دی باغ.. ئه‌ڕا برایی ناوبەین موسوڵمان ویەهود
شەفەق نیوز/ سایتیگ تایبەت وە جەهان یەهودی، ئاشکرای سەردانکردن "موسوڵمان ویەهودی" وئاینەیلیگ تر ئەرا قاوەخانەیگ عراقی کرد، ک خاوەنی موسوڵمانە لە بەرلین، لەباوی ئەو رویداوەیل سیاسیە لە هویر خوەیان بەن، ودووارە کەلتوور سەدان ساڵەی هاوبەشیان گلەو دەن، و قاوەخانەگە چالاکیەیل گفتوگۆ وەگەرد خوەراک عراقی ڕێک خەێد، ک "کتاوخانەی موستەنسەریە" بویەسە سومبلیگ وەقەی دیوار قاوەخانەگە، ک هەسی یەهود لەو ماوە نشان دەێد.
ئەو راپۆرتە ک لەلایەن سایت "پلاس ٦١ جی میدیا" بڵاو بویە، و ئاژانس شەفەق نیوز ئەڵگەردانی کرد، باس گردەوبوین یەهود وموسڵمانەیل کەێد ئەرا نووشین عەرەق وخواردن چشتەیل یەهودی وعراقی، دویر لە سیاسەت لە عراق و ئیسرائیل وهەر شوینیگتر، جویر سووکایەتیکردنیگ لە ئەو یاسای نووە لە عراق ک قەیەغەی دروسکردن هەر پەیوەندییگ وەرد ئیسرائیلەیل لەبان عراقیەیل چەسپنێد.
سایتەگە دیاری کرد ک یەهودەیل ئیسرائیل وموسڵمانەیل عراق لەناو قاوەخانەی (دی باغ) لەبان مۆسیقای هونەرەیل یەهودی دودو تاسا سەما کەن، ک لە بنچینەی عراقیە، وکوڕەزای ئاوازنەرەیل عراقی کلاسیکی ساڵح و داود کوەیتی.
راپۆرتەگە وتیش: ئەو کەسەیلە ک گردەو بوینە، عەرەق نووشن، و ساندویچ شیبس یەهودی خوەن ک چشتەیل ناشتای عراقی ها توی، ک لە بەرلین خاوەن جەماوەری گەورەیگە.
قاوەخانەگە ک خاوەنەگەی عراقییگە ئەرا ئەولا کووچ کردیە، چالاکیەیل روشنهۊری و گفتوگۆ وەچەن زوانیگ رێک خەێد، و هونەرمەنەیل یەهودی لە ئیسرائیل وعەرەب وهونەرمەنەیل جەهانی گردەو کەێد، ک پیاویگ بەغدادی وەناو دوری دی باغ وازی کردیە، ک خوەی عراقی موسوڵمانە، ئەرا بەرلین کووچ کردگە.
راپۆرتەگە باس ئەوەیش کەێد ک ٩٥% لە یەهودەیل عراقی لە ساڵەیل ١٩٥٠ – ١٩٥١ خوەیان رەساننە ئیسرائیل، ودیاری کرد ک فرە لە مەردم ناو قاوەخانەگە یادەوەری لە یەهود بەغداد دیرن.
ڕاپۆرتەگە هەمیش ئویشێد: وەرانوەر پەنجەرەیگ لە قاوەخانەگە لە جادەگە، کابرایگ سیاسەتمەدار خانەنشین لە حزب شیوعی وە کوتر سیا نیشێد، ک یادوەری گەرمیگ لە هاوسای یەهودی وەرینی دیرێد.
راپۆرتەگە لەزوان ئەو سیاسەتمەدارە باس یادوەریی کەێد وچوین ئەوسا لە ئاهەنگەیل یەهود عراقی وە جەژن مەیمونە بەشداری کردیان، ک واز لە خواردن ئارد هاوردیان، ودیاری کرد ک باوگی لەو سەردەمە رازی نەویە مال یەهودییگ بسینێد، هەرچەن نرخەگەی موفت بوی، چوینکە قمشی نەکرد ئەو لارە بکەێد.
راپۆرتەگە ئویشێدیش: (کافێ دی باغ) فرە دویرە لەو ناکۆکیە ک لە ئاست سیاسی ناوبەین عراق وئیسرائیل هەس، و لەی قاوەخانەی بەرلینیە کەلتوور عراقی هاوبەشیگ ناوبەین یەهود وعەرەو هەس.
راپۆرتەگە وتیش: دی باغ لە ساڵ ١٩٨٤ لە بەغداد پەیا بویە، وهەنای لە تەمەن ١٤ ساڵان بویە، لە سەربازی وایە، و وە پاسپۆرتیگ ساختە ئەرا تورکیا ویۆنان وسوریا چگە، وەرجەیەگ بڕەسێدە بەرلین، باوجی فرەی کەسەیل بنەماڵەگەی لە بەغداد مەننە.
راپۆرتە ئیسرائیلیەگە دیاری کرد ک لە کانوون دویەم لەساڵ ٢٠١٦، بڕیار دا قاوەخانەی (دی باغ) واز بکەێد تا ئەو هونەرمەنەیلە لەناوی گردەو بکەێد ک یە چەن ساڵیگە ناسیەسەیان.
وەگورەی سایتەگە، ئێرنگە قاوەخانەگە ئاهەنگ وە میژوو هاوبەش ئەرا عراقیەیل وەگەرد گشت ئاینەیل کەێد، و باس ئەو تابڵۆی کتاوخانەی موستەنسەریە کرد لەقەی دیوارەگە، ک لەساڵ ١٢٢٧ دامەزریا، ک هیمان عراق ناوی بابل بوی، ک ئەوە سەردمیگ بوی ک تا ماوەی ٦٠٠ ساڵ یەهود بەشیگ لە وڵاتەگە بویە.
راپۆرتەگە لە زوان دی باغ وت: گشت جەهان لە دەینەیل عراق پەیا بوینە، و بەرلین شاریگ بابلی نووە، ک کووچبەرەیل لە بەغداد و ئیسرائیل وسوریا وئۆکرانیا هەن، و جویر بابل نوویگ چەوی کەفێدە گشت کەلتوورەیل
