نەتەوە یەکگرتگەیل زەنگ ورسگی جەهانی کوتێد
شەفەق نیوز/ نەتەوە یەكگرتگەیل، راگەیان ک شمارەی ئەو کەسەیلەگ لەجەهان زیان لە ورسگی دیرن، پارەکە رەسیە باڵاترین ئاستەیلی، و لەوەختیگ هووکارەیل ئی سیما وە "سێیانەی ژەهرین" دانا، مەزەنەی زیایکردن ئامار ورسگی ئەرا ئاستەیل رخبەریگ کرد.
نەتەوە یەکگرتگەیل لە راپۆرتیگ ئاژانس ئەسیۆشیتد پڕس بڵاوی کرد و ئاژانس شەفەق نیوز چەودێریی کرد وت: شمارەی ئەو کەسەیلەگ خوراکیگ نەیرن وەشیوەی رووژانە بەشیان بکەێد، وەچەو ساڵ گوزەشتە رەسیە بەرزترین ئاستەیلی.
مەزەنە کردیش شمارەگە بڕەسێدە ئاستەیل نوو رخبەریگ، وەگەرد ئەو زەرەدەیلە ک جەنگ ئۆکرانیا لەبان بەرهەم خوەراک لە جەهان هاوردەی.
نەتەوە یەکگرتگەیل دیاری کرد ک نزیکەی ١٩٣ مەلیۆن کەس لە ٥٣ دەوڵەت زیان لە نەوین ئاسایش خوەراک تیژیگ لە ساڵ ٢٠٢١ وەخوەیان دوینن، لەوەر ئەو تیکڵای سێیانەی ژەهرینە "ململانە، ئاڵشتبوین کەشوهەوا، کاریگەری ئابووری لە پەتای کۆڕۆنا".
وتیش: شمارەی گشتی ئەو کەسەیلە ک خوەراکیگ نەیرن وەشیوەی رووژانە بەشیان بکەێد، لە ساڵ گوزەشتە، وە ٤٠ مەلیۆن کەس زیاترەو بوی، ک دووپات ئەوە کەێد ک روی وەرەو شیوەیگ نیگەرانی کریەێد لەلایەن زیایبوینەیل ساڵانە، وەماوەی چەن ساڵیگ.
لەو راپۆرتە دەسنشان کریا ک ئەو وڵاتەیلەگ زیان لە ململانەیل درویژماوە وەخوەیان دوینن، جویر ئەفغانستان و کۆنگۆ و ئەسیوپیا و نەیجیریا و باشوور سوودان و سوریا و یەمەن، فرەترین شمارەی دانشتگەیل هاناویان ک زیان لە نەوین ئاسایش خوەراک وەخوەیان دوینن.
راپۆرتەگە مەزەنە کرد ک سۆماڵ لە ٢٠٢٢ بکەفێدە وەر یەکیگ لە بەدترین قەیرانەیل خوەراک لە جەهان، لەوەر ئەو هشکەساڵیە ک ماوەگەی درویژەو بوی، و هەمیش وەردەوامی لە تونڕەوی، وەگەرد چەن هووکاریگتر ک هیلێد مەلیۆنا لە سۆماڵ روی وەرەو قەیران خوەراک تیژیگ بکەن. نەتەوە یەکگرتگەیل هووشدارییگ دا لەناوی دیاری کرد ک ئەگەر ئمڕوو تەقەلایگ زیاتر ئەرا پاڵپشتیکردن کۆمەڵگایل ئاوایی نەکریەێد، خو بڕ ئەو ویرانیە لە ورسگی رەسێدە رخبەری، و خوازینیگ ئەرا کاریگ مرۆیی زویوەزوی و فراوان هەس ئەرا نواگردن ئەوە.
لاپۆرتەگە داوای زیایکردن بەرهەمهاوردن لە کشتوکاڵی، و دابینکردن ١،٥ ملیار دۆلار ئەرا دەسمیەتی کشاورزەیل لەو ناوچەیلە کرد ک لە وەرز کشتوکاڵی ئایندە کەفتنەسە وەر مەترسی، وەخاتر ئارامی وزیایکردن بەرهەم خوەراک ناوخۆیی.
