قەیران نەفت لە سلێمانی: لەناو پەیمانەیل حکومەت و چارە نەکردن
شەفەق نیوز/ خەڵک سلێمانی بیزاری خوەیان لەوە نشان دەن ک تا ئیسە نەفت چەرمگ وەپیان نەڕەسیە، لەوەختیگ چالاکوانەیلیگ ژینگەیی هوشداری لە رۊیکردن خەڵکەگە ئەرا دار بڕین دان، جۊر جیگریگ لەجیای نەفتەگە.
ئیدارەی سلێمانی لە وەختیگ گوزەشتە راگریان پارێزگاگە ٢١ مەلیۆن لەتر نەفت چەرمگ کەفتە دەسی، ئەوەیش دۊیای رێککەفتن ناوبەین وەزارەت نەفت فیدراڵی وەگەرد حکومەت هەرێم کوردستان، و باس کلکردن ٥٠ مەلیۆن لەتر ئەرا پارێزگایل هەرێم کەێد.
بیزاری جەماوەری
حاجی ئەحمەد یەکیگە لە خەڵک سلێمانی ئەرا ئاژانس شەفەق نیوز ئۊشێد: یە ماوەیگە خەڵکەگە سۆپە وەکار تیارن وخوەیان هانە ناوچەیل کۊیە بەرزەیلە، باوجی تا ئیسە حکومەت نەفتەگە بەشەو نەکردگە.
وەرجەیە هەڤاڵ ئەبوبەکر پارێزگار سلێمانی لە ٨ تەشرین دۊیەم گوزەشتە، لە کۆنگرەیگ ئاژانس شەفەق نیوز ئامادەی بۊی وت: وەزارەت نەفت فیدراڵی، بڕیار دا ٥٠ مەلیۆن لەتر نەفت چەرمگ ئەرا هەرێم کوردستان کل بکەێد.
حاجی ئەحمەد هەمیش ئۊشێد: رخمان لەوە چوود هەکاتی پارەکە، تا دۊیای زمسانیش نەفتەگە بەشەو نەکریەێد.
و باس لە ئومید خوەی کرد ک وەنزیکترین وەخت نەفتەگە بیەن، چۊنکە یە ماوەیگە مەردمەگە سۆپە خەنەکار، و ناچار بۊنە لەجیای نەفت پەنا وە داربڕین بوەن.
هووکارەیل قەیرانەگە
لەی مەوقە، کەریم عەلی ئەندام دەسەی وزە لە ئەنجومەن پارێزگای سلێمانی قسە ئەرا ئاژانس شەفەق نیوز کەێد، ک هووکارەیل قەیرانەگە هالە ئەوە ک هەرێم کوردستان بەش خوەی لە نەفت چەرمگ لەبەغداد نەوردگە، ک هەرێم کوردستان ٢٥٠ مەلیۆن لەتر خوازێد، و بەغدادیش تەنیا ٥٠ مەلیۆن لەتر کلکەێد، یەیش هیلێد هەر پەنج خیزان لە وەرز زمسان تەنیا یه‌ك بەرمیل وەدەسیان بکەفێد.
و ئۊشێد: وەزارەت سامانە سروشتییەیلە لە هەرێم کوردستان لەوەر قەیران دارایی هەر لە ساڵ ٢٠١٤ بەشەوکردن نەفت چەرمگ ئەرا خەڵکەگە وسان.
سەرچەوەیگ چەودێر ئەرا ئاژانس شەفەق نیوز وت: پارێزگای سلێمانی و ئیدارەی راپەرین لە ٥٠ مەلیۆن لەترەگەی وەزارەت نەفت فیدراڵی ٢١ مەلیۆن و ٥٠٠ هەزار لەتر نەفت چەرمگ کەفێدە بەشی، و ١٥ مەلیۆن و ٨٠٠ هەزار لەتر کەفێدە بەش پارێزگای هەولێر، و ٥ مەلیۆن و ٢٥٠ هەزار لەتر ئەرا پارێزگای هەڵەبجە، و بەش پارێزگای دهۆک بوودە ٧ مەلیۆن و ٩٠٠ هەزار لەتر.
کەریم باس ئەوەیش کەێد ک بەش سلێمانی وەگەرد ئیدارەی گەرمیان و ڕاپەڕین لەو بڕە ک بەغداد کلی کەێد بوودە ٢١ مەلیۆن لەتر، لەوەختیگ سلێمانی زیاتر لە ١١٠ مەلیۆن لەتر نەفت چەرمگ خوازێد. یەسە ک بۊیە قەیرانیگ لە بەشەوکردن نەفتەگە ئەرا خیزانەیل، ک خیزانەیلیگ هەس یە دوو ساڵە نەفت چەرمگ وەپیان نەڕەسیە.
چارە چەس؟
کەریم داوا لە حکومەت هەرێم کوردستان کرد چارەی گونجیاییگ ئەرا قەیران نەفت چەرمگ پەیا بکەێد، یا لەڕی پاڵاوگەیل هەرێم، یا لەڕی رێککەفتنیگ وەرد بەغداد تا بەشیگ ئەرا هەر هاووڵاتییگ لە هەرێم دابین بکەێد.
خەڵک هەرێم کوردستان یە چەن ساڵیگە، و گشت ساڵیگ لەی مەوقە کەفنە وەر گیچەڵ گرانی سوتەمەنی لە بازاڕەیلە، و هەر ساڵیگ دەسەڵاتەیلە پەیمان چارەکردنی دەن، باوجی قەیرانەگە ئەرا ئی ساڵەگەی تر فرەترەو بوود، تا ئمساڵ بۊیە گیچەڵیگ ک چارەکردنی وەی نزیکە دیار نییە.
