دوو پارچە شیعر

وه فەراقد دڵ خەمینم دایەگیان

داخ قورسێ ها دەرۊنم دایەگیان

هایده کووره سەر بنەم وه باوەشد

خون تەنیاییم بسێنم دایەگیان

بەعد چیند ڕووژگارم سەرده دی

کەس نیەپرسێ هات و چۊنم دایەگیان

تو قەرار ئی دڵ بێچاره بید

نیەسد،دونیا و دینم دایەگیان

خوزیه جارێ تر بگردام ئەو دەسە

چۊ بکم سەختە نیەتۊەنم دایەگیان

هەرشەوم تارەو چەوەیلم پڕ له ئەسر 

تا شەوەکی غەرق شینم دایه گیان

جەلیل خانی

غەزەڵیگ لە ڕزا جەمشیدی

هه‌ی خوه‌ر گوڵوه‌نی وه سه‌ردرا له ژێر ئه‌وره‌گان

به‌و تا دواره بونه یه‌ک، مانگ و خوه‌ر و هسارگان

زه‌مین دواره کرده وه‌ر؛ شەۊوەیل خاس و ڕەنگ ڕه‌نگی

تا گوڵ سوو وه خوه‌شله خوه‌ش، له ئی هنازه بایده بان

هه چۊ به‌رفتاوه‌یل به‌رز هه‌ر چاوەڕێ هاتندم

بەوره‌و وه پشت ده‌روه‌چه‌یل سه‌رێگ بکیشه ماڵمان

ئمرو چمان ناتیده ده‌یشت، ئەو پرشه پرشده  نه‌یوه‌ی

چمان ڕه‌نگد زه‌رده‌و بیه، چمان مه‌ریزی دۊله گیان

وه‌تن دواره ئه‌وره‌گان نواێ چه‌وەیلد گردنه

وه‌تن دو سێ ڕووژه عه‌زیز هەیڕوو سه‌رد نیشیده ژان

دواره ده‌مچه‌ود بشوور کڵاو ده‌سمالەگه‌د بووه‌س

تا ئی شه‌وار نامه‌یه یه‌ی جار تر نایده زوان

من و وڕینه‌ی ده‌روه‌چه‌یل، وه‌ی ناو وه‌هاره هایده کوو

به‌وره‌و دواره بۊنمه‌د، به‌وره‌و عه‌روس ئاسمان