وەپای خوەی چیە نەشتەرگەری وە مردگی دەرچگ.. (رەحمە) لە داعش قورتار بوی تا لە نەشتەرگەری هەولێر بمرێد

شەفەق نیوز/ ئەبو عەبدولڵا ک ئاوارەس لە خەڵک سەڵاحەدین، نەزانست ک واینی لە پارێزگاگەی لەدەس داعش، چشتیگ چەوەڕیی کەێد تاڵیی لەوە کەمتر نییە، تا رەحمەی دویەت ١٤ ساڵانی لەدەسی چگ.

باسەگەی رەحمە

دویای داکاسیانی خوەی و خانەوادەی لە هەولێر، و مناڵەیلی خستە مەکتەو، یەکیگ لە دویەتەیلی وەناو (رەحمە) لە تەمەن ١٤ ساڵان، وەناکاوەو چەوی و حەوزی نیشتە ژان، و ئەبو عەبدولڵا وەزوی ئەرا چەن پزشکیگ بردەی، تا نەهامەتی دەسوەپی بکەێد.

باوگ دویەتەگە ئویشێد: هەنای دویەتەگەم بردمە لای چەن پزشکیگ، دەرکەفت ک پەنام لە سەری دیرێد، و گشت پزشکەیل تەنیا ٦٠% سەرکەفتن نەشتەرگەری وەپیم دان لە ئی پەنامە درارن.

پیاوەگە وتیش: هەنای کەفتمە مینەی پزشکەیلیگتر، ئیجا دویەتەگەم بردمە لای دکتۆر هێمن حەسەن، و وەپیم وت ئی نەشتەرگەریە ئاسانە، و ٩٥% دەرفەت سەرکەفتن دیرێد، چوینکە تەنیا کیسەی روینە لە مەغزی، و بڕوا وەپی کردم تا نەشتەرگەری ئەرای بکەێد.

رووژ نەشتەرگەری

وە خەفەت فرەیگ، پیاوەگە باس ئەو رووژە کەێد ک ژیان خانەوادەی ژیروبان کرد، ک ئویشێد: لە رووژ نەشتەرگەری دویەتەگەم بردنە ناو ژوورەگە، و پزشکەگە وت: ئەوەسا کونای کەپووڵی وە نازور کەم، و کیسەگە لە سەری درارم، باوجی دویای کەمیگ دەرچگ و وەپیمان وت؛ ک دویەتەگەم کەفتە بیهووشی، وئیمەیش وەی قسە بیزار بویمن، و دویای چوار رووژ لەناو خەسەخانە، گیانی لەدەسدا.

ئەبو عەبدولڵا هەمیش ئویشێد: لە ماوەی بیهووشی دویەتەگەم،  ئیدارەی خەسەخانە تایبەتەگە داوای ٤٥٠٠ دۆلار لەلیم کرد، و منیش ئی توانا نەیاشتم، ک هەر رووژیگ بایەت بوی یەک مەلیۆن دینار خەرج خەفتن دویەتەگەم لە چەودیریکردن هویرد بیەم، ک ناچار بویم ئەرا خەسخانەی جمهوری حکومەتی لە هەولێر بوەمەی.

وەزیر تەندروسی چە کرد؟

ئەبو عەبدولڵا ئویشێد: دویای مردن دویەتەگەم، چەوم کەفتە سامان بەرزنجی وەزیر تەندروسی هەرێم کوردستان، و تەمەیم کرد سکاڵا لەبان ئەو پزشکە توومار بکەم ک نەشتەرگەری ئەرا دویەتەگەم کرد، و منیش چیم سکاڵا لەبان ئەو پزشکە توومار کردم، و وەزارەت تەندروسی پزشکیگ کلکرد تا قسەیلم لە باوەتەگە توومار بکەێد،  و تەنیا یەک چارەک ساعەت وەگەردم بوهز و پەیمان جیوەجیکردن ریکارەیل دان، باوجی دویای چەن رووژیگ هەنای پەیوەندی وەرد کەسیگ مەندوب ناوبەین تەندروسی و دادوەری کردم ک ناوی (سەعدی) بوی، سەعدی وەپیم وت: ئەوەسا وەزارەتەگە دووارەی لێکوڵینەوە کەێد، چوینکە ئەو پزشکە ک قسەیلم توومار کرد پسپۆڕ نەویە.

وە چەویگ پڕ ئومێد، ئەبو عەبدولڵا ئویشێد: هیمان چەوەڕی هەلویست ئاشکرایگ لە وەزارەت تەندروسی هەرێم کوردستان لەباوەت مردن ئەو دویەتمە کەم ک وەپای خوەی چیە نەشتەرگەری وە مردگی دەرچگ.

وەزارەت تەندروسی لە هەرێم کوردستان

ئاژانس شەفەق نیوز، تەقەلای پەیوەندی وەرد وەزارەت تەندروسی هەرێم کوردستان و تەندروسی پارێزگای هەولێر کرد، باوجی هویچ جواویگ لەی باوەتە لەلیان نەوی.

پزشکەگە

لە ئامادەکردن راپۆتەگە، هەمیش پەیوەندی وەرد دکتۆر هێمن حەسەن کردیمن، ک ئەو پزشکە لەلای خوەیەو ئەرا ئاژانس شەفەق نیوز ئویشێد: دویای سڕکردن دویەتەگە، وەرجە نەشتەرگەری، دویەتەگە کەفتە وەر گرفتیگ لە دڵی، و خستیمنەی لای پزشکیگ باتنی، و پزشکەگە وت: هویچی نییە، و ئیمەیش نەشتەرگەری کردیمن.

پزشکەگە ئویشێدیش: لەناو نەشتەرگەری، دویاتەگە فشار خوینی فرە داوەزێ و دڵی وەزوی کوتا.

وتیش: چەوەڕی بڕیار ئەو دەسەی تەندروسیە کەم ک لەلایەن وەزارەت تەندروسی هەرێم لەی باوەتە دروس کریا، و منیش ئامادەم ئەرا هەڵگردن وەرپرسایەتی دویای هەر بڕیاریگ دەرچوود، و نیەتوەنم هوێچ زانیارییگ بیەم تا دەسەگە گردەو نەوود و بڕیاریگ کۆتایی دەرنەکەێد.