نەداری وەشۊداین دۊیەت ناخاڵە لە کەمپ ئاوارەیل عراق زیادەو کەێد
شەفەق نیوز/ شایەت وەشۊداین دۊیەت ناخاڵەیل بۊیەسە چارەکردن وەختانەیگ لە ناو کەسوکار نەدارەیل دۊتەیل ناخاڵە لە کەمپ ئاوارەیل وە تایبەت کامپ ئاشتی لە سلێمانی، باوجی ئازاردیان و مردن یەواشیگە ئەفا دۊیتە ناخاڵەیلە.
دۊیتەیل کەم تەمەن وە شووی دریای تۊنوتیژی زارەکی و جەسەیی وەرانوەریان کریەێد، وەبی پەیاکردن ئامراز دادکردن لەوەر نەبۊین یاسایگ، جۊر ئەوەگ دۊنریەێد هاوسەرگیری فرەیگ دۊیتەیل ناخاڵەیل لە دەێشت دادگەی شەرعی و دادەوەر فەرمی لەوەر بڕیگ هووکار دریەنە شۊی.
مەریەم ئاوارەیگە لە پارێزگای سەلاحەدین وە ئاژانس شەفەق نیوز وت: نەداری پاڵنەریگە ئەرا خانەوادەیل تا بڕیار وەشۊداین وەرجەوەختە بیەن، توانای ئەوە نێرن مناڵەیل گەورە بکەن پاڵنەێدە خێزانەگە رازیبن وە بڕیار شۊکردن دۊیت ناخاڵەیل وەرجەوەگ بڕەسنە تەمەن یاسایی چۊنکە نێتۊەنن ئی دۊیتەیلە ئیوەت بکەن و وادار خێزانەگە کەێد ئی بڕیارە بدەن.
باوگ ئیبراهیم یەکیگە لە ئاوارەیل کەمپ ئاشتی وت: هاوسەرگیر دۊیت ناخاڵە وەرجە گەورەیی لە تەمەن پەیوەنی شۊکردن سەرنەکەفتگیگ دروسکەێد کۆتایی وە جیابۊین تیەێد و جاریگتر ئەرا ماڵ باوانیان گلەوخوەن وە مناڵیگ یان زیاتر وە لە ئەنجام شمارەی خێزانەگە زیاتر بوود.
وتیش؛ "بایەد خێزانەیلیان ئاگادار لە بڕیار وە شۊدانیان بوون، وە تایبەت ئەرا ئەو دۊتەیلە خوار تەمەن 18 ساڵن" لەوەر رووشنایی ئی کارەساتە مرۆییە ڕێکخریاگەیل ماف مرۆڤ لە ماوەی هەفتەی جەهانی تۊنوتیژی دژ وە ژنەیل لە چالاکیەیلیان بەڵگەنامەی بەرزبۊین شمارەی تۊنوتیژی و سکاڵایل وە تایبەت لەماوەی پەتای کۆرۆنا ئەنجام گەنیگ وەجی هیشتیە.
وەزارەت کووچ و کووچبەرەیل عراق لەکەمپ ئاشتی ئەرا ئاوارەیل پارێزگای سلێمانی هەڵمەتیگ هووشیاری ئەرا ژنەیل ئاوارە لەباوەت مەترسیەیل هاوسەرگیری کەم تەمەن ڕێکخسن وەناونیشان " نهێنی سەرکەفتنی" وەبوونەی هەڵمەت 16 رووژەی دژ وەتۊنوتیژی دژ وە ژنەیل.
ڕێکخەرەیل هەڵمەتەگە وتن گفتوگوکەن لەباوەت مەترسیەیل ئایندەی هاوسەرگیری دۊتەیل ناخاڵەیل.
فراس خەتیب قسەکەر فەرمی کومیسیۆن وڵاتەیل یەکگرتگ ئەرا کاروبار ئاوارەیل وت: ئامانج لەی چالاکیە ئەرا بڵاوکردن هووشیاری و روشنهۊری لەناو کۆمەلگەس ئەرا کۆتایی هاوردن وە تۊندوتیژی دژ وە ژنەیل وتیش؛ هەڵمەتەگە وینای کۆمەڵایەتیەگە لەو ماوە پەیوەنی دروسبکرێد وەگەرد مەردم ئەرا رۆشنهۊیر کرن و هوشیاری لە باوەت تۊندوتیژی دژ وە ژنەیل.
خەتیب دووپاتکرد، بایەتە رێز لە ژن بگریەێد و مافەیلیان بیرێد لەناو کۆمەڵگە، وتیش؛ بەرزەوبۊین پسای تۊندوتیژی و دادکردن وە تایبەتیل لەماوەی پەتای کۆرۆنا و بەرزەوبۊین بار ئابووری نەرێنی.
تا ئیسە هاوسەرگیری دۊیەت ناخاڵە وەبی چەودێری جۊر خوەی مەنییە، کاریگەری خەراویگ وە رۊی کۆمەڵگە دروسکەید وەتایبەت لە ئایندە قەیران تەندروسی و ئابووری و ئەمنی دروسکەێد لە ساڵەیل ئایندە.
