نەتەوە یەکگرتگەیل دووپات لەبان گرنگی هاوکاری ناوەین وڵاتەیل کرم وەگەرد دەگمەنی و کەمی ئاو، و زیایبوین رخ لە جەنگ لەبان ئاو، لە وەختیگ نەتەوە یەکگرتگەیل دەسنیشان کەێد کە زیاتر لە ٣ ملیار کەس لە جەهان پشت وە ئاوەیل دەیشت سنوور خاکیان بەسن، و تەنیا ٢٤ دەوڵەت ڕێککەفتن هاوکاری لەبان گشت ئاوەیل هاوبەش دیرن.

یەیش قەیران عراقە وەرد دەوڵەتەیل هاوسا، وەتایبەت تورکیا، کە چەم دیجلە و فورات وە ئاو خوەی زانێد، نەگ ئاو ناودەوڵەتی هاوبەش، چوینکە لەناو خاک خوەی دەرچوود.

لەی راپۆرتە نووڕینمە رەوش ئاو لە عراق لەی ساڵە، وە بوونەی رووژ جەهانی ئاو.

 وەگەرد ئی شەپوول واران رفتە کە لەی هەفتەیل گوزەشتە کە عراق وەخوەی دی، و چەوەڕی کریاس لەی رووژەیل بانانە زیاتر بوارێد، مەزەنە کریەێد عراق وە ئامار ئاویگ بچوودە پیری تاوسان، کە رەسێدە نزیکەی ١٣ ملیار مەتر شەشپاڵوو، و ئی بڕە وەگورەی ٨٥٪ لە بڕەگەی پارەکە فرەترە.

وەرانوەر ئەوە، عراق ئیرنگە نزیکەی ٥٠٠ مەتر شەشپاڵوو/ چرکە لە دیجلە ئەرای تیەێد، و چەنە ئەوەیش لە فورات، تا گشتی بوودە هەزار مەتر/ چرکە، وەلێ هاتێ لە تاوسان ئەرا نزیکەی ٦٠٠ مەتر داوەزێد، وەیەوە بڕ ئەو ئاوە کە چوودە ناو عراق رەسێدە زیاتر لە ٢٥ ملیار مەتر شەشپاڵوو لەی ساڵە.

لە وەختیگ بڕ گشتی بوودە نزیکەی ٤٠ ملیار مەتر شەشپاڵوو لەماوەی ساڵیگ، عراق وەگشتی ئەرا ماڵ و پیشەدا نزیکەی تەنیا ٩ ملیار مەتر شەشپاڵوو خوازێد، و زیاتر لە ٢٥ ملیار مەتر ئەرا کشتوکاڵی.

 وەهەر هاڵ، ئامار ئاو عراق لەماوەی ئی ساڵە، بەش ئەوە کەێد ئەرا وڵات و ماڵەیل و ئەرا پیشەسازی و هەمیش ئەرا کشتوکاڵی، وەگەرد ئەوەیش زەویلەیل ئاویاری رویپووش کەمەو کریانە، و لەلیان وە ئاو ژیرزەوی ئاویان دریەێد.