ڕه كاڵن
ئه‌وانيش وه‌ك خوه‌د حه‌رامخوه‌ر ده‌س كه‌نه دزی وتاڵانی
بچوو نابوود ئاخرشه‌ڕ له‌يه وه‌يتر چ وه‌ييگه
وه (زه‌مزه‌م)يش خوه‌د بشووريد هيمان گڵاو و ويرانی
دی شاقنزی چه كه‌يدن و دی كی توايد قه‌درد بگريگ
مه‌ردم گشتی خاس ناسنه‌د خاس زانن چه‌نی ئه‌رزانی
