شاجوان وەرین عراق نزیکە بچوودە ناو کۆنگرس ئەمریکا.. سارا عیدان کییە؟
وە ئەو دوو موسڵمان ئەمریکییە، ئیلهان عومەر و رەشیدە تاڵب، ئەرا سێیەمجار لە هەڵوژاردن ناوڕاس خول ئەنجومەن نویەنەرەیل ک لە 8 تشرین دویەم 2022 وەڕیەو چگ، سەرکەفتن هاوردن.
سارا هەڵمەت هەڵوژاردن ئەرا کاندیدکردن دیموکراتەیل لە ناوچەی 30 لە کالیفۆرنیا دەسوەپی کرد، دویای ئەوەگ داواکارییەیلی پیشکەش وە کۆمیسیۆن هەڵوژاردن فیدراڵی کرد.
رووژنامەی "ئەلگامینەر" ئەمریکی وت؛ سارا عیدان کاغەزەیلی پیشکەش وە کۆمیسیۆی هەڵوژاردن فیدراڵی کردگە و وە فەرمی بویەسە کاندید ئەرا نویەنەرایەتیکردن ناوچەی 30 لە کالیفۆرنیا لە ئەنجومەن نویەنەرەیل.
سارا وە ڕووژنامەگە وت: ئەگەر سەرکەفتن بارێد، بوودە یەکەم کووچبەر و "سەهیۆنی موسڵمانیگ عەلمانی" لە میژوو ک ئەرا ئەو ئەنجومەنە هەڵوژیەێد. و وت گوایە " کاندیدیگ خاستر لە من نییە ک بتوەنێد نویەنەرایەتی گروپە کەمینەیل بکەێد، چوینکە من کووچبەرم، ژنیگ موسڵمانم و بنەچینەم خەڵک عراقە، وڵاتیگ ک ڕاستەوخۆ کاریگەری سیاسەتی دەیشت ئەمریکا هابانی".
کاندیدە تەمەن 33 ساڵەگە وتیش: وەدڵنیاییەوە دەنگ من دەنگ کەمینەس، و هەس کەم دەنگیگ عراقی لە کۆنگرس خوازیاگە".
ژیاننامە
سارا عیدان لە ساڵ 1990 لە بەغدای پایتەخت عراق لەداڵگبویە، و دویەم بویچکترین پەنج خوەشک و براس.
هەناێ تەمەنی رەسیە هەژدە ساڵ، خوەیوەخشانە کار وەگری لە سوپای ئەمریکا کرد، و دویای دوو ساڵ روی کردە ئەمریکا و لە ساڵ 2015 بویە هاووڵاتی.
باوگی ک لە ئەنجام تووشبوین وە ڤایرۆس کۆرۆنا گیانی لەدەسدا، ئەندام حزب بەعس عراق بویە، هەرلیوا جویر ئەفسەر ئەندازیار لە سوپا کار کردگە.
وەرگریکردن لە ئیسرائیل
سارا عیدان سەرۆکایەتی ریخریاگ "مرۆایەتی ئەرا نوا" کەێد، ک وەپەی ماڵپەڕەگەی خوەی ناسنێد، ئامانج "دروسکردن پیەڵیگ ناوەین موسڵمانەیل و یەهودیەیل ئەرا رەدبوین لە سنوورەیل و گاڵداین ئاشتەوایی و وەخشین و لەیەکڕەسینەوە وەیەکەوژیان ".
هەرلیوا میوانداری پۆدکاستیگ بەرنامەی گفتوگۆ کەێد، و لە ساڵ 2019 لەلایەن چەودیاری نەتەوە یەکگرتگەیل جویر باڵیۆز ئاشتی دەسنیشان کریا.
رووژنامەیەگ یەهودی سارا عیدان وە پاڵەوان ئیسرائیل باس کرد.
لە چوارچیوەی میدیایی ئیسرائیلی وەرانوەر عراق، ریخریاگ چەودیاری نەتەوە یەکگرتگەیل سویسری-یەهودی، سارا عیدان شاجوان وەرین عراقی وە باڵیۆز ئاشتی ناسان، یەیش دویای هەڵوێستەلی لە بەرژەوەنی ئەو قەوارە.
سارا لە ساڵ 2017 نویەنەرایەتی عراق کرد لە پێشبڕکێ شاجوانی جەهان، لەو ماوە وینەیگ سێڵفی وەگەرد شاجوان ئیسرائیل، ئادار گاندلسمان گرد، یەیش بویە مدوو هەڕەشەکردن ک خوەی و خیزانەگەی ناچارکرد لە وڵاتەگە دەرچن، وەتایبەت دویای ئەوە ک لەبان ئەو کارە رەگەزنامەگەی پویچەڵ کریا.
لە چەوپیکەفتنیگ رووژنامەوانی وەرین داوا لە عراق کردوێد ئاشتی وەگەرد ئیسرائیل دروس بکەێد.
لە مانگ شوبات ساڵ گوزەشتە، رووژنامەی ئۆرشەلیم پۆست ئاشکرا کرد ک سارا عیدان شاجوان عراق لە ساڵ 2017، پەلامار کۆنفرانسیگ لەلایەن یەکێتی خوەنەوارەیل سیاسی پشتگیریکردن فەلەستین کردگە، دژوە وەردەوامی دەسەڵات ئیسرائیلی.
رووژنامەگە لە راپۆرتەگە وت: سارا پەرد بویەسە ناو کەمپ زانکۆی UCLA لە کالیفۆرنیا و چیەسە ناو هۆڵ کۆنفڕانسەگە ک گردەوبوین نیشتمانی خوەنەوارەیل فەلەستین کۆنفرانس ساڵانەی خوەیان ساز کرد، و داوای کۆتاییهاوردن وە داگیرکاری ئیسرائیل کەێد، و داوای وسیانی کرد.
وتیش؛ ڕێکخەرەیل کۆنفرانسەگە داوا لە ئاسایش کردنە سارا پچوودە دەیشت بیناگە و پەیوەندی وە پولیس کردگە، وەرجە ئەوەگ پەنا وە تووڕە کۆمەڵایەتییەیل تویتەر بوەێد ئەرا پەلامارداین ریخریاگ خوەنەوارەیل و توومەتبارکردنیان وە "دژە یەهودیەت و دروسکردن خوسە و کینە".
لە وەختیگ ک سارا لە ئەمریکا داکاسیاگە، خیزانەگەی چینەسە وڵاتیگ عەرەوی ک "پەیوەندی فەرمی وەرد ئیسرائیل دیرێد".
پرۆگرام شاژن جوانی وەرین، رووشنایی خەێدە بان پرسەیل کۆمەڵایەتی و ئابووریی ناوخوەیی هاووەخت لە روی سیاسەت دەیشت لە رۆڵ قایمکردن پەیوەندییەیلی وەگەرد ئیسرائیل، کە وەیەکیگ لە هاوپەیمانە راستەقینەیلە ک پاڵپشتی ئەمریکا کەێد و هەمان ئایدۆلۆژیا دیرێد.
سارا عیدان ئامانج خوەی ئەرا نواگیری خوەسهاتن لە ئیسرائیل لە ئەنجومەن نویەنەرەیل ئەمریکا دانەێد.
