داوەزین گەورەیگ لە ئاو بەنداو دوكان
شەفەق نیوز/ کۆچەر جەماڵ وەڕیەوبەر گشتی بەنداو دوکان، داوەزین ئاست ئاو لە بەنداوەگە راگەیان، لەوەر کەم وارانی.
جەمال ئەرا ئاژانس شەفەق نیوز وت: داوەزین ئاست ئاوەگە، کاریگەری خراویگ ده‌بان ناوچەیل کشتوکاڵی لە کناری دیرید، باوجی ناوچەیل ناوڕاس و باشوور عراقیش گرێدەو.
وتیش: ئی مانگە ئاوەگە وەچەو ساڵەیل گوزەشتە فرە کەمە، ک هەر ساڵیگ لەی مەوقە بەنداوەگە رەسێدە بەرزترین ئاستەیلی.
کۆچەر وتیش: نزیکەی 100 ملم شەشپاڵو لە ئاو هەر چرکەیگ رەسێدە بەنداوەگە، یەیش لەوەر کەم وارانی لە وەرز زمسان، ک لە زمسان گوزەشتە ئاوەگەی ناوچەی دووکان 300 ملم بوی، و وەی بڕە ک لەناو بەنداوەگە هەس ئاست ئاوەگە رەسێدە 41% یەیشە تەنیا ئی وەرزە وەپی رەد کەیمن.
لە تەقەلایل هاوبەش ناوبەین حکومەت فیدراڵی و هەرێم کوردستان ئەرا چارەی ئی گیچەڵە، کۆچەر وت: لەی چەن رووژ گوزەشتە کۆبونەوی فراوانیگ وە ئامادەبۊن وەڕیەوبەر گشتی بەنداوەیل عراق و وەڕیەوبەر گشتی بەنداوەیل هەرێم کوردستان و کادرەیل پیشکەفتگ لە وەڕیەوبردن بەنداوەیل ئاویاری ئەنجام دریا، و رێک کەفتن لەبان داناین پلانیگ ئەرا وه‌كارهاوردن ئاو بەنداوەیل ئەرا خوازین گرنگ، و زوور لەبان دابینکردن ئاو نووشین وە پلەی یەکەم کریا.
لەباوەت کشتوکاڵی، ڕێک کەفتن لەبان خەرجکردن خود بڕەی ئاو پارەکین یا کەمتر ئەرا زەویەیل کشتوکاڵی لە پارێزگای کەرکوک و ناوچەیل دەورگردی، چوینکە یە سێیەم ساڵ هشکەساڵیە لە عراق.
وەڕیەوبەر بەنداو دوكان وتیش: وەگورەی قسەی وەڕیەوبەر گشتی بەنداوەیل عراق، ئمسال بەددترین ساڵ هشکەساڵیە لەچەو 50 ساڵ گوزەشتە، چوینکە واران ئی وەرز زمسانە تەنیا لە مانگ کانوون یەکەم و کانوون دویەم واری، و لە مانگ شوبات و ئادار واران نەوی.
لەباوەت توانای سوودگردن لە بەنداوەگە جویر ئەماریگ ستڕاتیژی، وەڕیەوبەر بەنداوەگە وت: هایمنە چەوەڕی لافاوەیل تا بەنداوەگە پڕ بوود، ئمجا توانای سوودگردن لەوە ئەرا ناوچەیل عراق و هەرێم کوردستان بوود.
