زاخیکو.. شاریگ لە هەرێم کوردستان زنییەو بوی

شەفەق نیوز/ سایت "فازەرلی" ئەمریکی چوار راسی خستە وەردەم، ک پەیوەندی وە شار ئاسەواری "زاخیکو" دیرن، ک لەی دویاییە لە پارێزگای دهۆک لە هەرێم کوردستان، لە ژیر ئاوەو هاته‌ ده‌رو دووارە زنییەو بوی.       

ئەو سایتە ک شوینەگەی ها نیویۆرک، لە راپۆرتیگ ئاژانس شەفەق ئەڵگەردانی کرد وت: ئەو شارە ک تەمەنی رەسێدە ٣٤٠٠ ساڵ، وەرجە چەن هەفتەیگ، دووارە هاتەدی، دویای ماوەی درویژیگ لەژیر ئاو، وتیش: لەوەر داوەزین ئاست ئاو لە وڵاتەگە، لەو هشکەساڵی تیژە، ئەو شارە کەفتە دەیشت.      

راپۆرتەگە باس ئەو پەیاکردنە وە "رەنگین" کرد لە وەختیگ توێژینەوەکار وئەکادیمایل پێشبڕکێی وەگەرد وەختەگە کەن تا زانیاری زیاتر وپارچەیلیگ ئاسەواری بکەفێدە دەسیان.       

ڕاپۆرتە ئەمریکیەگە، چوار راسی رەنگین خستە وەردەس ک تا ئیسە لەباوەت ئی پەیاکردنە باوەو بوین:      

چوودەو ئەرا سەردەم "برۆنزی"      

راپۆرتەگە دیاری کرد ک ئەو شوین ئاسەواریە ناوی (کیمونی)ە ومەزەنە کریەێد لە شارەیل سەرەکی لە ئیمبراتۆریەت میتانی هیندی ئیرانی بوود ک لە باکوور وڵات ناوبەین دوو چەم بوی، ولە ماوەی ناوبەین نزیک ١٥٠٠ تا ١٣٦٠ وەرجە زایینی بویە.       

راپۆرتەگە لە زوان خانمە مامووستا لە بەش زانست ئاسەواری لە زانکۆی فرایبۆرگ ئەڵمانیا وت: شارەگە لە سەردەم برۆنزی بویە، وهەمیش وەناو (زاخیکو) ناسریاگە.       

پەیاکردنیگ وەرجە ئیسە      

راپۆرتەگە وتیش: ئی شارە لە هەرێم کوردستان لە ساڵ ٢٠١٣ یەکەم جار پەیا کریا، دویای داوەزین ئاست ئاو ناوچەگە.         

وتیش: دویای ئەوە وە پەنج ساڵ، ئەرا یەکەم جار لەلایەن زانایل ئاسەواری کورد وئەڵمان لە ساڵ ٢٠١٨ دەسکریا وەشکین، ک کاریان لەبان زانستن کۆشکەگە بوی.       

راپۆرتەگە وتیش: دویای تەواوبوین هشکیەگە، ئاوەگە گلەو خوارد و دووارە شارە کۆنەگە نقوم کرد، ک ناچار زانایلە کرد کار وەشکین شوینەگە بووسنن، وتیش: خوەشبەختانە ئەوە دویاترین گلە نەوی ک شارەگە بکەفێدە دەیشت.        

پارچە تەختە وتاوەر و پیشەسازی        

راپۆرتەگە دیاری کرد ک عراق ناچارە وەگەرد ئاڵشتبوین کەشوهەوا و وەرزەیل درەو سەخت رەفتار بکەێد، ک ئەرا نواگردن هشکەوبوین بەرهەمەیل، روی ئاوەگە لە ئەمار مووسڵ لە کانوون یەکەم وەرەو شوینیگ تر کرد، وهەنای ئاوەگە دەرچگ، دووارە ئەو شارە کەفتە دەر.       

وەگەرد دەرکەفتن شارەگە ئەرا جاریگتر، زانایلە ئەو دەرفەتە وەکار هاوردن، و دووارە دەسکردنە وەشکین، وە ئومید وەرگردن زانیارەیلیگ زیاتر وەرجەیەگ ئاوەگە گلەو بخوەێد، ک ئی گلە زانایلە فرە هووکارە بوین.       

وەگەرد بینای ئەو کۆشکە ک لە هەڵمەت وەشکینە کوڵەگە لە ساڵ ٢٠١٨ توومار کریا، ئاشکرای بینایل گەورەی فرەیگ کریا، لەوانە ئەو بینای گەپە ک دیوار و تاوەرەیک و بینای گەپیگ جویر ئەمار چەن قاتییگ، وەگەرد کۆمەڵەیگ پیشەسازی هانە دەوری.       

ئاو نقومی کردیە      

راپۆرتەگە وتیش: زانایلە زانستیان ک ئاوەگە دووارە بەرزەو بوود، وشارەگە ئەوەسە کەفێدە ژیر ئاو، ئەراوە تەنیا وەزوی کار نەکردن تا ئەوەگ تویەنن لەلی بزانن، باوجی هەمیش گشت چشتیگ پووشان، تا ئاو نەڕەسێدە بینا وچشتەیل، تا بتوەنن هەنای ئیجارە شارەگە بکەفێدە دەیشت لە وەشکینیان وەردەوام بوون.      

پووشان شوینەگە       

ئەو بینایلە ک چاڵ ئەرایان کریایە، وەتەواوی وە پلاستیک پووشیان وسفت کریان و وەکوچگ بانی گریا، ئەوەیش لە چوارچیوەی بەشیگ لە پڕۆژەی خاسەوکردن گشتگیریگ ک لەلایەن دامەزاو "جیردا هەنکل" سپۆنسەری کریاگە.      

ڕاپۆرتە ئەمریکیەگە لە کۆتایی وت: ئامانج لەی ریکارە ئەرا مقەیەتیکردن دیوارە خەڕگینەیل و هەر پەیاکردنیگ تر هاتیە ک هیمان لەژیر رمیاگەیل لە مەوقەی لافاوەیل مەنیە.