سێ نه‌فتپاڵوو له كوردستان دامه‌زريه‌يد
وه‌گووه‌رى زانياريه‌يل سه‌رۆكايه‌تى ليژنه‌ى سامانه‌يل سورشتى ئه‌نجومه‌ن پاريزگاى سلێمانى ك(شه‌فه‌ق نيوز)ئاگادارى بوى، وه دروسكردن ئه‌و سێ نه‌فتپاڵووه نزيكه‌ى 10 هه‌زار كه‌س ئه‌كه‌فنه بان كار.
له‌ى باوه‌ته‌و، رۆزا مه‌حمود بڕيارده‌ر ليژنه‌ى ناوبرياگ له په‌رله‌مان كوردستان له لێدوانيگ ئه‌را ئاژانس ئه‌نادۆڵ ئه‌وه ده‌رخست ك وزاره‌ت سامانه‌يل سروشتى پلانيگ ها وه‌رده‌سى ئه‌را دروسكردن سێ نه‌فتپاڵوو له هه‌رێم كوردستان له هه‌رسێ پاريزگاگه وه مه‌رام كه‌مه‌وكردن قه‌يران سوزه‌مه‌نى وه پله‌ى يه‌كه‌م.
رۆزا مه‌حمود له‌و باوه‌ته‌و وت: ئه‌و سێ نه‌فتپاڵووه له هه‌ر يه‌ك له پاريزگايه‌يل هه‌ولێر و سلێمانى و دهۆك دامه‌زريه‌ن و هه‌ر يه‌كيگ له‌ليان رووژانه تواناى 50 هه‌زار به‌رميل ديريد له سه‌ره‌تاو دوياخريش ئه‌دێده 100 هه‌زار به‌رميل و نه‌فتپاڵووه‌يليش وه گووره‌ى رينمايى تازه دامه‌زريه‌ن.
ئه‌و په‌رله‌مانتاره ئاماژه وه يه‌يش كرد ك له‌و رينمايه‌يل تازه ك ئه‌و نه‌فتپاڵووه‌يله وه‌پى دامه‌زريه‌ن ئه‌و بڕه 17 دۆلاره نامينيد ك ئيسه حكومه‌ت ئه‌ياده ئه‌را نه‌فتپاڵووه‌يل بازيان و كه‌له‌ك ئه‌را هه‌ر به‌رميليگ نه‌فت وه‌و كومپانيايه‌يل ئه‌هليه ك خاوه‌ن ئه‌و نه‌فتپاڵووه‌يله‌نه.
باس له‌وه‌يش كرد ك حكومه‌ت نه‌فت خام ئه‌ياده ئه‌و نه‌فتپاڵووه‌يله ك برياره له چه‌ن مانگيگ تر بچنه بوار جيوه‌جيكردن و دوياخريش له‌دويا پاڵين به‌رهه‌مه‌يليان له‌ليان سينيه‌يد و ئه‌و به‌رهه‌مه‌يليشه ك زيايه‌ن يا حكومه‌ت هه‌وه‌جه وه‌پيان نه‌يريد ئه‌تويه‌نن بفرووشنه‌ى وڵاته‌يل تر.
جى باسه، ئيسه له هه‌رێم كوردستان فيشتر له 500 نه‌فتپاڵوو ناياسايى هه‌ن و ليژنه‌ى پيشه‌سازى و وزه و سه‌رچه‌وه‌يل سروشتى په‌رله‌مان كوردستان وه كتاو فه‌رمى داواى به‌سانن ئه‌و نه‌فتپاڵووه‌يله له وزاره‌ت سامانه‌يل سورشتى كردگه وه‌بوونه‌ى خراوى كواليتيان و قانجاوكردن به‌ش فريه‌يگ له وه‌رپرسه‌يل حزبى و نزيك له‌وان.
وه‌ل ئه‌وه‌يشا دكتۆر غالب محه‌مه‌د سه‌رۆك ليژنه‌ى سامانه‌يل سورشتى ئه‌نجومه‌ن پاريزگاى سلێمانى باس له‌وه ئه‌كريه‌يد ك هه‌وه‌جه‌ى سوزه‌مه‌نى له هه‌رێم كوردستان ساڵانه وه ريژه‌ى 15% زياى ئه‌دێ و ئه‌گه‌ر نه‌فتپاڵوو مۆدێرن و گه‌ورا دروس نه‌كريه‌يد ئه‌وه تويش قه‌يران ئه‌يه‌يم.
غالب محه‌مه‌د هه‌ميش وت: هه‌رێم كوردستان له ساڵ 2020 رووژانه هه‌وه‌جه وه بر 13 مليۆن له‌تر به‌نزين و 9 مليۆن له‌ته‌ر ديزڵ ديريدو ئاماژه‌يش وه ئه‌وه كرد ك تا ساڵ 2019 ئه‌و سێ نه‌فتپاڵووه ته‌مام ئه‌دێ.
