لە رووژ جەهانییان.. نیم مناڵەیل عراق بوینەسە قوربانی بازرگانیکردن وبیبەشی
شەفەق نیوز/ مناڵی عراق لە رووژ جەهانیی، کەفێدە ناو بیبەشی ونەداری وئاوارەیی وکاکردن وسەربازکردن وەگەرد بازرگانکردن وەپیان، ک عراق کەفتە ناو ئەو ١٠ دەوڵەتە ئەرا ژیان مناڵەیل جەهان، وەگورەی راپۆرتیگ لەلایەن ریخریاییگ جەهانی.
راپۆرتیگ نەتەوەیی لەلایەن ریخریاگ "وورد فیجن ناودەوڵەتی" ئەرا مقەیەتیکردن مناڵ وت: رەوش ئابووری بەد لە عراق وەگشتی بویە هووکار بەرزەوبوین ئاست نەداری ناو مناڵەیل تا بڕەسێدە ٤٠% وهوشدای لە زیایبوین تونوتیژی لەبان مناڵەیل کرد، و بیبەشی نزیکەی ٧،٤ مەلیۆن زاڕوو لە ماف خوەنستن.
نەجیر کاکەیی چالاکوان شارەزای باوەتەیل مناڵی لەی باوەتە ئەرا ئاژانس شەفەق نیوز وت: ئاست نەداری ناو مناڵەیل رەسێدە ٦٠% ک زیاترو لەوەگ لە راپۆرتەگە ئاشکرا بویە، و ١٥% لەی ئاستە هالە هەرێم کوردستان، و ١٠٧٥ مناڵ لە هەرێم کوردستان کار کەن، و نزیکەی ١٠% یان کەفنە وەر تونوتیژی، ویەیش ئاست گەورەیگە.
کاکەیی وتیش: بڵاوبوین تونوتیژی، نەمان پەنایل ئارام، ونەوین پویل ئەرا وەرگردن تووڕ چەودیریکردن کۆمەڵایەتی، و لەدەسچگن باوگ یا داڵگ یا چەکیان خیزانەگە، و زیایبوین تەڵاق و بارکردن زوورکاری، یە گشتی هیشت مناڵەیل بکەفنە گەیاکردن و کارە سەختەیل.
حەسەن حەمید (زاڕوویگە یە ٨ ساڵە لە سەڵاحەدین ئاوارە بویە) لەناو بازاڕ سەوزە لەسلێمانی گوزەران کردیە، وت: دەرفەت کاریگ نییە وەگەرد توانای مناڵەیل بپووڕێد، تایبەت ک رەوشەیل ئاوارەبوینی ناچاریان کرد واز لە مەکتەو بارن، وپەنا وەمەیدان کارکردن بوەن.
حەمید ئەرا ئاژانس شەفەق نیوز وت: فرەی باوانەیل ئی زاڕووەیلە پیرن وتوانای کاریان نەمەنیە، ونیەتوەنن خوازینەیل خوەنەواری ئەرا رووڵەیلیان پەیا بکەن.
شمارەی یەتیمەیل لە ماوەی ساڵەیل دویایین لەعراق فرەوە بوی، ئەوەیش لەوەر ئەو جەنگەیل وکارەیل تونوتیژیە، تا وەگشتی لە پەنج مەلیۆن رەد بکەێد، و فرەی ئی مناڵەیلە کەفتنە رەوشەیل سەختیگ.
لە ١ حوزەیران، هەر لە ساڵ ١٩٥٠ تا ئمڕوو، ئاهەنگ وە رووژ ناودەوڵەتی ئەرا مقەیەتیکردن مناڵەیل کریەێد، و یەکێتی ژنەیل دیموکراتی ناودەوڵەتی لە گۆنگرەی ساڵ ١٩٤٩ لە مۆسکۆ ئاهەنگ وەی رووژە دروس کرد.
