کەفتن مووسڵ.. لە زوان کەسەیلیگ لەناو ئەو کەلەمە بوینە: پیلانیگ بوی!
شەفەق نیوز/ خەڵک مووسڵ ک کەفتن شاریان وەدەس ریخریاگ داعش ورجە ٨ ساڵ وەچەو خوەیان دین، هیمان باس کەن ک پیلانیگ لەو کارە بویە.
وەچەودیەیلیگ ئەرا ئاژانس شەفەق نیوز باس شکست هیزەیل سەربازی وئەمنی لە ١٠ی حوزەیران ٢٠١٤ کردن، ک شارەگە هیشتنە جی، تا سێ ساڵ بکەفێدە دەس داعش، وزیان لە کوشتن وویرانی وەخوەیان بوینن.
سەردەم تاریکی و تاوانەیل
مام هەدال زوهێری ک یەکیگە لە خەڵک ناوچەی زنجیلی لەلای راس مووسڵ، ئەرا ئاژانس شەفەق نیوز باس چگن شارەگە وەرەو ناو سەردەمێ لە تاریکی و تاوانەیل کەێد، دویای ئەوە ک کەفتە دەس داعش.
ئویشێد: تەقیان تانکەریگ نزیک هوتێل مووسڵ، تەنیا سەدان مەتر لە ماڵەگەی دویر بوی، وئەو کارە بویە دەسپیچگیگ تا لەو شارە بواێد، وخەڵکەگەی لەنوای قەپ تیرۆر بیلێد، وتیش: گشتی زانێد ک گشت چشتیگ وەرجە کەفتن مووسڵ وە ٥ رووژ خراو بوی، ولە رووژ نۆی حوزەیران وەیەکجاری رمیا، ولە ١٠ی حوزەیران گشت چشتیگ تەواو کرد.
هەمیش ئویشێد: تا ئیسە بڕوا نیەکەم ک مووسڵ کەفت، باوجی فەرمان چووڵکردنی هات، ویەیش پیلانیگە، وکەسیگ بڕوا نیەکێد ک دووسەد یا سێسەد لەداعش بتوەنن شکست وە سێ فیرقەی سەربازی وە چەک وئامێریان بارن.
هەدال هویرمان خوەی گلەو دەێد، هەنای ئەندامەیل پۆلیس فیدراڵی بارەگای فەوجەگە چووڵ کردن، ک ١٠٠ مەتر لە ماڵەگەی دویرە، وەبی هویچ بەهانەیگ، وهەنای لەلیان پرسێد: ئایا ئەرا کوو چین؟ وتن (مامە کارەگە تەواو بویە وتەنیا ئیمە لەیرا مەنیمنە).
هەدال ئوشێد من سەرسام بویم وەی قسەیانە، و زانستم ک چشتیگ روی دەێد وئی قسە وەرجە تەقیان تانکەرەگە لە نزیک هوتێل مووسڵ بوی، ئیوارەی نۆی حوزەیران، ودویاجار گشت چشتیگ دیار دا.
هەدال باس لەو رووژەیلە کەێد ک ئویشێد ئەوە تەنیا نوای کارەگە بوی، ک ساڵەیل زیاندار وسەختیگ گوزەرانی کردن، ک تا رزگارکردن شارەگە لە ساڵ ٢٠١٧ تەواو نەوی.
هەدال دیاری کرد ک باج ئازادییان هەزاران قوربانی بیگوناه بوی ک ئامووزا وهاوسایلی لەناویان بوی، ک شمارەیان لە ١٠٠ قوربانی رەد کرد، لە کوشتار کارخانەی پیپسی کوشیان، هەنای مەوقەی رزگارکردنەگە تەقەلای واین دان.
داوای سزاداین وەرپرسەیل
چالاکوان سیاسی سەعەد وەزان ئەرا ئاژانس شەفەق نیوز ئویشێد: یادکردن کەفتن مووسڵ ئەوەسە ک باس دویەم گەورەترین شارەیل عراق و گرنترین شارەیلی لەروی میژوو و جوگرافیا وئابووری کەێ، ویەیش باسیگ لە سزادان ئەوەگ دەسی لەناو کەفتنی بویە خوازێد وەگەرد هەرکەس لە وەرپرسایەتی وەرگری لەلی وایە، باوجی تا ئمڕوو لەبان گەورەترین شکست ئەمنی لە میژوو عراق سزا نەدریاگە، وهیمان بەشیگ لەوانەگ دەسیان لەناو کەفتن مووسڵ بویە هانە کار سیاسەت خوەیان و پۆست بەرزیش دیرن.
ئەحمەد وەلید ئەرا ئاژانس شەفەق نیوز باس زەرەدەیل شارەگە کەێد هەرلە ساڵ ٢٠١٤ تا رزگارکردنی، ک وت: دەیان هەزار قوربانی لەدەسمان چی، و میراتی دەیان کۆمەڵە قەور بویە بەشمان، وجەنگەگە خەسەخانەیل گەپیگ ئەرامان هیشتە جی ک ئاوەدان نەکریانە، وهیمان شارەگە تەنیا سێ پیەڵ کردیەسە گووچان دەسی، وتا ئیسە کار لە دوو پیەڵ کەن ک هیمان تەواو نەویە.
ئویشێدیش: خو قەرەبوو، تەنیا ١٠ هەزار کەس لەناو ١٠٠ هەزار کەس فایەلیان تەوا کردنە قەرەبوو کریانە، و کار ئاوەدانکردن زەرەدەیل کەفتن مووسڵ فرە دیر کەفتیە، ک مووسڵ لەلای کەمەو دەیان ساڵ خوازێد تا وەنیمەی خوەی جویر وەرجە ٢٠١٤ باێدەو.
لەباوەت دیرکەفتن ئاوەدانكردن وەشیوەی گشتی، رەعەد عەباسی قسەکەر فەرمی لە پارێزگای نەینەوا ئەرا ئاژانس شەفەق نیوز وت: دیرکەفتن ئاوەدانكردن دویای رزگارکردن شارەگە لەوەر نەوین ئارامی لەناوی بوی، وه‌تایبەت ئارامی سیاسی و شیواشیو و ژاوەژاو لە وەڕیبردن باوەت ئاوەدانکردن، باوجی ئمڕوو پلان ئاشکرایگ ئەرا ئاوەدانکردن شارەگە هەس، وگرنگی لە ئاوەدانکردن پیەڵەیل ودابینکردن خزمەتگوزاری، وکار لە فڕۆکەخانەگە وەردەوامە.
وتیش: بەشیگ لەو پڕۆژەیلتر جویر ئاوەدانكردن خەسەخانەیل ئەوانە پڕۆژەیل وەزارەتەیل سەروەریین و وەزارەت تەندروسی وەرپرسایەتی خوەی لە دیرکەفتنی هەڵگرێد.
وتیش: ئمڕوو حکومەت نەینەوا پلان ئەرا گلەوداین پارێزگاگە ئەرا خاستر لە ساڵ ٢٠١٤ دیرێد، ودویای مەرەقەزکردن پویل هشکەوکریاگ نەینەوا ئەوەسا ئاڵشتبوین ئاشکرایگ لە ئاست خزمەتگوزاری وپڕۆژەیل لە گشت پارێزگاگە و مووشل ناوەندی کریەێد.
١٠٠ ساڵ وەرەو دویا
عەبدولقادر دەخیل وەڕیەوبەر جیوەجیکار دەسەی باڵای ئاوەدانكردن مووسڵ ئەرا ئاژانس شەفەق نیوز وت: دەسەگە وە هەماهەنگی وەرد حکومەت خۆجێی وحکومەت بەغداد توەنست پویل هشکەوکریاگ نەینەوا لە ماوەی داگیرکردنی وەدەس بارێد، وئەوەسا گشتی ئەرا جیوەجیکردن پڕۆژەیلی خەرج کریەێد.
هەمیش وت: پارێزگاگە ٤٥ پڕۆژە لەلیان راگەیان، و لەباوەت گرنگترین پڕۆژەیل ئی دەسە خوەی گلەوداین ئاوەدانکردن روی چەم شار کۆنە، ودروسکردن نیمچە پێەڵەیلیگ لە هەردوگ لای مووسڵ، وەگەرد فڕۆکەخانەگە ک لەبان گشت ریگرییگ کار لەلی کریەێد.
دەخیل وتیش" ئەو پویل هشکەوکریاگە رەسیە نزیکەی ٤٠٠ ملیار دینار عراقی، وتەقەلا دەیمن ک مووسڵ بوودە شاریگ ک روخسار جەنگ لەناوی نەمینێد، وتیش: ئەو ویرانکردنە ک نەینەوا وەگشتی کەفتە وەری نەگ مووسڵ فرە گەورە بوی، و تا ١٠٠ ساڵ وەرەو دویا گلیەو دا، و دووارە لە نووەو دەسوەپی کرد، باوجی گلەوخواردن وەشیوەیگ رەنگینتر لە جاران تەنیا وەخت خوازێد.
