لە ١٥٣مین ساڵیادی.. دەسەڵات چوارەم لەناو دەسدرۊژیکردن وسکاڵای ژن ئاهەنگ کەێد
شەفەق نیوز/ رووژنامەوانی عراق لە پانزەی حوزەیران گشت ساڵیگ ئاهەنگ وە جەژن نیشتمانیی کەێد، ک کەفێدە رووژ دەرهاتن یەکەم رووژنامەی عراقی (زەوڕا) لە ساڵ ١٨٦٩، لە وەختیگ رووژنامەوانەیل و رەوانگەیلیگ باس ئەو دەسدرۊژیە کەن ک خاوەن ئی پیشە لەلایەن کۆمەڵگا ویاسا وئاسایش کەفنە وری، هەمیش ژنەیلیگ رووژنامەوانی باس لە چینیگتر لە دەسدرۊژی لەبانیان کەن، وەسنگ کەلتور و رسوومەیل.
دەسدرۊژیکردن وەردەوام
وەرپرس رەوانگەی عراق ئەرا ئازادی رووژنامەوانی هادی جلو مەرعی ئەرا ئاژانس شەفەق نیوز ئویشێد: جەژن رووژنامەوانی هاتی بوودە دەرفەتیگ ئەرا ئەوەگ رووشنایی بخریەێدە بان ئەو دەسدرۊژیکردن وەردەوامە لەبان کادرەیل رووژنامەوانی ک شیوەیلیگ جیاجیا دیرێد لەلیان جارانی بوی لە ماوەی ریخریاگ داعش، وکارەیل کوشتن وبڕین، وهەمیش دەسناین وەبان ئامێرەیل، وئەو سکاڵایل دادوەرەیە لەبان رووژنامەوانەیل لە لایەنەیلیگ فەرمی و نافەرمی لەباوەت ئازادی قسەکردن، وهەمیش ئەو هەڕەشەیلە ک رەسنە رووژنامەوانەیل لەوەر شیوەی ڕایان.
ماف مرۆڤ
لەلای خوەییش، فاتن حلفی خانمە ئەندام وەرین لە کۆمسیۆن ماف مرۆڤ لە قسەیلی ئەرا ئاژانس شەفەق نیوز داوا کرد مقەیەتیکردن راسییگ لەلایەن حکومەت ئەرا رووژنامەوان عراقی لەلایەن ئازادی بڵاوکردن ورەوش ئەمنی بوود، وەگەرد گرنگی مقەیەتیکردن یاسایی وئەمنی.
سەختیەیل فرەیگ
لەلای خوەییش، رووژنامەوان سەعەد مەنسوور لە پارێزگای نەینەوا ئاشکرای زاقترین سەختیەیل لەنوای رووژنامەوانەیل کەێد، ک ئویشێد: جاروبار سەختی لە وەرگردن زانیاری دوینم ک دەستوور پاڵپشتیی کردیە ک نەبایەت تەنیا وە مووڵەت ئەمنی باێدە دەس. مەنسوور ئەرا ئاژانس شەفەق نیوز ئویشێد: هەسە ک هەمیشە وە رخ لەی پیشە کار کەێد، ک بایەتە زانیاری بوەێد و ئەندامیگ ئەمنی وەپی نەزانێد، ک جاروبار هیلێدەی دەس لە تەواوکردن باوەتەگە بشوورێد.
ژنەیل لە رووژنامەوانی دەس باڵایگ دیرن
هەرچەن ژن لە رووژنامەوانی شوین پەنجەی جیواز ودەس باڵایگ دیرن، باوجی ئەوە نییە ک ژنەیل وەبی زیان کار خوەیان کەن، ک بەرا موسەوی خانمە رووژنامەوان لە نەجەف ئویشێد: کەلتور و رسوومەیل و قەبوڵ نەکردن کۆمەڵگا لە کارکردن ژن تایبەت لە شاشەی تەلەڤزیۆن بویەسە دەسپیچگیگ ئەرا تونوتیژی زوانی ک جاروباریش رەسێدە تونوتیژی لەش، ک ریواریگ مایکرۆفۆنەگە لەدەسم سەن و وت: نەبایەت ژن لە تەلەڤزیۆن دەرچوود.
ئمڕوو، ساڵیاد جەژن رووژنامەوانی عراقیە، لە وەختیگ ک هیمان عراق لە مەترسیدارترین وڵاتەیلە لە کار رووژنامەوانی، ک لەماوەی دە ساڵ گوزەشتە دەیان لەی پیشە گیانیان لەدەسدان.
