راپۆرتیگ ئەورپایی دووچەوەکی پۆڵەندا نشان دەێد.. عراقیەیل دەسگیر کەێد و باوەش کەێدە ئۆکرانیەیل
شەفەق نیوز/ ماڵپەڕ "شینگن فیزا ئەنفۆ" ئەوروپایی وت: دەسەڵاتەیل پۆڵەندا هەرچەن دەر ئەرا ئەو ئۆکرانەیلە واز کردن ک لە جەنگ واینە، باوجی هەر وەردەوام بوین لە بیناکردن تەیمانەی سنووری وەگەرد بیلارووسیا ک درویژیەگەی رەسێدە ١٨٦ کیلومەتر، و هەمیش باس لە دەسگیرکردن بڕیگ لە عراقیەیل کرد ک تەقەلا دان وە شیوەیگ نایاسایی بچنە ئەوروپا.
راپۆرتەگە ک ئاژانس شەفەق نیوز ئەڵگەردانی کرد، وتیش: پاسەوان سنووری پۆڵەندا راگەیان ک ٤٣ بیگانە لە ١٤ی نیسان تەقەلا دانە وەشیوەیگ نایاسایی لە بيلاروسيا بچنە ناو سنوور پۆڵەندا، و گشتیان دەسگیر کریان، وتیش ١٨ عراقی و پەنج سووری و چوار یەمەنی و دوو نەیجیری و یەک تورکی لەناویان بویە.
راپۆرتەگە هەمیش وت: ئەو کووچبەرەیلە ک تەقەلای رەسین ئەرا پۆڵەندا وەمل بیلارووسیا دەن، شمارەیان وەردەوام بەرزەو بوود، ک دەسەڵاتەیل پۆڵەندا لە وەختیگ گوزەشتە لە ئادار ئاشکرا کردن ک ١٣٤ کەس تەنیا وەماوەی یەک رووژ تەقەلا دانە لەناو سنوور دوو وڵاتەگە رەد بوون، ک واتە هەزاران کەس وەماوەی یەک مانگ ئەو تەقەلا دانە.
دەسەڵاتەیل پاسەوان سنووری لە پۆڵەندا باس ئەوە کەن ک فرەی ئەو کەسەیلە ک وەشیوەیگ نایاسایی تەقەلای رەدبوین دەن، خەڵک عراق و یەمەن و کوبا و سودان و نەیجیریا و سوریا و ئەفغانستان و هیندستان و تورکیان، وفرەی دەسگیرکریایەل رەگەزنامەی ئی وڵاتەیلە دیرن.
لە وەختیگ دەسەڵاتەیل پۆڵەندا ئۊشن ک نوای ئی سیمای نایاساییە گرن، باوجی ریخریاگە مرۆییەیل پۆڵەندا دووپات کەن ک وە وەحشیانە رەفتار وەگەرد کووچبەرەیل کریەێد تا وەرەو بیلارووسیا گلیان بیەن.
لەی باوەتە، ماڵپەڕە ئەوروپایەگە باس دیواریگ کەێد وە درویژایی سنوور پۆڵەندا و بیلارووسیا ک ئەرا نواگردن جویلەی کووچبەری نایاسایی کریەێد، لە سەرەتای ساڵ ٢٠٢٢ دەسوەپی کریا، و مەزەنە هەس لە حوزەیران ئایندە تەواو بوود.
راپۆرتەگە دیاری کرد ک وەرپرسەیل و چالاکوانەیل لە چین ماف مرۆڤ دڵخوەش نیین وە بڕیار بیناکردن ئی تەیمانە، ک پۆڵەندا وەگەرد کووچبەدەیل دەوڵەتەیل سێیەمین رەفتار کەێد گوایە ئەوانە شایستەی مقەیەتیکردن لە ئەوروپا نیین.
هەمیش باس ئەو دووچەوەکیە لە رەفتار پۆڵەندا و دەوڵەتەیلیگ تر لە یەکێتی ئەوروپا وەگەرد باوەت کووچبەرەیل کرد، ک نوای کووچبەرەیل گرێد و نیەیلێد لە سنوور رەد بکەن، و لە خود وەختەگە گشت چشتیگ ئەرا هاووڵاتیەیل ئۆکرانیا ک لە جەنگ وەرد رووسیا واینە دابین کەێد.
لە وەختیگ دەسەڵاتەیل پۆڵەندا رخنەی چالاکوانەیل رەت کەێد، نشان ئەوە دەێد ک فرەی ئی کووچبەرەیلە داوای وەرگردن ماف مقەیەتیکردن نیەخەنە وەردەس هەنای تیەنە ناو وڵاتەگە، ک وەوجویرە بایەتە لەناو پۆڵەندا بمینن، و نەچنە دەوڵەتیگتر.
راپۆرتەگە لە کۆتایی وتیش" چالاکوانەیل رەخنە لەو دیوار سنووریە گرن، ک خراویە ئەرا ناوچەی دارسانەیل سرووشتی ک لەناو کەلتوور جەهانی لەلای یونیسکۆ توومار کریانە.
