خانمە پەنابەریگ عراقی.. لە ٣ جەنگ قورتار بوی تا لە "یۆگا" خوەی بوینێدەو

شەفەق نیوز/ زەینەب جەوادی لە سێ جەنگ لەناو وڵاتەگەی عراق قورتار بوی، تا هەرچەن رەسیە ئوسترالیا، باوجی زیانەیلیگ دەروینی واز لەلی ناوردن، وەلێ وەگەرد ئەو زیانەیلە رەفتاریگ ئەرا خوەی پەیا کرد، و لە قوربانی بویە مامووستایگ ک دەسمیەتێ ئەو کەسەیلە دەێد زیان لە فشار ژیانەگە دیرن، ئەوەیش وە یۆگا.

تووڕ "ئەس بی ئەس" ئوسترالی باس زەینەب جەوادی کەێد، ک لە ساڵ ٢٠١٣ جویر پەنابەریگ رەسیە ئوسترالیا، زیان سێ جەنگ لە عراق وەگەرد خوەی هاوردیە، ئیجا سەختیەیل ئاوارەیی، ک کەفێدە روی فشارەیلیگ دەروینی، وەلێ یۆگا قورتاری کرد.

یۆگا

ئەو راپۆرت ئوسترالیە ک ئاژانس شەفەق نیوز ئەڵگەردانی کرد، ئویشێد: هەنای گرفتەیل خیزانی رەسێدە ژاوەژاو، جەوادی پەنا وەی کار نووە برد، و رەوش دەروینیی وەشیوەی فرەیگ خاسەو بوێ، لە ئەنجام دەسکردنی وە یۆگا.

راپۆرتەگە لە زوان جەوادی خان ئویشێد: هەس وە جیاوازی ئاشکرایگ کەێد، ک لە دویای گشت دانیشتنیگ یۆگا خاسترەو بوود، و ئەو ژانەیلیە کەمکەم نیەمینن، و دەروینی خاسەو بوی، و هەس وە دڵخوەردیی نەما.

وەگورەی کۆلێژ جۆن هۆبکینز پزشکی، یۆگا سوود ئەرا تەندروسی لەش و دەروین ئەرا گشت تەمەنەیل دیرێد، و هەمیش توەنێد بوودە چارەسەری ئەرا ئەوانەگ بیماری درویژماوەی دیرن، و هاتێ بیلێد وەزویتر خاسەو بوون.

دەزگایل تەندروسی لە ئەمریکا باس بەڵگەیلیگ پیشەیی کەن ک نشان دەن ک یۆگا دەسمیەتی لە رەفتارکردن وەرد شەکەتی دەێد، و هیلێد تەندروسی دەروینی و خوەراک تەندروس و کەمکردن کیش و خاس خەفتن باوەو بوود.

دانیال بیج خانمە مامووستای یۆگا وت: نووڕیم ک جەوادی خان گرنگی وە یۆگا دەێد، و هانی دام تا مووڵەت خوەنستن یۆگا بگرێد، تا ئەویش بوودە مامووستا.

جەوادی وت: لە ساڵ ٢٠١٩ داوای پیمە لە ریخریاگ "ستارتس' کردم ک چارەسەری ئەرا دەسمیەتی دەروینی ئەرا مەردم وکۆمەڵگا پیشکەش کەێد، تا بتوەنن وەگەرد شۆکەیل دەروێنی رەفتار بکەن.

جەوادی وتیش: ئەو پیمە دەسمیەتی دا تا بوودە مامووستا، ک لە مەوقەی خوەنستنی لە وڵاتیگ بیگانە جویر پەنابەر هەڵبەت سەختیەیلیگ وەخوەی دی، هەمیش چوینکە حیجاب پووشێد، و ناچار بوود شوینەگە بیلێدە جی تا بچوود نماز بخوەنێد، هیشت بەشیگ لە فێرخوازەیل خولەگەی پرسیار بکەن، باوجی جەوادی توەنست ئەرایان ئاشکرا بکەێد، ک خوەی موسەڵمانە و خوازێد لەو کەلتورەیل سوود بگرێد.

ئەو خانمەیل ئاوارە ک قورتار بوینە

جەوادی خان دیاری کرد ک خوازیمە دەسمیەتی مەردم بیەم لە قورتابوین لە ژانەیل دەروینی و لەشی، وەتایبەت خانمەیل پەنابەر.

لە وەختیگ بویەسە مامووستا، جەوادی هوکارەی بڕبڕ لەو کەسەیلە کەێد ک لە کەلتورەیلیگ جیاجیا هاتنە، وەگەرد بڕەیلیگ عراقی ک کەسەیلیان زیان لە جەنگ و رەوشەیل نائارامی وەخوەیان دینە.