لە لەندەن.. فیلمیگ دیکۆمێنتاری رزگارکردن پیشمەرگە ئەرا ٢٠٠٠ یەهودی لە ستەم ناو عراق توومار کەێد
شەفەق نیوز/ لەندەن پایتەخت بەریتانیا، نمایشکردن فیلمیگ دیکۆمێنتاری کریەێد، ک وایین نزیکەی دوو هەزار یەهودی عراق وەناو ناوچەیل کورد نشان دەێد، وە دەسمیەتی پیشمەرگە ئەرایان، تا لەبان سنوورەگە بچنە ناو ئیران، ئەوەیش وەرجە پەنجا ساڵ، لە وەختیگ کۆمپانیایگ دارایی نرخ ماڵداری لەناوچگ یەهود لە جەهان عەرەبی مەزەنە کەێد.
رووژنامەی "جۆیش کرۆنیکل" ئەمریکی یەهودی لە راپۆرتیگ ئاژانس شەفەق نیوز ئەڵگەردانی کرد وت: فیلمەگە باسەیلیگ لەو کاروان سەختە نشان دەێد، وەبان کویەیل هەرێم کوردستان، لە ساڵەیل ١٩٧٠ و ١٩٧١، دویای رێککەفتن ناوبەین ئیسرائیل و رژیم شاە ئیران، تا ری وە یەهودیەیل عراقی بیچارە بەێد لە عراق قورتار بوون.
ڕاپۆرتە ئەمریکیەگە ک ئاژانس شەفەق نیوز ئەڵگەردانی کرد وت: لە شەو فرە تاریکیگ واران وەردوام وارێد، هەنای پەنج کەس لە خانەوادەی (سەباح زبێدە) لەناو ماشینیگ تەکسی لە ئاوایی کوردی هاتنە خوار، و کەسیگ پیشمەرگە لەلیان پرسێد: یە لەیرا چەکەین؟، و پەنج یەهودیەگە وەپی وتن: ئیمە یەهودیمن خوازیمن بوایمن.
راپۆرتەگە وتیش: ئەو کارە لە ساڵ ١٩٧٠ بویە، هەنای سێ رووژ رەد بوین، تا پێشمەرگە توەنستن دەسمیەتی میوانە چەوەڕینەکریاگەیل بیەن، تا لە عراق وەرەو ئازادی لە ئیران بچن، ک ئەو وەختە وەدەس شاە بوی.
ڕاپۆرتەگە وتیش: دویای ئەوە خانەوادەی زبێدە رەسینە بەریتانیا، باوجی نزیکەی ٢٠٠٠ یەهودی لەناو ئەو کاروان سەختە بوین لە کویەیل کوردستان لەناو ساڵەیل ١٩٧٠ و ١٩٧١.
وەگورەی راپۆرتەگە، بەرهەمکردن ئەو فیلمە ک لە رووژ چوارشەممەی ئایندە نمایش کریەێد، وە سەرپەرشتی گرووپ (حاریف) بەریتانی ئەرا یەهودیەیل خوەرهەڵات ناوڕاس و باکوور ئەفریقا ئەنجام دریەێد، و پشت وە دیدارەیل ریخریاگ (دەنگەیل سفاردیم) یەهودی بەریتانی بەسادە.
راپۆرتەگە دیاری کرد ک یەهودەیل عراق تەنیا یەک جانتا وەدەس گردنە هەنای لە نیمەی شەو کەفتنە ری، چمای ئەرا سەیران جینە، و (ئەدوین شوکر) لەناویان بویە ک ئەو مەوقە لە تەمەن ١٦ ساڵان بویە، و یەکیگ بویە لەناو ٢٢ کەس ک لەناو ماشینیگ پیکاب کوردیگ شوین خوەیان کردنەسەو.
راپۆرتەگە باس رووژەیل وەرجە ئەوە کرد ک وت: ئەو یەهودەیلە ک لەناو عراق مەنن، شمارەیان ٣ هەزار کەس بوی، کەفتنە رووژەیلیگ دراماتیکی وەرەو گەنتر، دویای سەرکەفتن ئیسرائیل لە جەنگ ١٩٦٧.
فیلمەگە وە هاووەختی وەرد ئەوە نمایش کریەێد ک ئیسرائیل ساڵیاد پلان بەشبەشکردن نەتەوە یەکگرتگەیل لە ساڵ ١٩٤٧ کەێد، ک ئەوەیش لە بنەمای یاسای کنیست ساڵ ٢٠١٤ دەرچگ، ک خوەینیشاندان و کارەیل ئاژاوە دژوە یەهود لە دەوڵەتەیلیگ عەرەب دەرچگ، ک هیشت ٨٥٠ هەزار یەهودی بار بکەن.
راپۆرتەگە لە کۆتایی وت: زنیکردن ساڵیاد ٣٠ تەشرین دویەم، رووشنایی خەێدە بان گرنگی وەرگردن واژوو ناودەوڵەتی وە زیان ئەو یەهودیەیلە ک واینە، وتیش: کۆمپانیایگ ناودەوڵەتی ئەرا ژمێریاری دارایی، ئیسە مەزەنەی ئەرزش ماڵداری لەناوچگ یەهود لە جەهان عەرەبی کەێد، ک تەگبیرە وەینزیکە ئەنجامەیلی راگەینێد.
