لە جەنگ ئەوروپا.. گشت چشتیگ کریەێدە خەوەر

لە جەنگ ئەوروپا.. گشت چشتیگ کریەێدە خەوەر
2022-03-06T09:08:32+00:00

شەفەق نیوز/ "خوەش هاتێ لەناو سیستەم راگەیانن جەهانی کۆنە و نوو"، هەرچە ک وە رۊداویگ ئاسایی لە وەخت ئاشتی کریەێد، بوود بکریەێدە خەوەریگ ک ئەرا بڵاوکردن لە مەوقەی جەنگەگەی خوەرهەڵات ئەوروپا ناوبەین رووسیا و ئۆکرانیا گونجیەێد،  باوجی مەرجەیل خەوەرەگە جۊر: (هۊردی و راسی و باوەتدار و دەسپاکی) شایەت بکەفێدە پلەی خوارتر وەرانەوەر زۊ بڵاوبۊن و ئایدۆلۆژیای دامەزراوەگە، و لەناوی مەرجەیل "هەڵسەنگاندن خوەیەتی و یەکلایەنی کەسایەتی" تیکڵا بوون، تا تو بخەێدە ناو "قەیران میژوو " هەکاتی قسەیل پەیامنێر یەکیگ لە کەناڵەیل ئەمریکی هەنای بەراودری لەناوبەین "شارستانی عراق و ئۆکرانیا " کرد، وەرجەیە داوای وەخشین بکەێد، دۊای شەپۆلیگ لە سووکایەتی وە نەزانستنی لە میژوو.       

دڵنەرمکردن  وە خەوەر     

دەوڵەتەیلە میدیایل راگەیانن جۊر یەکیگ لە دەمودەسەیل دیبلۆماسی و سیاسی دەیشتەکی وەکار هاوردن، ک خوەی دەمودەسیگە ئەرا هێز وبیهێزی وڵاتێگ، باوجی دەوڵەتە پیشکەفتگەیل وەزوان خوەیان ئەرا گەلەیل قسە کردن تا پەیامەیل خوەیان لە مەوقەیلیگ گونجیاگ ئەرا خوەیان کلکردن تا وەرەو خوەیان بکێشنەیان، هەکاتی ئەوەگ کەناڵەیلیگ ئەمریکی و ئەوروپایی ئەرا وڵاتەیل جهان  و عەرەویش کەن. لە ئەنجام، ئی میدیایلە لەژیر چەن ناونشانیگ "دڵنەرمکردن" رینماداریگ لەلای گەلەیل باوەو کردن، جۊر بڵاوکردن ووشەی "جەنگ پوتین " هەنای باس جەنگ رووسیا لە ئۆکرانیا کریەێد، و سیمایل "ویرانی و گیرستن وژان" ئەرا خیزانەیل ئۆکرانیا تا هەس وە "ستەم" هێزەیل رووسیا لە جەنگەگە قۊلەو بکەن.      

میدیایل راگەیانن رووسیا،  وەرانوەر ئەوە، باس ئەو کارە وە "ئۆپراسیۆنیگ سەربازی تایبەت" کردن، و رکدار بۊ ک وەشیوەیگ قسە ئەرا تەماشاکەرەیلە بکەێد گوایە رووسیا "پەلاماردەر" نییە، و وەیەوە ئی میدیایلە هۊردەکارەیلیگ نشان دەن "شایەت ئاسان بوون" باوجی لە رۊ راگەیانن شایەت شیوەی کارەگە ئاڵشت بکەێد، و شیوەیگ جیوازتر نشان دەێد.    

زاقترین ئەو چشتەیلە ک میدیایل راگەیانن خوەرئاوایی لەبانی زوور کردن خوەی "گیرستن" وەرگێڕانکاریگ ئەرا سەرۆک ئۆکرانیا بۊ هەنای داوای چگنی وەناو یەکێتی ئەوروپا لە پەرلەمان ئەوروپا کرد، ک وەرگێڕانکارەگە خوەی بۊە رۊداوەگە و لە خود سەرۆک ئۆکرانیا فرەتر دڵنەرمی جەهانی ئەرا خوەی کیشا، ک نشان کردەوەیل لە ناو مەیدان جەنگ وەگورەی تێبینی ئەمریکی- ئەوروپایی دا.     

هۊردەکارەیل ئاسانیگ خەوەرەگە یەکلاوە کەێد     

وەرپرسەیلیگ رووس و کەناڵەیلیگ راگەیانن رووسی، داد لەدەس چشتیگ کردن ک وەپی وتیان "ستەم" خەڵک ناوچەی قرم ک ئیسە هالە ژیر دەسەڵات رووسیا،  ک گوایە خەڵکەگەی زیان لە نەتەوەگرایەتی ئۆکرانی وەخوەیان دیان، ک خوەرئاوا هۊر و سزای لەلای ئەوە نەۊیە.. و رووسیا ووشەی "نازیە نووەیلە" زاقەو کەێد ک وەپی نوقڵانە لە سەرۆک ئۆکرانیا وحکومەتی دەێد، تا وەیەوە میدیایل راگەیانن رووسیا باس لە مکیسکردن هەرلە (پاکستان و چین و ئیمارات و سعودیە  و ئازەربایجان و ئۆزبەکستان و هیندستان و ئەسیوبیا) و دەوڵەتەیلیگ تر بکەێد، ئەرا ئامادەبۊن لە "کۆنگرەی دژایەتی فاشیزم " لە مانگ ئاب ئایندە.     

وەرانوەر ئەوە، خوەرئاوا زوور وەبان هۊردەکاریەیلیگ تر تیارێد، هەکاتی "کار دانیشتگەیل لە دروسکردن بومبەیل مولوتۆف" ئەرا نواگردن " رووسیای داگیرکەر"، لە هۊردەکارەیلیگ ئەوە چسپنێد ک ئۆکرانیا "کەفێدە وەر ستەم" لە لایه‌ن هێزیگ ئەتۆمی،  و دیداریگ رووژنامەوانی لەلاێەن دامەزراویگ راگەیانن ئەمریکی هۊردەکارەیل دیداریگ وەگەرد سەرۆک ئۆکرانیا نشان دەێد ك وت: "ئیسە دڵنگ نیمچە سەربازی کردیەسە وەر و هالە شۊنیگ پڕ لە خوەڵ" و دیاری کرد ک "دۊاترین دیدار زیلینسکی ئەرا خیزانەگەی وەرجە جەنگەگە بۊە".         

وهەمیش وە "چەو قڕپانیگ" یا "نشانەیگ" ئەوروپایی ک رووسیا هیمان شیوعیە، و ئەوروپا نموونەیگ "مەسیحیە" کەفێدە وەر جەنگیگ لە "پوتین شیوعی"، ک یەکیگ لە کەناڵەیل ئەمریکا زەنگ کوتیان لەلای گومەزی بەرلین لە کلیسەی یادوەری تا ماوەی ٧ خولەک نشان دا، ک هەر یەک خولەک لەلی جۊر رووژیگە ئەرا جەنگ رووسیا لە ئۆکرانیا، هەمیش لە کاتیدرایەی نۆتردامیش لە پاریس ئه‌ڕا پشتگیریکردن له‌ ئاشتی زەنگەیلە کوتیان.      

پیت Z   رووسی       

مەزەنەیل فرەیگ لەباوەت پیت (Z) لەبان ئامێرەیل سەربازی رووسیا و تانکەیلی لەمەوقەی هاتنیان وەرەو ناو ئۆکرانیا کریا، وه‌تایبەت ک ئەو پیتە لەناو شیوەیل نۊسانن زوان رووسی نییە، و یەکیگ لەو مەزەنەیل ئەوە بۊ ک "پیت یا نشانە" رووسیەگە وەخاتر ئەوە کریاگە ک ئامێرەیل رووسیا لە ئۆکرانیا بناسیەن، وه‌تایبەت ک رووسیا پەرچەم وەبان ئامێر و ماشین و تانکەیلی لە جەنگ ئۆکرانیا نێنەێد، و مەزەنەیگ تر باس کرد ک ئی نشانە ئامادەباشی سوپای رووسیا ئەرا جەنگ ئاشکرا کەێد، و مەزەنەی تریش وت" ئی نشانە یا ئی پیت رووسیە ئۊشێد ک سوپا تەنیا وە سەرکەفتن لە ئۆکرانیا دەرچوود.     

ئەو پیتە، هۊرمان وەرەو لای میژوو و نشانەی سەرکەفتن بەێد، هەنای سەرۆک وەزیرەیل بەریتانیا وینستون چیرچل نشانەیگ دروس کرد ک ئیسە وە دەس دڕاکردن ئەرا سەرکەفتن  بەرزی کەیمن ، دۊای ئەوە ک نووڕست هاوپەیمانەیل لەندەن رێککەفن ک پیت (V) ک لە ووشەی (VICTORY) "سەرکەفتن" بریاگە، ئەراوە دوو کلگ بەرزەو کرد تا جۊر ئەو پیتە نشان بەێد، تا دۊای ئەوە بوودە ئەو نشانەی سەرکەفتنە ک ئمڕوو زانیمنەی.

Shafaq Live
Shafaq Live