راپۆرت: عراق قەتاریگە "وەرەلا" و دیموکراتیەیگەی هاژیر تاقی
شەفەق نیوز/ رووژنامەی "کریستیان ساینس مونیتۆر" ئەمریکی لە زوان پسپۆڕەیلیگ وت: دیموکراتی وەئەوزەڵهاتگ لە عراق کەفێدە ژیر تاقییگ لەسای ئەو قەیرانەیل سیاسیە ک ئیسە وەخوەی دوینێد، باوجی دەوڵەتەگە تا نزمترین ئاستی بیدەسەڵاتە وهەر نەڕمیاگە، چمای قەتاریگ وەرەلای بی رانندەس.
رووژنامە ئەمریکیەگە وت: ئی قەیران سیاسی ئیسە، ئاشکرای تورتی وڵاتەگە لە روی خوەزگەیل تەنیا بازیگەریگ تویڕە کەێد ک لە هەڵوژاردن نەهاتیە، هەکاتی سەید سەدر.
ئەو راپۆرت ئەمریکیە ک ئاژانس شەفەق نیوز ئەڵگەردانی کرد باس گەشەیل رویداوەیل دویایین عراق کرد، لە وەختیگ ئەنجامەیل هەڵوژاردن دەرچگن تا تەقەلایل دروسکردن حکومەت، و وەردەوەردەی ناوبەین رەوت سەدر و هیزەیل چوارچیوەی هەماهەنگی، ئیجا دەسکیشانەوەی پەرلەمانتارە سەدریەیل، ومانگردن تا تەقەلای پەردبوین وەرەو ناو بارەگای دادوەری لەناوچەی خەزرا.
راپۆرتەگە لە زوان تۆژینەریگ سیاسی و وەرپرسیگ حکومەتی وەرین ک داوا کردیە ناوی بڵاو نەکریەێد وت: ئەوەگ ئیسە نووڕیمنەی ئەوەسە ک دامودەزگایل دیموکراتی لە عراق کەفێدە ژیر تاقی، لە سنووری وتوانای لە هەڵگردن ئی سەختیەیلە.
دویای ئەوە ک خود سەرچەوەگە وت ک سەدر خوەشی لە بازیکردن وەگورەی ریسگایل نیەتیەێد، دیاری کرد ک پەرلمانمان نیەسەی چوینکە سەدریەیل ریگری لەلی کەن، و دادوەریمان لەوەر تەقەلای پەردبوین وەناوی لەلاین سەدریەیل بڕیار بەسیان دا، و حکومەتیگ گواستنەوەی وەختانەیگ دیریمن ک دەسەڵاتی لە جیوەجیکردن وەسەرچگە.
دیاری کرد ک سێ لق حکومەتەگەیش یا گڵووڵە بویە یا هویچ دەسەڵاتیگ وەدەسی نییە، ئیمە هایمنە ناوچەی نادیاریگ.
راپۆرتەگە لە زوان عەباس کازم تۆێژینەر لە پەیمانگای ئەنجومەن ئەتلەسی ئەمریکی وت: ستراتیژییگ لە بڕیار سەدر لە دەسکیشان نوینەرەیلی لە پەرلەمان نەوی، وتیش: زووهاوردن لەبان دەسەڵات دادوەری ئەرا رەسین وە هەڵوژاردن نوویگ، جەنگ شکەستییگە ئەرایان، ک لەلایەن یاسا دادوەری توانای پویچەڵکردن پەرلەمان نەیرێد.
کازم دیاری کرد ک سەدریەیل کورسیەیلیان دانە رکابەرەیلیان، و خوەیان وە تەواوی لەهەر بەشدارکردنی سیاسی لە حکومەت بیبەش کردن، و ئەگەر پشت وە هەر راویژکاریگ بوەسیان وەنە وەپیان وتن: ئیوە خوەیکوشتن سیاسی کەین.
کازم وتیش: ئیسەیش، دویای دەرچینیان، خوازن گلەو بخوەن، وتیش: هویچ فراکسیۆنیگ سیاسی نییە بتوەنێد تا ماوەی ٣ ساڵ ونیم یا ٤ ساڵ لە دەیشت حکومەت بمینێد، ئەوانە عراق کردنە قەتاریگ وەرەلا لەی وەختە، ک پەرلەمان نەیرێد، و نەیش دەسەڵات دادوەری، و حکومەتیگ وەڕیەوبردن کار ک دەسەڵاتی تا ئاست گەورەیگ بڕیاگە.
راپۆرتەگە وتیش: ناڕەزایەیل ئیرنگە لە ناڕەزاییە جەماوەریەیل ساڵ ٢٠١٩ جیاوازە، ک بازی زوور ئیسە وە لایەنگرەیل سەدر لەناو جادە کریەێد، وتیش؛ ئاشکرا نییە ئایا هەڵوژاردن نوو ک ساڵیگ لەلای کەمەو وەپی چوود، و سپۆنسەر نوویگ خوازێد، بەش وەدەسهاوردن مەزەنەیل سەدر لەناو لایەنگرەیلی لە "شۆڕشەگە" کەێد؟.
حەمزە حەداد تۆێژنەر لە ئەنجومەن ئەوروپی ئەرا پەیوەندیەیل دەیشتەکی دیاری کرد ک ئەوەگ سەدر کردەی، خوەی چگنی ئەرا ناوچەی خەزرا وداگریکردن پەرلەمان بوی، و هاوردە یاد ک سەدر یەکەم جار ئیجویر کاغەزیگ لە ساڵ ٢٠١٦ بازی کرد، دویای ئەوە ک لایەنگرەیلی چینە ناو پەرلەمان و راسەوکردن وەزاری فراوانیگ چەسپانن، ک بەشیگ لە وەزیرەیل تەکنۆکرات هاوردە ناوی.
لەبان ئەوەیش، داوای رێکخستن هەڵوژاردن نوویگ، ئەگەریش رەسیە ئەنجام، رخیگ لەباوەت دیموکراتی عراق دروس کەێد.
راپۆرتەگە لە زوان تۆژینەریگ لە بەغداد وت: یەکیگ لە کارە بەدەیل رژیمەگە ئەوەسە ک ئیمە هەڵوژاردن کەیمک، و نوینەر خوەمان لە پەرلەمان دیریمن، وەلی بیخود، ک ئەوان لە سەرکردەیل حزبەیل سیاسییان فەرمان وەرگرن.
حەداد وتیش: باوەتەگە ئەوەسا ک بوودە باوکردن دیموکراتی لە عراق، ک وە ماوەی درویژیگ پیش کەفێد، وتیش: شایەت هەڵوژاردن وەرجەوەخت بوودە ریگری گەورەیگ، ک لە چەو مەردم لە شەرعیەتی کەمەو کەێد.
ئەڵگەردان: ئاژانس شەفەق نیوز
