سیمای "٥٦" لە عراق.. هاووڵاتییەیلیگ کەفنە تەڵەی خەڵەتیان وەبی بەڵگە
شەفەق نیوز/ لەی ساڵەیل دویاییە، سیمای خەڵەتانن هاوولاَتیەیل وە رەفتارەیلیگ بڵاو بویە، ک چەسپانن تاوانەگەی سەختە، ک هیلێد قوربانیەیل زەرەدەیل گەورەیگ وەپیان بڕەسێد، و تاوانکارەگە وەبی سزا لەلی دەرچوود.
نوور خانمیگە خەڵک بەغداد، باس کەێد چوین کەفتە تەڵەی خەڵەتانن، وە پڕۆپاگەندەی درووکانییگ، لەبان سۆشیال میدیا، هەنای کۆمپانیایگ لەبان ئەنتەرنێت راگەیان ک هاوبەشیەیلیگ خوازێد بایی ٢٧٠٠ دۆلار ئەمریکی لەلای کۆمپانیاگە بنەێدە کار، تا قانجاز ئەرای باێد.
نوور ئەرا ئاژانس شەفەق نیوز ئویشێد: کارەگە وەدڵم بوی، ئەراوە چیمە ناوی، وگەنجەیل فرەیگیش هاتنە ناو ئی کارە، و هەمیش یەک کار ئەڵاجەوییگ وەپیمان ئەنجام دان، ک لەبان گریەبەسییگ واژوو کردیمن، ک وەگورەی ئەوە قیەغەی توومارکردن سکاڵا كرد لەبان کۆمپانیاگە یا قسەکردنیش لە سۆشیال میدیا، ک ئەوەگ ئی کارەیلە بکەێد کەفێدە وەر سزای زیندانی، باوجی پاپەی ئەوە نەویمن.
ئویشێد" دویای تەواوکردن راهینان، وەناکاوەو نە کۆمپانیا و نەیش خاوەنەیلی مەنن، بی شوین ونوین، و دەرکەفت ک یە کۆمپانیای درووکانییگە، ئی گەنجەیلە وەسنگ وەکارخستن پویلیان خەڵەتنێد، ئیجا منیش پویلم لەدەسدام، و فرەیش لە گەنجەیل هەمیش پویلیان لەدەسیان چگ، و تا ئیسەیش ئەو کۆمپانیا پەیا نەویە.
هاووڵاتییەیل دویای ئەوەگ کەفنە تەڵەی خەڵەتیان، سکاڵا لەلای دەزگا ئەمنیەیلە کەن، ک ئەوانیش کەفنە ریکارەیل خوەیان، وەگورەی قسەکەر وەزارەت ناوخۆ، لیوا خالد محەنا، ک ئویشێد: باندەیل خەڵەتانن ریەیل جیاجیا دیرن، وپشت وە یاسا بەسن، و نەزانی هاووڵاتییەیل لەی باوەتە وەکار تیارن، جویر ناچارکردنیان وە واژووکردن گریەبەسی.
لەباوەت ئەوە ک دەزگایل پۆلیس وەرد ئی کارەیلە چوین رەفتار کەن، محەنا ئەرا ئاژانس شەفەق نیوز دیاری کەێد ک پۆلیس ریکارەیل تایبەت وەرد ئیجویر خەڵەتاننیگ دیرێد، لەلیان وسانن ئی کۆمپانیایلە لەڕی دادوەری عراق و کارەیل لێکۆڵینەوە، وئەوەیش وە گردەوکردن بەڵگەیل و قسەی وەچەودیەیل و ریکارەیلیگ تر، و لە کۆتایی قسەیلی داوای هاوکاری لە هاووڵاتییەیل وەرد پۆلیس کرد، و توومارکردن سکاڵا لەبان هەر لایەنیگ کار خەڵەتیان وەردیان کەێد.
ئی کەسەیلە ک کار خەڵەتانن مەردم کەن، لەناو جادەی عراق نازناو (٥٦) بڕینەسە باڵایان، ئەوەیش وەگورەی مادەی یاسایی خەڵەتانن، مادەی ٤٥٦ لە یاسایی سزادان عراقی شمارە ١١١ ئەرا ساڵ ١٩٦٩، و ئەرا کوڵبڕی وەپی ئویشن ٥٦.
ئی مادەی یاساییە، سزاگەی رەسێدە ٥ ساڵ زیندانی، لەبان هەر کەسیگ ری وشیوەیلیگ ئەرا خەڵەتیان هاووڵاتییەیل وەکار بارێد، و سوودیگ دارایی یا هەستی لەی کارە بگرێد، وەگورەی قسەی پسپۆڕ یاسایی حەیدەر سووفی.
سووفی لە قسەیلی ئەرا ئاژانس شەفەق نیوز هوشداری کەێد ک فرەی باوەتەیل خەڵەتانن چەسپاننی سەختە، چوینکە مەرج دوو وەچەودی (شاهد) لەبان کارەگە نییە، ئمجا توومەتبارەگە لە سزا قورتار بوود.
هەمیش ئویشێد: ئەرا نەکەفتن وە کاریگ خەڵەتانن، تەمەی هاووڵاتییەیل کەیمن دڵنیایی لە راسی وئەمینی ئەو کەسە پەیا بکەن، ک وەگەردی رێک کەفن، چ لە فرووشتن یا رەفتار یا قەرز، و مافیان وە بەڵگە ونویسانن ولە وەردەم دوو کەس بچەسپنن، تا ماف خوەیان لە وەردەم دادگا مسۆگەر بکەن.
پسپۆر یاسایی دەسنشان ئەوە کەێد ک هەنای توومەتبارەگە داد کریەێد، و ماوەی سزاگەی تەواو کەێد، ماف دریەێدە قوربانیەگە سەردان دادگای مەدەنی بکەێد و داوای گلەوداین ئەو مافیە بکەێد ک وەپی خەڵەتیایە، وداوای قەرەبوو دارایی یا هەستی لەی تاوانە بکەێد.
