لەماوەی ساڵیگ لە عراق ۱۰۰۰ مناڵ وەتۆمەت داعش دەسگیر کریایە
شەفەق نیوز/ ریخریاگ هیومان ڕایتس وۆچ، ئمڕوو جومعە، راگەیان دەسەڵاتدارەیل عراق پارەکە زیاتر لە هەزار مناڵ دەسگیر كردنە ک بریگیان تەمەن نۆ ساڵان رەدنەکردنە، وە تۆمەتەیل پەیوەندیدار وە ئاسایش نەتەوەیی، وەتایوەتی گومانكردن لە پەیوەندی داشتن وەگەرد ریخریاگ داعش.
رێکخریایەگە لە ڕاپۆرتیگ ك نەتەوەیل یەكگرتگ بڵاویکردیە هوشداری دەێد، دەستگیركردن مناڵەیل بەرزەوبۊن وەرچەویگ وەخوەیەو دیە، لەبان ئەوەیش کەمەوبۊن وەرچەویگ لە پەلامارەیل داعش دۊای لەدەسدان فرەیگ لەو ناوچەیلە لەگوزەشتە لەژیر دەسڵاتی بۊن وەرجە چوار ساڵ، ئۊشێد “فرەیگ لەو مناڵەیلە لەبان بنەمای بەڵگەی لاواز دەسگیرکریانە، رۊیوەرۊ ئەشكەنجە بۊنە تاکو دان وە تێوەگلان وەگەرد داعش بنەن”.
دیاریکرد، “بەشیگ لە دەستگیركریاگەیل وتنە جۊر چەكدار لەناو رێکخریاگە دیاریكریانە، لەکاتیگ ئەوانەیتر جۊر ئاشپەز و رانندە کارکردنە، یان تەنانەت ئەرا تەنیا چەن رووژیگ بەشداریی ڕاهێنان کردنە، بڕێگیانیش لەو باوەڕەن دەستگیركردنییان لەوەر خزمەتكردن ئەندامەیل داعش بۊیە، لەوەختیگ ئەوانەیتر لێوا دۊنن هووکار دەستگیركردنیان هەبۊن لە كەسەیل نزیک پەیوەندیداریانە وەگەرد داعش”.
راپۆرتەگەی هیومان ڕایتس ئۊشێدیش، “تۆمەت تیرۆر ئاراستەی سەرجەم ئەو مناڵەیلە کریایە، وەبی لەوەرچەوگردن ئاست تێوەگلانیان”، دووپاتیش کردیە، “فرەیگ لە تازە گەنجەیل وتنە لێكۆڵەرەیل ئەشكەنجەیان دانە تا دانوەپیدان لەیان وەرگرن، لەری دەسوەشیان وە لۊلەی پلاستیك یا كێبڵ كارەبایی یا لۊلەی ئاسن، یەیش جاروەجار ئەرا چەن ساعاتیگ وەردەوام بۊنە، تا دواجار دان نانە وە پەیوەندی داشتن وەگەرد داعش ، دۊای ئەوەگ رەسینەسە ئەو باوەڕە ک هۊچ مژاریگتر نەیرن”.
وەگورەی راپۆرتەگە، یاسای ناودەوڵەتی وەسەربازكردن مناڵەیلە یا وەكارهاوردنی وەلایەن گروپە چەكدارەیلە قەیەغەکریایە، باوجی عراق “جۊر تاوانبار مامەڵە وەگەردیان کەێد، لەبان ئەوەگ نەبۊن بەڵگە لەبان تێوەگلانیان وە تاوان قورس”.
ئەنتۆنیۆ گۆتێرێس سکرتێری گشتی نەتەوە یەکگرتگەیل داوا لە عراق کرد زاڕووەیلە ئازاد بکەێد.
ڕاپۆرتەگەی ماف مرۆڤ لە جیای دەسوەسەرکردن و دادگاییکردن ئەو مناڵەیلە گومان تێوەگلانیان وەگەرد داعش دیرێد، داوا لە عراق کردیە ک وەگەرد نەتەوە یەکگرتگەیل کار بکەێد ئەرا ئەوەگ "بەرنامەیلیان وەرەونوا بوەن ئی مناڵەیلە ئاڵشتبکەن لە کۆمەڵگەیلیان و ری وە پیان بیریەێد بچنەو ئەرا مکتەو سوود لە ژیانیان وەربگرن.
