راپۆرتیگ ئەمریکی: عراق لەوەر سیاسەتمەدارەیلی وەرەو خراوی چوود
شەفەق نیوز/ لە توێژینەوەیگ سیاسی لەلایەن "پەیمانگای کارنیجی" ئەمریکی باس ری چاکسازی کرد ک هیمان سەختە، و عراق وەرەو "شکستهاوردن وە دەوڵەتیگ تورت" چوود، و دیارییش کرد ک ئەو چاکسازیەگ موقتەدا سەدر ریبەر رەوت سەدر باسی کەێد ئەوەسا کەفێدە وەر سەختی و " جەنگیگ شەکەتکەر" ک "رەنج گەورەیگ و دەیان ساڵ" خوازێد تا جیوەجی بکریەێد،
و دووپات کرد ک وڵاتەگە سیاسەتمەدارەیلیگ خوازێد وەرپرس و ئامادە بوون ک ناکۆکیەیلیان بخەنە کنار وەخاتر بەرژەوەنی گشتی.
پەیمانگاگە لە تۊژینەوەیگ بڵاو کرد و ئاژانس شەفەق نیوز ئەڵگەردانی کرد وت: وینەی ڵێڵیگ لە رەوش عراق هەس، و هیمان ری چاکسازی سەختە، و وڵاتەگە هابان ریەیل خراوبۊن.
پەیمانگا ئەمریکیەگە وتیش: هیمان عراق دەوڵەتیگ تورتە و رۊ وەرەو شکستهاوردن کەێد، وتیش: ئی وڵاتە وەماوەی سی ساڵ سێ جەنگ سەخت وەخوەی دی، ئەوەیش وەگەرد سزایل ناودەوڵەتی و جەنگ مەزهەوی و زاڵبۆن بیگانە، ک وەگەرد رمیان پەیکەرەیل سەدام، عراق خوەی لەناو رەوشیگ سەختتر دی، ک بەشیگ مەرج لەبان بەشبەشکردنی لەبنەمای مەزهەوی و بنچینەیی کردن، هەرچەن ک عراق ئی مەزەنەیلە بیئومید کرد.
وتیش: تورتی عراق و گرفتەیل فرەی کار نوویگ نییە، و دیاری کرد ک موقتەدا سەدر ریبەر رەوت سەدر پەیمان وە هاوردن ئاڵشتبۊنەیل گەورەیگ دا و دۊرکەفتن لە بەشەوکردن دەسکەفتەیل حزبەیل مەزهەوی و بنچینەیی و ئاینی، ک ئی رسوومەیلە هانە ناو هووکارە سەرەکیەیل گەندەڵی و بەشبەشبۊن کۆمەڵایەتی لە عراق.
راپۆرتەگە دیاری کەێد ک سەدر وەرانوەر ئەوە تەقەلا دەێد حکومەتیگ زۆرینەی نیشتمانی دروس بکەێد ک توانا دیرێد دەسوە جیوەجیکردن چاکسازی بکەێد، و نوای هاربۊن دەسەڵات دەشتەکی لەلایەن دەوڵەتەیلیگ جۊر ئیران بگرێد، و عراق لە ناکۆکیەیل هەرێمی دۊرەو بخەێد.
پەیمانگا ئەمریکیەگە پرسیار کرد ئایا سەدر لەی تەقەلایە سەرکەفێد؟، و دیاری کرد ک ئەوەسا کەفێدە وەر بڕیگ سەختی ئەگەر توانای دروسکردن حکومەت زۆرینەیش داشت، باوجی وەجیهاوردن ئاڵشتبۊنەیلیگ فرەتر جەنگ سەختیگ خوازێد، چۊنکە چاکسازی ئەرک فرە سەختیگە و رەنج گەورەیگ خوازێد ک شایەت دەیان ساڵ وەپی بچوود.
راپۆرتەگە باس بڕیگ لەو ریگریە کرد ک ئەوەسا کەفنە نوای سەدر، لەلیان توانای حکومەتەگە لە وەردەوامی، ک پلان خاسەوبۊن رەزامەنی فرەی بازیگەرەیل سیاسی خوازێد، لە وەختیگ زۆرینەی سیاسی کار دەگمەنیگە لە عراق، ئەراوە دروسکردن زۆرینە و مقەیەتیکردنی وەگەرد ئەو حزبەیل سیاسی کاریگ پڕ لە گومان.
راپۆرتەگە باس پەسەنکردن سەرۆک نوویگ ئەرا کۆمارەگە کرد ک سەدر توانای گردەوکردن ئەو دەنگەیلە نەیرێد ئەرا هەڵوژاردنی، و هەمیش دۊرە ک ئیران واز لە دەسەڵاتی لەناو عراق بارێد، ک تەهران وەرجەیە فەرماندەی هێزەیل قودس ئیرانی ژەنیڕاڵ ئێسماعیل قانی ئەرا عراق کل کرد تا مسۆگەر بەشداریکردن جینشینەیلی لە حکومەت بکەێد، ئەوەسە ک ئەگەرەیل دروسکردن حکومەت زۆرینە لەلایەن سەدر کەمەو کەێد.
راپۆرتەگە باسیش لەو گومانەیلە کرد ک سەدر بتۊنێد رازی دوژمنە سیاسیەیلی وە گرنگی چاکسازی بکەێد، چۊنکە خوەی سیاسەتمەدارەیلیگ وەرپرس نەیرێد ئامادە بوون ک گرفتەیلیان وەخاتر بەرژەوەنی گشتی بیەنە کنار.
و دیاری کرد ک وەگەرد ئی ریگرەیلە، هەمیش گرفت پەنام ئابووری لە کەرت گشتی هەس ک ئەوەسا کەفێدە میراتی سەدر ک حکومەتەیل وەرین پشتیان وە سیاسەت فەرمانبەرکردن لە کەرت گشتی بەسان، ک بۊە هووکار پەنام بیرۆکراتی، ک حکومەت دەسناسە بان ٤٠% لە فەرمانبەری عراق، و ئەوەیش ئاستیگ فرە بەرزە.
پەیمانگای کارنیجی وتیش: لە وەختیگ ئاست بیکاری لەناو گەنجەیل رەسێدە زیاتر لە ٢٥% بایەتە نەفت ٩٠% لە داهاتەیلی وەدەس بارێد، و ئەوەسە ک عراق ئاڵشتکردنیگ ئابووری گەپیگ ئەرا پاڵپشتیکردن کەرت تایبەت خوازێد، تا دەرفەتەیل کار ئەرا گەنجەیل پەیا بکەێد، و تەما بخەێدە وەر کۆمپانیایل ناودەوڵەتی ئەرا بەرهەمهاوردن لە داکاسیان، ک ئەوەیش وەدەسهاوردن ئارامی و کراکارەیل زیرەک خوازێد، و ئەوەیش وەدەس عراق نەکەفتیە.
وەگورەی راپۆرتەگە، عراق زیان لە وەردەوامی خراوبۊن ئاست خوەنەوارەی دیرێد، ک عراق ها خوار لیست دەوڵەتەیل خوەرهەڵات ناوڕاس لە بەرهەمهاوردن لە خوەنەواری.
راپۆرتەگە رووشنایی خەێدە بان بەشیگ لە لاێەنە خاسەیلە لە ساڵ ٢٠٢١، لەلیان سەرکەفتن دەنگەیلیگ سەروەخوەیی لە بڕیگ لە پارێزگایل و شکتسخواردن حزبەیل سیاسی خاوەن باڵەیل چەکدار، باوجی هەمیش دیاری کەێد ک "ری چاکسازی هیمان سەختە".
