مه‌ترسی روسیا و داعش له‌یه‌ك تای ته‌رازوی
كارته‌ر له يه‌كه‌م ويستگه‌ی گه‌شته‌گه‌ی له‌يوا دياره داوا له ئه‌ڵمانيا بكا له مه‌يدان ئاسايشی ناوده‌وڵه‌تی نه‌خش فيشتر نيشان بيه‌يد،ك بيجگه وه‌سه‌رچگن ٧٠ ساڵ له‌بان جه‌نگ جه‌هانی دويه‌م، وه‌لی تائيسه ئه‌ڵمانيا ئاماده نيه سه‌ربازه‌يل خوه‌ی ئه‌را ئه‌رك جياجيا ره‌وانه‌ی ده‌يشت وڵاته‌گه‌ی بكا.
وه‌رپرسيگ باڵای وزاره‌ت وه‌رگری ئه‌مريكا باس له‌وه كرد ك ئه‌ڵمانيا له‌ژير فه‌رمانده‌يی وه‌زيری وه‌رگری هان ئه‌دريه‌يد ئه‌را ئه‌وه‌گ چوارچيوه‌ی نه‌خش خوه‌ی له بوار ئاسايشی جه‌هانی فراوانتر بكا، ئه‌ويش وه‌شيوه‌يگ ك بگونجيه‌يد وه‌ل قورسايی سياسی و ئابووری.
په‌يوه‌نديه‌يل روسياو خوه‌رئاوا له‌ی ماوه وه‌جووريگ شيوياگه ك هاوشيوه‌س وه‌ل ئه‌و گرژيه‌يله ك له‌ماوه‌ی جه‌نگ سه‌رد له‌ناونيان وجوود داشت، وه‌تايبه‌ت له‌و وه‌خته‌و ك روسيا وه زوور هيز نيمچه دويرگه‌ی كريمای ئۆكرانيا لكانه خاكه‌يل خوه‌يه‌و.
ئمجا وه قسه‌ی ناتۆ، روسيا وه‌رده‌وامه له دابينكردن هاوكاری سه‌ربازی ئه‌را جياخوازه‌يل له خوه‌رهه‌ڵات ئۆكرانيا، وه‌لی روسيا ئه‌و تومه‌ته‌يله ره‌ته‌و ئه‌كا.
وه‌رپرسه‌يل ئه‌مريكا باوه‌ڕيان ئه‌وه‌سه ك قه‌يران ئۆكرانيا بايه‌خ روی وه‌ڕوی بوينه‌وه‌ی نه‌زه‌ريه‌ی Hybrid War ده‌رخست ك پشت وه وه‌كارهاوردن سه‌رباز گوم و مادده‌ی دعايه‌و فشار ئابووری ئه‌وه‌سيد، ك خوه‌رئاوا وه‌پی له‌يواسه روسيا له ئۆكرانيا ئه‌و نه‌زه‌ريه جيوه‌جی ئه‌كا.
وه‌رپرسه‌يل وزاره‌ت وه‌رگری ئه‌مريكا باس له‌وه‌يش ئه‌كه‌ن ك كارته‌ر وه‌شيوه‌يگ راسكانی فشار ئه‌خاده بان ناتۆ تا هويره‌و بكا له مه‌ترسيه‌يل و ميگكانيزمه‌يل تازه‌و داوايش له ناتۆ ئه‌كا ده‌س هه‌ڵبگريد له بنه‌مايه‌يل جه‌نگ سه‌رد و له‌وه‌رانوه‌ر ئه‌وه‌يش هويره‌و بكا له پلانه‌يل تازه ئه‌را روی وه‌ڕوی بوينه‌وه‌ی هه‌ڕه‌شه‌يل تازه.
وه‌ل ئه‌وه‌يشا بڕياره كارته‌ر هويرده‌كاری بڵاوكردنه‌وه‌ی كاڵای قورس سه‌ربازی له ئۆرپا بخاده ڕوی، له‌وه‌رانوه‌ر ئه‌وه‌يش روسيا له‌ی كاره‌يله وه ته‌مامی نگه‌رانه، هه‌ر له‌وه‌ر ئه‌وه‌يش له‌ماوه‌ی ئمساڵ ٤٠ مووشه‌ك كشوه‌ربڕ باليستی ئه‌را جبه‌خانه‌ی مووشه‌كه‌يلی زيای كرد.
له هه‌مان وه‌خت چه‌وه‌ڕی ئه‌وه‌يش ئه‌كريه‌يد ك وه‌زيره‌يل وه‌رگری ناتۆ له رووژه‌يل ئاينده له شار برۆكسل نه‌خشيگ فيشتر هاوپه‌يمانيه‌تيه‌گه له‌عراق تاوتوی بكه‌ن و له‌ی باوه‌تيشه‌و وه‌پرسه‌يل ئه‌مريكی باس له‌وه ئه‌كه‌ن ك چه‌وه‌ڕی ئه‌كريه‌يد له مانگ ئاينده ريككه‌فتن له‌بان ئه‌و پلانه بكريه‌يد.
ج . أ
