وە چەوەڕی "رحمەت خودا"
شەفەق نیوز/ کەم ئاویە بیوەرینەگە لە پارێزگایل باشوور عراق وەرەو قەیران رۊ کەێد، ک شایەت ئیڵ و هووزەیلە وە مینەی تکی ئاو ئەرا زەۊی و زاریان بەێدە جەنگ.
پارێزگای زیقار، ک یەکیگە لە پارێزگایل باشوور عراق، کەم ئاوی بیوەرینیگ وەخوەی دی، ک دەسەڵاتدارەیل پارێزگاگە هوشداری لە مرافەیل چەکداری لەناو هووزەیلە وە مینەی ئاو دان.
ساڵح هادی وەڕێوبەر کشتوکاڵی زیقار ئەرا ئاژانس شەفەق نیوز ئۊشێد: ئی وەرزە ئەوەسا بوودە وەرز سەختیگ وەبان کشتوکاڵی پارێزگاگە، ئەوەیش لەوەر بڕێ هووکار، لەلیان ئەوەسە ک تا ئیسە واران نییە، تا بوودە ئاودانیگ ئەرا کشتوکاڵی، و هەمیش دەوڵەتەیل هاوسا ئاوەگە وە شیوەی خاسیگ مەرەقەز نێکەن، ئەوەیش وەگەرد ناڕاسی وەزارەتەیل پەیوەندیدار وەی کارە.
هادی نموونەیگ لەی باوەتە هاورد ک وەزارەت سامانە ئاوییەیلە وەرجەیە پەیمان وە ئەماریگ ئاوی دا گوایە بەش ئی وەرزە بکەێد، ئیجا وە ئاشکراکردن ئەڵاجەۊییگ وەناکاوەو وت: ئەو ئەمار ئاوە تەنیا ئەرا نووسینە.
وتیش؛ ئامادەکردن پلان وەرز کشتوکاڵی ئیسە لە ٤٥٠ هەزار دۆنەم زیاترە، وەلی رەت کریا، و پلانیگ لەلایەن حکومەت فیدراڵی دانریا، لە بنەمای پلان وەرز گوزەیشتە وە ئاست ٥٠ لەسەد، تا پلان پارێزگاگە بۊیە ١٨٧ هەزار دۆنەم، ک نێزانیمن ئی شمارە وەکی بیەێمن و رۊی وەکوو بکەیمن، چۊنکە هەزاران دۆنم وەبی کاڵین مینن.
هادی وتیش؛ مەزەنەی مرافەیل هووزانە لە هەر مەوقەیگ لەبان ئاو کەیمن، وەتایبەت لە ناوچەێل خوەرئەڵات پارێزگاگە، چۊنکە هانە هشکی رخبەریگ.
هەمیش باس کرد ک تەنیا چەوەڕی ڕەحمەت خودا کەن تا قورتار ئەو کشاوەرزێلە بکەن ک دەسکردنە کاڵین، و ئی وەرزە ئەوەسا بوودە وەرز سەختیگ لەبانمان، و رخمان لەوە چوود خوەشیەگەی پارەکە لە خوەیژینی دووارە نەوود، ک مەزەنە نێکەیمن ئی وەرزە بەش جوار مانگ لە ئارد بکەێد، ئیجا ناچار بۊیمن ئاردەگە بسینیمن.
لەلای خوەییش، حسێن ئال خەیون شازادەی ئیڵ عەبودە لە عراق و جهان لەبان هەژمارەگەی لە فەیسبووک پەیام زۊینەیگ ئەرا سەرۆک وەزیرەیل و وەزیر سامانە ئاویەیلە و موقتەدا سەدر و جیگرەیل مەجعیەت ئاینی نۊسان، لەناوی وت : سیاسەت وەرسگکردن لەبان خەڵک باشوور کریەێد لەڕی بڕین ئاو و فەوتان کشتوکاڵی.
و پرسیار کرد؛ ئایا کی لەیجۊر بڕیار و سیاسەتیگ وەرپرسە، ئایا راوێژکارەیلیگ هەس ک زانن نرخ ئارد و لەوەڕ و خوەراک بەرزەو بۊیە وەگەرد ئەوەیش ئاوەگە بڕین و رۊیی وەرەو شەت عەرەب کردن تا بوودە دەریا، و ناوچەیگ تەواوەتی لە کشتوکاڵی و ئاو نووشین بیبەش کردن.
لەلای خوەییش، وەڕێوبەر لە سامانە ئاویەیلە لە زیقار وڵام پەیامەگەی شازادەی ئیڵ ئال خەیون نەیا، و دووپات کرد ک پارێزگاگە پڕە لەوانەگ دەسدرێژی لەبان تاقەبەشەیل ئاوەگە کەن.
غەزوان سەهلانی وەڕێوبەر سامانە ئاویەیلەی زیقار ئەرا ئاژانس شەفەق نیوز وت: ئەمار ئاوەگە لەلای وەزارەتەگە بەش نووشیب کەێد وەگەرد ٥٠ لەسەد لەپلان کشتوکاڵی، و ئەوەسە ک ئیسە وەزارەتەگە لەبانی کار کەێد جۊر بەرزترین ئاستیگ تا ئاو نوویگ بڕەسێد.
سەهلانی دووپات کرد ک پارێزگاگە پڕە لە دەسدریژیکردن لەبان تاقاوەیل لەوەر نەۊین هاوکاری وەڕێوبەرەیل ئیداری وەگەرد دەزگا ئەمنیەیلە، ودیاری کرد ک پلان کشتوکاڵی لە پارێزگاگە رەسێدە ٥٠ لەسەد، باوجی لە راسیەگە هەر خود زەۊیەیل پارەکە گرێدەو، و یەیش کار رخبربەریگە، ک شایەت بەشەیل ئاو نووشین لەناو بەێد.
باس ئەوەیش کرد ک بەشیگ لە کشاوەرزەیل دەسدرێژی لەبان سکرەیل ئاوەگە لەبان چەمەیلە کردن، و دیاری کرد ک ئیدارەگەی لە ماوەی ساڵەیل گوزەیشتە ٧٠٠ سکاڵای دادوەری ئەرا ٨٠٠ دەسدرێژیکردن لە پارێزگاگە جۆلان.
عەبد زێدان جابری وەڕیەوبەر ناحیەی تار وت: رەوش ئاوەگە لە ناحیەگەی خوەشهاڵ دووس و دوژمن نێکەێد، ک یە خراوترین وەرز کشتوکاڵیە لە ناحیەگە.
جابری ئەرا ئاژانس شەفەق نیوز وت: ناحیەی تار ساڵانە کشتوکاڵی زمسانی و تاوسانی کەێد، و گرفت ئاوەگە قەیرانیگ گشتیە نەگ ناحیەی تار وەتەنیا، و دیاری کرد ک ماتوورەیلە توانای تەکان خوەیان نەیرن لەوەر داوەزین ئاو فورات وەشیوەی بیوەرینیگ.
وتیش: ئاو مەنە و ئاو فورات وەرەو ناوچەیل ئەهوار گلەو خوەن، و دووپات کرد ک بەش پارێزگاگە لە چەم فورات رەسیە ٧٠ لەسەد لە دەروازەی قەزای بەتحا، ک یە خوارترین ئاستیە، و جارانی ١٢٠ لەسەد بۊی.
هەمیش وت: تەنیا چەوەڕی ڕەحمەت خودا کەیمن تا لەی رەوشە قورتارمان بکەێد ک لەوەر بی ئاوی وەخوەمان دۊینیمن، ک ئەوسا ناحیەی تار زیاتر لە ١٠ هەزار دۆنەم کاڵیاد، و ئیسە کەفتیمنە کەمتر لە ١٠٠٠ دۆنەم
