گەرمی تاوسان مەردم عراق لە خەو کارەبای وەردەوام هەڵسنێد
هاونیشتمانیەیل لە بەغدای پایتەخت و بڕیگ لە پارێزگایل گلەیی ئەوە کەن کە ماوەی چەن رووژیگە ساعەتەیل بڕیان رەسێدە نزیکەی ١٨ ساعەت یا زیاتر لە بڕیگ ناوچە، داوا لە حکومەت کەن چارەسەریگ گونجیاگ ئەرا ئی قەیرانە پەیا بکەن کە وڵاتەگو ساڵانیگە وەدەسیەو ناڵێد.
هاووڵاتیەیل: دەس لە ئومید شووردیمن و پەیمانەیلیش "کاریگ وڵە".
هاوڵاتی حەسەنین عارف لە چەوپیکەفتنیگ وەگەرد ئاژانس شەفەق نیوز وت: "فرەی ناوچەیل بەغدا وەدەس بڕیان کارەبای نیشتمانییەوە هاوار کەن"، وتیش: "کارەباگە لە رووژیگ لە ٦ ساعەت رەد نیەکەێد".
عارف پرسیار ئەوە کرد، ک "ئەو ویستگەیل بەرهەمیە لەماوەی ساڵەیل گوزەشتە دروس کریانە هانە کوو؟ و ئەو پویلە وەدرویژایی ئی ساڵەیلە ئەرا کارەبا خەرج کریا، وەبی چارەسەر گیچەڵ کارەبا ئەرا کوو چگ؟"، و سەرسڕ بوی ک لەبان ئەوەیش "عراق کارەبای لە وڵاتەیل هاوسا هاوردە کردیە، لەسای ئەو پویلەیلە کە وە ملیارەها دۆلار ئەرا سیستەم کارەبا خەرج کریاگە ".
لەلای خوەییش، محمد جەواد ئەو هاوڵاتییە ئەرا ئاژانس شەفەق نیوز وت: "ئیرنگە حکومەت نیەتوەنێد چارەیگ ئەرا گیچەڵ درویژماوەی کارەبا پەیا بکەێد"، وتیش؛ "پەیمانەیل حکومەت و وەزارەت کارەبا کە ئی تاوسانە خاسترە تەنیا وای ناو ئەڵەک بوی."
وتیش؛ "عراق وەی هەمکە ساڵەیلە ملیارا دۆلار ئەرا کارەبا خەرج کردیه وەبی سوود"، وتیش: " ئەو پویلە که چگە گیرفان گەندەڵکارەیل نەگ ئەرا خاسەوکردن سیستم کارەبا".
کەموکوڵی لە سێیان "بەشەوکردن گواستنەوە و سووتەمەنی".
ئابووریناس دێرغام محمد عەلی لە دیداری وەگەرد ئاژانس شەفەق نیوز وت: "دابینکردن کارەبا 3 فاکتەر خوازێد، یەکەمیان قەوارەی توانای بەرهەمهاوردن وەردەس و وەپشتدەخستن سووتەمەنی ئەرای، دویەمیشی توانای تووڕ گواستنەوە و بەشەوکردن و کەمکردن خراوەکاریی، و سێیەمیان مقیەتیکردن یەکەیل بەرهەمهاوردن وەرجە وەرز لویتکە.
دێرغام وتیش "کەموکوڵییگ لە دوو توخم هەس، یەکەمیان ناکارامەیی تووڕ بەشەوکردن و گواستنەوەس لەوەر زیایچگن و تەنگەوبوین، دویەمیشیان لە دەسداین سووتەمەنی ئەرا وەکارخستن وێستگەیل، کە فرەیان وە شیوەی سیستەم سادە کار کەن، کە سووتەمەنی فڕە دەن و تەکان کاربۆن زیای کەن.
هەمیش وت "چارەسەرە گرنگەیل بریتین لە تەواوکردن خول وێستگەیل ئەرا سیستەم نوو و گورجکردن بەرهەمهاوردن غاز ئازاد و پەیوەندیدار ئەرا پشتدەسخستن گاز میتان و ئیتانیان کە ئەو گازە هشکە دروس کەن ئەرا وەکارخستن وێستگەیل، یەیش بیجگە لەوە هویرەوکردن بانانیگ مامناوەند وە قەرز داین و ئاسانکاری ئەرا سەنین سیستەم بەرهەمهاوردن خوەر و دەسکردن وەی گامە لە دامەزراوەیل دەوڵەت ئەرا دروسکردن وزەی پاک، تەنانەت ئەگەر ئەرا رووشنایی و چشتەیلیگتر بوود بیجگە لە سەردەوکردن، جیاوازی لە بڕ وەکارهاوردن دروس کەێد."
پەیوەندیکردن وەگەرد وڵاتەیل هاوسا کار پینەکردنە
محمد ئەلحەسەنی شارەزای ئابووری ئویشێد "کارەبا لە عراق لە ماوەی کوڵیگ چارەسەر نیەکریەێد لە ژیر رووشنایی ئەو شیواشیو و گەندەڵییە کە لە وەزارەت کارەبا هەس"، وتیش؛ "ئەوەگ وەزارەت کارەبا کار لەلی کەێد لە گریەداین سیستمەگە وەگەرد وڵاتەیل هاوسا وە هویچ شیوەیگ گیچەڵ کارەبا لە عراق خاسەو نیەکەێد، و کاریگ پینەکردنە" .
حەسەنی لە قسەیلی ئەرا ئاژانس شەفەق نیوز وتیش "چارەسەری نموونەیی ئەرا گیچەڵ کارەبا لە عراق ئەوەس کە دەسەیگ تایبەتمەن لە ئەنجومەن وەزیرانەو وە هاوکاری وەزارەت کارەبا دروس بوود و ئی باوەتە بیەنە دەس کۆمپانیا گەورە ناودەوڵەتییەیل جویر سیمێنس ئەڵمانی یا ژەنەراڵ ئەمریکی"، وتیش "عراق وەردەوام بوود وە دەس ئی گیچەڵە تا ئەو وەختە ک سووتەمەنی ئەرا کارکردن وێستگەیل کارەبا نەخوازێد."
عراق فرە پشت وە هاوردەکردن غاز ئیران بەسێد تا تووڕ کارەبا بخەێدە کار، ک وڵاتەگە نزیکەی 14 هەزار مێگاوات لە تووڕ ناوخوەیی بەرهەم کەێد، بیجگە لەوەیش نزیکەی چوار هەزار مێگاوات لە غاز هاوردە کەێد.
عراق ها گفتوگۆ وەگەرد وڵاتەیل خەلیج، وە سەرۆکایەتی سعودیە، ئەرا هاوردەکردن کارەبا لەلیان وە گریەداین سیستمەگەی وە سیستەم خەلیج، دویای ئەوە ک لە ماوەی ساڵەیل گوزەشتە تەنیا پشتی وە ئیران بەساوێد وە هاوردەکردن 1200 مێگاوات لە سووتەمەنی غاز ئەرا وەکارخستن وێستگەیل کارەبای ناوخوەیی.
هەرلیوا، عراق نیاز هاوردەکردن کارەبا لە ئوردن و تورکیا دیرێد، لە تەقەلای بەغدا ئەرە پڕەوکردن کەمی کارەبا تا ئەو وەختە ک وێستگەی کارەبا دروس کریەێد کە توانای دابینکردن وەکارهاوردن ناوخوەیی بوود.
وەزیر کارەبا: وەدەس دەسکوڵی ناڵیمن
زیاد عەلی فازڵ، وەزیر کارەبای عراق، ئاشکرا کەێد کە "دەسکوڵی گەورە هەس کە لەسەدا پەنجا لە بڕ بەرهەم وێستگەیل زیاترە".
فازڵ ئاشکرا کرد، بڕ دەسکوڵی وڵات نزیکەی سیانزە هەزار مێگاواتە، وتیش؛ ئاستەنگ و ئاستەنگی فرەیگ لەوەردەم ئەو کەرتە هەس، یەیش بیجگە لە قەیران نەفت و تووڕەیل بەشەوکردن کە وە گشت پارێزگارەیل نیەڕەسێد.
عراق دەیان ساڵە وەدەس قەیران درویژماوەی کەمیی کارەباوە ناڵێد، لەئەنجام گەماروودان و جەنگەیل یەک لەدویای یەک، و دانیشتگەیلی چەنها ساڵە ناڕەزایەتی نشان دەن وەرانوەر وەردەوامی بڕیان کارەبا، وەتایبەت لە وەرز تاوسان کە پلەی گەرما جاروەجار رەسێدە ٥٠ پلەی سەدی.
