گەندەڵی عراق دیوانیە لەژیر ئاو نقوم کەێد.. وارانەگە نەهامەتی ٢٠ ساڵە خەێدە دەیشت

دیوانیە زیان لە کوینە و بەدی بینا ژیرینەیل دیرێد ک یە ٢٠ ساڵە هویچیگی خاس نەکریاگە، وەگەرد توومەتەیل گەندەڵی لەبان وەرپرسەیل پارێزگاگە، هەمیش وەگەرد شکستهاوردن ئەو کۆمپانیایلە ک کار تووڕەیل ئاوەڕۆی لە تەواوکردن پڕۆژەیل وەماوەی ١٠ ساڵ گوزەشتە وەدەسیان بوی.

پارێزگای دیوانیە ناچار بوی دەوام فەرمی فەرمانگە و دامودەزگایل حکومەتی بیجگە خزمەتگوزاریەیلیان، ئەرا رووژەیل دووشەممە و سێسەممە و چوارشەممە پەک بخەێد، و هەمیش بیجگە وەڕیەوبەرایەتی مەکتەوەیل تا دەسمیەتی لە وەردەوامی تەقەلایل ئەرا ئامادەکردن بینایل مەکتەوەیل ئەرا خوەنەوارەیل بیەن، ئەوەیش وەگورەی بەیاننامەی نویسینگەی مەسیەم شەهەد پارێزگار دیوانیە.

نقومبوین چشتیگ ئاساییە 

لەی باوەتە، باسم غورابی پەرلەمانتار لە پارێزگای دیوانیە وت: خزمەتگوزاری لە پارێزگایل ناوڕاس و باشوور و دیوانیەی کەلەمەدار وەگەردیان خاسەوکردن و زیایکردن وەبانیان نەکریاگە، ک هیمان بینا ژیرینەیل هەر خوەیانن یە ٢٠ ساڵە، ئەراوە چشت ئەڵاجەوییگ نییە ک تووڕەیل ئاوەڕۆی بەش ئی بڕ وارانە نەکەن.

غورابی لە قسەیلی ئەرا ئاژانس شەفەق نیوز وت: حکومەتەیل ناوخوەیی وەرین شکست خوەیان چەسپانن، وەتایبەت ئەو پارێزگار دواییە، ک دەرکریا، و وەباوەتەیل گەندەڵی دارایی و ئیداری توومەتبارە، هەمیش پارێزگارەیل وەرجە ئەو، و ئی پارێزگار نووە یە تەنیا یەک مانگە هاتیەسە پۆستەگەی، خو وەڕیەوبەرەیل فەرمانگەیل وەتایبەت شارەوانی و ئاوەڕۆی، ئەوانە هەر چەن مانگیگ ئاڵشت کریەن، و وەڕیەوبەرەیل ئیسەیش کەفنە روی میکانزمەیل پەککەفتگ و کەمی لە ئامادەکردن ک نیەیلێد خزمەتگوزاری خاسیگ پیشکەش بکەن.

"کۆمپانیای رافدەین" 

پەرلەمانتر باسم غورابی دیاری کرد ک دوو کۆمپانیا کار پڕۆژەیڵ ئاوەڕۆی دیوانیە کردن و شکست هاوردن، یەکەمیان کۆمپانیای رافدەین بوی ک لە ساڵ ٢٠١١ شکستی دەسنشان کرد، و باوەتەیل گەندەڵی دارایی و ئیداری هابانی، و سزا کەفتە بانیر و ئەندازیاریەیلی زیندان کریان، ئیجا کۆمپانیاگە بەسیا، تا کۆمپانیای (نورولئوفوق) هات تیرەیلی سەن، ک ئیسە کار لە دیوانیە کەێد، و یەیش کاری خاس نییە. 

غورابی زوور لەبان گرنگی زویکردن لە تەواوکردن پڕۆژەیل ئەو کۆمپانیا کرد، وتیش: داوا لە وەزیر ئاوەدانی و نیشتەجیکردن کردگە سەردان دیوانیە بکەێد و کۆتایی وە باوەت ئاوەڕۆی بارێد.

وەرگری شارستانی

وەگەرد ئەو قەیرانە، بنکەیل وەرگری شارستانی لە بەغداد و پارێزگایل کەفتنە ئامادەباشی ئەرا نواگردن ئەو وارانەیل رفتە ک بەشیگ لە کویچە و ناوچەیل نقوم کرد، ک دەسمیەتی فەرمانگەی شارەوانی دەێد ئەرا کیشان ئاو وارانەگە، وەگورەی قسەی عەمید جەودەت عەبدولرەحمان وەڕیەوبەر پەیوەندی و راگەیانن وەڕیەوبەرایەتی وەرگری شارستانی.  

عەبدولرەحمان ئەرا ئاژانس شەفەق نیوز وت: ئەو شەپوول واران دویاییە لەبان بەغداد و واست و نەجەف و دیوانیە و ئەنبار و نەینەوا وارێد، و گشت تیمەیل وەرگری شارستانی وەبان پلانیگ ئەرا کیشان ئاوەگە کار کردن تا هامشوو خەڵکەگە ئاسان بوود.

و دووپات کرد ک وەڕیەوبەرایەتی وەرگری شارستانی چەودیاری کەێد و ئاگاداری لە دەسەی کەشناسی وەرکرێد تا لەوەخت گونجیاگ کەس بەێدە وەر ئەگەر وارانیگتر وارێد.

تویڕەیی ناوخوەیی

ئەبو عەلی لە خەڵک پارێزگای دیوانیە، نووڕێد ک رەوش بینا ژیرینەیل و ئاوەڕۆی دیوانیە بەدە، ک هاووڵاتی لە حکومەتەیل پشتاوپشت هویچ ئەنجام کاریگ وەچەو نەیە، یەسە ک هیشت پارێزگاگە نقوم بوود و ماڵداری و بەرژەوەنی خەڵکەگە زەرەدمەن بوی، و خوەنەوارەیلیش لەسای پەکخستن دەوام زەرەدمەن بوین.

ئەبو عەلی لە قسەیلی ئەرا ئاژانس شەفەق نیوز پرسیار کرد لە چارەنویس پویل یاسای ئاسایش خوەراک و بوودجەیل وەرین و شیوەیل خەرجکردنیان، و داوا لە ئیدارەی ناوخوەیی نوو کرد بڕیارەیل چاکسازی ئەرا سووکەوکردن لە بار هاوەڵاتیەیل جیوەجی بکەێد، جویر خەرجکردن پویل قەرەبوو لەو زەرەدە ک لەوەر وارانەگە رەسیە هاووڵاتیەیل و نقومبوین ماڵ و ناوماڵەیان.