لە کۆنگرەی جینۆسایدکردن کورد فەیلی.. ئەو پزشکە باس وەسێدارەدان ٩ کەس لە خیزانەگەی کەێد
ئی پزشکە ک قسە کەێد، لە خیزانیگ دەوڵەمەن و ئارام بویە لە بەغداد، وەرجەیەگ لە سەرەتای هەیشتایل لە سەدەی گوزەشتە بکەفێدە وەر نەهامەتی وەگەرد هەڵمەت جینۆسایدکردن کورد فەیلی.
دکتۆر ئاغالی هویردەکاریەیل خەفەتباریگ لە خانەوادەگەی کەێد، ک ٩ کەس لەلیان کەفتنە وەر وەسێدارەدان دویای رویداو زانکۆی موستەنسەریە لە بەغداد، تا وەگەرد ئەوە، وەرز فرە سەختیگ باێدە بان ئی چینە لەناو کۆمەڵگا، وە سەرنقومکردن هەزاران لە گەنجەیلیان، و بارکردن، و سڕین رەگەزنامەی عراقی، و زەفتکردن ماڵ و داراییان، و بڕیگ لە ریکارەیل ستەمکاری وەلایەن رژیم وەرین.
دکتۆر ئاغالی لەناو کۆنگرەگە ئویشێد: ئمڕوو، ک لەوەردەم ئیوە وسیامە، نۆ لە برا و ئاموزایلم دریانەسە سێدارە، ئیرنگە ک لە وەردەم ئیوە وسیامە، تا گشت ژیانم شەکەتم، ئەرا یەکیگ لە قیزەونترین تاوانەیل میژوو عراق پڕ لە خوین نەوەیل بنچینە و نەتەوەم.
من و سەدان کەسیش جویر من، گومان لە ناسنامەمان کریا، و رەگەزنامەی عراقی لەلیمان سەنیا، و دارایی و ماڵ و ماڵداریمان زەفت کریا، ک من کۆڕ ئەوانەم ک گەنجیلیان لە خیزانیان جیاوە کریا، و خریانە ناو زیندان و چاڵ تا مردن، و تا ئیسە چارەنویس نزیکەی ١٢٠٠٠ گەنج نەیزانیمن.
وتیش: ئیمە لەوانە مەنیمنەسەو ک لەڕیشەو هەڵکەنیان و لەناو کۆمەڵگا بەدناو کریان، لەوانەگ لە کارە حکومەتی قاو دریان، و ئەوانەگ وەرەو دەیشت زانکۆیل وەشیان، و لەو خوەشکەیل فەیلیە ک تەنیا چوینکە کورد فەیلی بوینە، کەرامەتیان شکیا.
دکتۆر ئاغالی هەمیش ئویشێد: من لەوانە مەنمەسەو ک کەفتنە وەر جویراجویر ژەهر و گاز و تاقیکردن کیمیایی و بایۆلۆژی، ک لەناوبەین شەو رووژیگ، هەر ئەوە زانستیمن ک بویمنەسە سیخوڕ و خاین، هەر ئەوەنە وەخوەمان زانستیمن هایمنە دەیشت میلکانمان، و لەبان سنوور ئیران فڕە دریایمن، جویر پەنابەریگ لە رەوشیگ بەد، بەڵی، من یەکیگم لەوانە تام ئازار ئی تاوان ناشرینە وەبان مرۆیی کردگە.
وتیش: ئمڕوو لە وەردەم ئیوە وسیامە، دویای گشت ئەو وەسەرهاتە، تا خوەم لەناو کەمیگ لە خوەشبەختەیل رزگاربوی بوینم، لەوانەگ گلەوخواردن ئەرا کوردستان نازار وەدەسیان کەفت، وە مکیسیگ خانەدانی و باوگانە وەلایەن سەرۆک مەسعود بارزانی دویای راپەڕین پیرووز ساڵ ١٩٩١ و ئازادکردن خاک کوردستان لە رژیم بەعس لەناودریاگ، من ک ئمڕوو لە وەردەم ئیوە وسیامە، پزشک و ماموستام لە کولێژ پزشکی لە زانکۆی دهۆک.
ئاغالی وتیش: سەرۆک مەسعود بارزانی، من لەیە گشتی قەرزار تووم، تو بوێ ک دەروازەیل کوردستان وەبی دووچەوەکی واز کردێ، تو بوێ ک ئەو کەرامەتە گلەو داێ، ک وەشەو تاریکیگ لەلیمان زەفت کریا، و رووشنایی کوردستان لەناو تونێل جینۆساید کردیمنەدی.
هەمیش وت: ئمڕوو گلەیی گەورەیگ لەبان حکومەت فیدڕاڵی عراق دیرم، ک نەبایەت دویای ئی رووژە چەوپووشی لە تاوانەیل جینۆسایدکردن کورد فەیلی بکریەێد، ک فرە لەلیمان کوشیان و سەرگەردان کریان، لەبان بنچینە و ناسنامە، و یەیش وە شکانن زاقیگ ئەرا ماف مرۆڤ و ئەرزشەیل مرۆیی سەرەکیمان دانریەێد.
چوینکە دویای ٤٣ ساڵ لەو جینۆسایدە، هیمان لەی حکومەت داوای یەکسانی و گلەوداین ئەو مافەیلە کەیمن ک دەستور ئەرامان مسۆگەری کردگە و گشت یاسایل و ئاینەیل ئاسمانی دەسنشانی کردنە، ئیمە چەوەڕی رووژیگ کەیمن وەداد گشت قوربانیەیل بڕەسن، و کوردەیل فەیلی وە ئارامی و سەربەرزی لەناو میلکان خوەیان ژیان بکەن.
وتیش: ئمڕوو لە حکومەت فیدڕاڵ عراق داوا کریاگە مینەی روفات ئەو قوربانیەیلە لە کوردەیل فەیلی بکەێد ک دەسەڵاتیل بەعس سەرنقومیان کرد، و قەرەبوو دارایی و ماڵدارییان بکەێد، ک لە ساڵ ١٩٨٠ ەو دەس وبانیان نریاگە.
ئاغالی دووپات کرد ک دەسەڵاتەیل لە حکومەت فیدڕاڵی عراق هەمیش داوا لەلی کریاگە ماف بەشداریکردن فەیلیەیل لە کار سیاسی مسۆگەر بکەێد، هەکاتی ئەو پیکاتەیل گەل عراق، تا دەور خوەیان لە بیناکردن نیشتمانیان بڕانن، ئەو دەورە ک هەمیشە وپیان ناسیاگە، ک گونجیاگ نییە یەک کورسی لە پەرلەمان داشتویمن، هەرچەن کوردەیل فەیلی لەناو ناوچەیل فراوانیگ لە عراق بڵاو بوینە، و یەیش لەبان ئەو ستەم و جیاوەکردن و دووچەوەکیە ک کەفتە بانیان.
هەمیش داوا لە حکومەت فیدڕاڵ کریاگە وەشیوەیگ یەکسانی لە نوینەرایتی وەزارەتی بەش داشتوون، چوینکە فەیلی لە هەر شوینیگ بوود، بوودە پشت و یاوەر و بنمایەی خاسیگ لەناو کۆمەڵگا.
لە کۆتایی، ئاغالی دووارە سوپاس و رێزی وە بەڕێز مەسعود بارزانی، و نێچیروان بارزانی سەرۆک هەرێم کوردستان، و مەسرور بارزانی سەرۆک حکومەت هەرێم کوردستان پیشکەش کرد، ئەرا گشت ئەوەگ ئەرا کوردەیل فەیلی پیشکەش کردنە، و ئەرا ئی چەودیاریکردن تایبەتە وەی کۆنگرەی جەهانیە.
شەوەکی رووژ سێشەممە، لە شار هەولێر پایتەخت هەرێم کوردستان، دەسکریا کارەیل کۆنگرەی زانستی ناودەوڵەتی ئەرا جینۆسایدکردن گەڵ کورد (جینۆسایدکردن کورد فەیلی)، ک نووترین توێژینەوە و بەڵگەیل میژووی پیشکەش کریا، لەناو ئەو کۆنگرە ک تا ماوەی سێ رووژ وەردەوامە.
