شەفەق نیوز باسیگ لەو شارە کەێد ک نیەخەفێد.. خزمەت موفتیگ ئەرا گەورەترین گردەوبوین مەردم لە جەهان
شەفەق نیوز/ "ئەو شارە ک نیەخەفێد" ئەو ناوە بڕیا باڵای شار کەربەلا ک گەورەترین گردەوبوین مەردم لە زیارەت چلەی ئیمام حسێن گرێدە خوەی، ک خەڵک شارەگە و دەسەیل خزمەتگوزاری کەفنە پیشکەشکردن خزمەتەیل موفتیگ ئەرا زیارەتچیەیل.
توانای رەسین ئەرا هەر جادەیگ سەرەکی یا گەڕەکیگ لە شار کەربەلا نییە، وەبی ئەوەگ چەود نەکەفێدە بڕیگ کەس و ماشین لەناوی گەردن، وەگەرد ئاشخانە وبازاڕەیل و ئەو شوینەیلە ک وە واز مینن، هەمیش ماشینەیل هامشوو ک لە گشت شوینەیل شارەگە لە گشت رووژەگە وەردەوام کار کەن.
میلاکەیل خزمەتگوزاری و ئەمنی لە شار کەربەلا کەفتنەسە ئامادەباشی تەواوی و گشتگیر، و پلان وئامادەکاریەیلی ئەرا پیشوازیکردن لە مەلیۆنا زیارەتچی تەواو کەن، وەگەرد پیشکەشکردن چەن خزمەتگوزارییگ لەناو شارەگە و لەبان ری " یا حوسەین" ک کەفێدە بان ری نەجەف، بابل، حسێنیە و بەغداد.
عەتەبەی حوسەینی لە شار کەربەلا، مەزەنە کرد شمارەی زیارەتچیەیل چلەی ئمساڵ بڕەسێدە بیس مەلیۆن کەس لەناو و دەیشت عراق، ئەراوە شارەگە شەو و رووژ وەردەوامە لە ئامادەکاریی ئەرا زیارەت چلەی ئیمام حسێن.
ئی شمارەیل گەپە لە زیارەتچیەیل، دەسمیەتی لە گورجکردن ئابووری شارەگە جویر بازاڕ وهوتێلەیل دەێد، و لەی باوەتە، ئەبو عەلی خاوەن مارکیتیگە لە قەزای هیندیە، ئویشێد: وەخت کارکردن لەمەوقەی زیارەت چلە لەو رووژەیل ئاسایی جیاوازترە، ک زیارەتچیەیل فرەن، ک دەرفت هوچان و خەفتن نییە، ئەراوە دوو شاگرد هاوردمە دوکانەگە، تا لەی وەرز زیارەتە دەسمیەتییم بیەن.
ئەبو عەلی لە قسەیلی ئەرا ئاژانس شەفەق نیوز دیاری کەێد، ک فرەترین داوایل دەسەیل وخەڵکەگە لەی ماوە لە خوەراک یانەن: (نرنج، مامر، روین، نژی، فاسۆلیا، ئاو تەماتە)، و لە باوەت بوتڵ ئاو، یەک سەندوق لەلی وە ١٢٥٠ دینار فرووشیاد، و ئیرنگە ئەرا ١٦٠٠ دینار بەرزەو بوی، چوینکە دواکاری فرەس، وتیش: فرەی دوکانەیل قەزای هیندیە ولە پارێزگای کەربەلا وە گشتی، لە مەوقەی زیارەت چلەی ئیمام حسێن تا وەخت دیریگ شەوانە مینن.
زیارەتەیل ئاینی، جویر وەرزیگ کارکردنە ئەرا فرەی خەڵک کەربەلا، ک شەو دەنە دەم رووژ تا داواکاری ئی گردەوبوین گەپە جیوەجی بکەن، ئمجا زیارەتەیل دەسمیەتی لە خاسەوکردن رەوش ئابووری ئەرا هەزاران خیزان لە شار کەربەلا دەن.
لەی باوەتە، کازم عەبد عەلی، خاوەن دوکان سەرتاشی لە شار کەربەلا ئویشێد: کار لە دوکانەیل سەرتاشین لە وەرز زیارەت جویر ئەو رووژەیل نییە، ک ساعەتەیل کار تا وەختەیل دیریگ زیای کەن، و جاروباریش کاریان تا شەوەکی مینێد.
عەلی هەمیش ئەرا ئاژانس شەفەق نیوز ئویشێد: هەمیش پشت وە شاگردەیلیگ بەسیەێد لەروی قەرەباڵغ زیارەتچیەیلیگ سەرتاشی خوازن، ئەراوە دوکانەیل سەرتاسەری لە کەربەلا تا شەوەکی دەرەیلیان وازە.
لەلاییگتر، ئاشخانەیل لەوەر فرەیی و ڕەنگاوڕەنگی تاقە خواردنەیل موفت لەلاین دەسەیل لەمەوقەی زیارەت ئازیان نیەمینێد، و لەی باوەتە سەجاد خاوەن دەسیگ خزمەتیە لە شار کەربەلا، ک وەرجە دوو رووژ ئی دەسە دروس کردیە، ئویشێد: ئەو خوەراکە ک دەسەگەی لە شەوەکیان شۆربای نژی لە ناشتا پیشکەش کەێد، و لە تاق نیمەڕو وشام کەواو وکوبە پیشکەش کەێد.
سەجاد ئەرا ئاژانس شەفەق نیوز ئویشێد ئی خوەراکەیلە دریەێدە زیارەتچیەیل چوینکە وە درویژی ریەگە برنج و قیمە خوەن، ئەراوە خوەشم هات هەمەڕەنگی لە خواردنەگە بکەم.
لەباوەت کار ژنەیل لە پارێزگای کەربەلا، ئەوەیش لە وەرز زیارەت جیاوازە، ک فرەی ژنەیل لەی ماوە نیەخەفن، ک دەسمیەتی پیاوەیل دەن لە کار، تایبەت لە ئاشکردن، وەگورەی قسەی داڵگ فالح.
داڵگ فالح، خەڵک کەربەلا، ئەرا ئاژانس شەفەق نیوز ئویشێد " ئەرا نموونە، بایەتە لە ساعەت سێیەی شەوەکی ناشتا ئامادە بوود، و هەمیش تاق نیمەڕو وشام وەزوی ئامادە کریەێد، و نانکردنیش دریەێدە دویەتەیل، ک بەش هەر یەکیگیان نزیکەی ١٠٠ نان لە رووژیگ کەفێد، و هەمیش ئەو دڵنگەیلە شووریمن ک ئەرامان کلکریەن، چ لە دەسیل یا لە ماڵەیلمان، ئەراوە تا ماوەی دوو هەفتە ک ماوەی زیارەتە، ژنەیل کەربەلا خەو نیەکەن، وەلێ کەفنە خزمەتکردن زیارەتچیەیل.
زیارەت چلەی ئیمام حسێن، گەورەترین خوەینشاندان مەلیۆنی و گردەوبوین مرۆییە لە جەهان، مەلیۆنا کەس لە جویراجویر مەزهەوەیل ئیسلامی ونا ئیسلامی لە جویراجویر شوینەیل جەهان لە گشت ساڵیگ لەناوی بەشداری کەن، لەوەر ئەو نووڕینەیل ئاینی و روشنهویری و کۆمەڵایەتی و دەروینیە، وهەمیش لەوەر ئەو شیوەیل سیاسی وئابووریە ک سای خاسیی خەێدە بان گەلەیل ناوچەگە وجەهان.
