وینە.. دویای شەش ساڵ لە جینۆساید ئەیزیدیەگان ململانەی قەیرانەگان کەن
شەفەق نیوز/ کەمینەی ئەیزیدیەگان، یەکیگ لە کۆنەترین ئاینه کوردیەگانن لە عراق، کەفتنە وەر لەناوبردن دووقاتیگ لەلایەن کومەڵە توندڕەوە ئاینیەگان، و دویای شەش ساڵ لە جینۆسایدکردنیان، زوانیان ئووشێد: چ گوناحیگ داشتیمن؟
ئی کەمینەی ئاشتیخوازە، فرەجار وەبی زانستن وەپیان ئووشن ''شەیتان پەرەس''، و خوەیان دویرەو خستن وە کۆمەڵگایل بویچگیگ، چووچیانە ناوچەیل بەشبەشیگ لە باکوور خوەرئاوای عراق، و باکوور خوەرهەڵات سوریا، و ناوچەیل باشوور تورکیا.
ئاسان نیە مەزەنەی ژمارەی ئیسەیان بکریەێد، ک ناوبەین ٧٠ هەزار تا ٥٠٠ هەزارن، وەگەرد کەفتنیان لەوەر مەترسی و ستەم و خراوکردن شیوەگەیان، بیگومان ژمارەیان فرە کەمەو بوی لە ماوەی سەدەی گوزەیشتە.
یەکیگ لە فامستنە هەڵەگان لەلایەن توندڕەوەگان لەبان ئەیزیدیەگان ک ئی ناوە چوودەو ئەرا یەزید کوڕ موعاویە، دویەم دەسەڵاتدار دەوڵەت ئەمەوی (٦٤٧-٨٩٣ زاینی).
بەڵکم لە راسیەگەی ئی ناوە لە وشەی کوردی کۆن (ئیزه‌د) هاتگە، ک واتەگەی ( فریشتە یا خودا)، ئەرا ئەوە ناو ئەیزیدی واتەگەی بوودە ( خودا پەرەس) و وەی شیوە ئەیزیدیەگان باس خوەیان کەن.
ئمڕوو، ژمارەی فرەیگ لە خەڵک ئی کەمینە هانە کامپەگان، و نێتویەنن بچنەو ئەرا ماڵەیلیان ک رزگار بوی، لەوەر ململانە سیاسیەگان و خراوی خزمەتگوزاریەگان.
شەفەق نیوز رەوانگەی ژیان ئەیزیدیە ئاوارەگان کرد لە کامپ ئاشتی لە ناحیەی عەربەت سەروە پارێزگای سلێمانی، ک تەرخان کریا ئەرا ئەیزیدیەگان.
دانیشتوەیل کامپەگە دادکردن لە خراوی رەوش ژیانیان، وکەمی لە خزمەتگوزاریەگان.
ژمارەیگ لە دانیشتوەیل کامپەگە ئەرا پەیامنێر ئاژانس شەفەق نیوز قسەکردن، ک لایەنە پەیوەندیدارەگان لاوە لەلیان نەکردن و بڕ ئەو جینۆسایدە ک کەفتنە وەری، و ئمڕوو کەفتنە ململانە ئەرا ژیانکردن.
