وەفر.. چەو ئاوارەیلە ئەسرین کەێد و رووڵەیلیان رفنێد
شەفەق نیوز/ رووژەیل کپ، هۊچ دەنگیگ لەناویان نێتیەدە گووش، مەگەر تەنیا دەنگ هاژەی وا، هەنای دەوار ئاوارەیلە شەکنێد، و چەرمگی وەفرەگە، سیمای دڵخوەشی وەخوەی گرێد، وەلی لە ژیر دەنیەیلی خوسەیگە ک هەناسەی ئەو کەسەیلە لە پشت پەردەی چادریگ تەنگەو کەێد ک نوای سەردیە سەختەگە نێگرێد، و وەفرەگە لە گشت سۊکیگ گیریان هاوردگە.
لەماڵ دۊرخریاگەیل چۊچیانە، و میلکانیان بۊیەسە کەلاوەی ویران وەدەس تیرۆر، شۊنیان لە کامپەیل هەرێم کوردستان بۊیەو، و بۊیە ماوایگ ئەرایان، تا لە هۊر لایەنەیل پەیوەندار و فریاکار چگن، چادرەیل دۊیەکەینگ هەکاتی ئمڕوو نییە، ک دی مقەیەتی خوەیان و زاڕووەیلیان لەو سەردیە نێکەێد ک لەو کونایلە تیەێدە ناو، ئەو کونایلە ک وەئومێد گلەوخواردن واز مەنن، و گلەوخواردنیش رووژ دۊای رووژ هەر دۊرەو کەفت.
زیاتر لە یەک مەلیۆن ئاوارە هانە ناو کامپ و کۆمەڵگەیلەی هەولێر، ئەنبار، سلێمانی، کەرکوک، دیالە و نەینەوا، لەژیر سەختی گوزەران کەن، و ئەو دڵنگەیلە یا چشتەیل گەرمکردن و سوتەمەنی نەیرن، و دەسەڵاتەیلیش چشتیگ وەپیان نیەێد تا لەی زمسانە رەد بکەن، و هەمیش هەڵمەتەیل فریاکەفتن ک خوەیبەخشەیلە و ریكخراوەیل ماف مرۆڤ دەنەیان بەش ئەو داوایل سەرەکیە نێکەن.
سەرباسەگە، وەرجە چەن رووژیگ عراق و هەرێم کوردستان وەتایبەت کەفتە وەر وەفروارین، ک رسوای ئەو خەفتەیلە کرد ک خەڵک چادرەیلە خوازین بپووشنەی.
تا مەوقەی نۊسین ئی ڕاپۆرتە، مردن سێ مناڵ توومار کریا، یەکیگیان دۊیەتیگە لە کامپ ئاوارەیی ئاشتی لە پارێزگای سلێمانی، وەگەرد کەیوانویگ ک وەگەرد خیزانەگەی هانە ناو کەلاوەیگ لە پارێزگای دیالە، ئەوەیش لەوەر ئەو کاژەی وەفرینە، و نەۊین پەتو و سوتەمەنی.
یەکیگ لە ئاوارەیلە ناو خوەی ئاشکرا نەکرد، ئەرا ئاژانس شەفەق نیوز باس ئەو زیانە کرد ک پشتگوشخستن سیاسیەیلە ک مرافە لەبان قانجازەیلە کەن وەپیان رەسیە، ک یە چەن ساڵیگە ئەو کابرای ئاوارە هاناو کامپ ئاشتی لە باشوور سلێمانی.
ئۊشێد: داوا لە سەرۆک وەزیرەیل و پارێزگار سەڵاحەدین و ئەنجومەن نوو نۊنەرەیل کەیمن لەی سەردیە قورتارمان بکەن و دەرمان و گەرمی وەپیمان بیەن، و پەیمان خوەیان وە ژیانیگ سەربەرزی وەپیمان بیەن، ک ئەوە لە رووژەیل هەڵبژاردن دروشمیان بۊی، ک سەردی و وەفرەگە ژیانمان کردە زیانیگ وەگەرد زیان ئاوارەیی ک یە هەفت ساڵە وەردەوامە.
هەرچەن ئیدارەی کامپ ئاشتی دووپات کردگە ک وەزارەت کووچ گشت خوازینەیل زمسان ئەرا ئاوارەیل ناو کامپەیلە لە نەفت و خوەراک دابین کردگە، باوجی یەکیگ تر لە ئاوارەیلە ک ناو خوەی ئاشکرا نەکرد وت: داوا لە لایەنە وەرپرسەیل کەیمن نەفت چەرمگ وەپیمان بڕەسنێد، چۊنکە پۊل سەنینی نەیریمن، و نرخ یەک لەتری رەسێدە هەزار دینار لەوەر سەردیەگە و کەمی کارەباگە، ک وەخراوی گلەوخواردە بان تەندروسی مناڵ و ژنەیلیمان، ئەراوە بایەتە حکومەت وەڕاسی بنووڕێد و هەزاران خێزان لەی زیانە قورتار بکەێد، ک بۊیەسە فریشتەیگ ئەرامان.
وتیش: رەنگ وەفرەگە چەرمگە، وەلی رووژەیلمان لەوەر سەردیە سەختەگە بۊنەسە سیا، و وەفرەگە رەسیە ناو چادرەیلە.
وەفرەگە وەرووژ ئارام گرد، باوجی شایەت لە رووژەیل ئایندە لە نووە باێدەو، و هەڕەشەی هەزاران خیزان وە زمسان سەختیگ بەێد وەتایبەت لەبان ئەو زاڕووەیلە ک لە مناڵدان زیان پەیا بۊینە، و سەختیەیل پشتاوپشت وەخوەیان دۊینن، لەلیان لەدەس سیاسەتکارەیلە، و بەشیگیانیش ئەو سرووشتە چەسپانەی ک شەرمی لە ئەسر داڵگیگ یا ناڵەی مناڵیگ نێتیەێد.
لەلای خوەییش، رەوانگەی عراقی ئەرا ماف مرۆڤ، داوا لە دەسەڵاتەیل کرد کوتپڕ دەس بیەنە وەر و دەسمیەتی ئاوارەیلە بیەن، و خوازین گرنگیان ئەرا مقەیەتیکردن گیانیان جیوەجی بکەن، وەتایبەت ئەرا ژن و مناڵەیل، لەسای ئی سەردیە، و لە هۊریان نەکەن، و هۊریان نەخەنە لای گرفتەیلیگ تر، و هەمیش گاڵ کۆمەڵگای ناودەوڵەتی دا بەشکی ئەوانیش دەسمیەتییان بیەن.
رەوانگەگە لە راپۆرتیگ توومەتبار وەزارەت کووچ و کووچبەرەیل کرد، و وەڕیەوبردن شیواشیویگ لە باوەت ئاوارەیلە وە ڕەفتارکردن بی ئاگایی، ک خوازیە وەهەر جۊریگ بوود کۆتایی وەی باوەتە بارێد، ئەگەر وەزەرد ئاوارەیلەیش بۊیە.
لەلای خوەییش، ڤیان دەخیل خانمە ئەندام پەرلەمان عراق، داوا لە حکومەت فیدراڵی کرد گرنگە وەزۊی بڕەسنە داد نزیکەی ٧٠٠ خیزان ئەیزیدی ئاوارە ك وەفرەگە لەناو کامپیگ لە کۊیەی شەنگال گیریان داگە.
وەرجەیە، کۆمسیۆن باڵای ماف مرۆڤ لە عراق هوشداری لەو کاریگەریەیل تەندروسی خراوە دا ک شەپۆل یەخ و سەردیەگە کەێدەی، ک فرەی ناوچەیل باکوور عراق گردە وەر، و زوور خوەی خستە بان چینە بیدەسەڵاتەیل و زەردمەنەیلە، وەتایبەت لەبان ئاوارەیلە.
