حكايه‌ت ئه‌و دويه‌ته يه‌هووديه چه‌س شان وه‌شان كورد جه‌نگ كرد؟
دوياى هه‌يشت مانگ دوير له چه‌و مه‌ردم باوه‌ڕى ئه‌وه بوى ك ئه‌و دويه‌ته وه‌ديل گيرياگه، هه‌ر وه‌و خاتريشه هووكاره‌يل ره‌سانن ئسرائيلى وه گله‌وخواردن جيل روزنبرج خوه‌شاڵى خوه‌يان ده‌رخستن، وه‌لى شايه‌ت تويش پرس وپرسكارى ياسايى بدێ له‌وه‌ر گه‌شتكردنه ناياساييه‌گه‌ى.
خوه‌يبه‌خشيگ تر له سوپاى ئسرائيلى ك 31 ساڵان بوى زويتر باس له‌وه كرد ك په‌نده‌يل وه‌رگيرياگ له كوشتارگه‌ى نازى له‌يوا وه‌پى كردگه ده‌سميه‌ت كورد و كه‌مينه‌يل تر بيه‌يد له خوه‌رهه‌ڵات ناوين، ك ئه‌ويش تويش رخه‌وبردن هات وه بوونه‌ى پيشه‌ڕه‌وى ريكخرياگ ترۆريستى داعش.
وه گووره‌ى ئاژانس روێته‌رز ك(شه‌فه‌ق نيوز)ئاگادارى بوى، روزنبرج ئه‌را ئيزگه‌ى سوپاى ئسرائيلى باس له‌وه كرد و وت: باوه‌ڕم ئه‌وه‌سه ئيمه‌ى يه‌هوودى وه يه‌كجارى ئه‌و كوشتارگه ره‌ته‌و ئه‌كه‌يم و يه‌يش ته‌نيا زه‌ره‌د نيه ئه‌را يه‌هوود، به‌ڵكوو زه‌رد ره‌سنيده هه‌ر مه‌ردمانيگ تر و له‌وانه‌يش ژن و مناڵ له سوريا يا عراق.
روزنبرج يه‌يش ده‌رخست و وت: وه دريژايى چه‌ن هه‌فته‌يگ گوزه‌يشت باوه‌ڕم ئه‌وه‌سه ك چشته‌يل فريه‌يگ له‌ورا ئالشت بوى له‌باوه‌ت رويداگه‌يل جه‌نگ، وه‌ل ئه‌وه‌يشا ده‌خاڵه‌ت ئيرانى وه‌شيوه‌ى فراوانيگ دياره‌و گشت چشتيگيش ئاڵشت بويه‌و منيش هس وه ئه‌وه كردم ك دى وه‌خت ئه‌وه‌سه گله‌و بخوه‌م ئه‌را نيشتمان.
روزنبرج سه‌ره‌تا په‌يوه‌ندى كرده يه‌كه‌يل پاسه‌وان ملله‌ت كورد له سوريا وه‌رجه ئه‌وه‌گ جيواز بدێ ئه‌را "دويخ نوشا" ك فه‌سيليگ مه‌سيحى چه‌كداره له عراق، ك هه‌ردوگ وڵاته‌گه‌يش هانه حاڵه‌ت جه‌نگ فه‌رمى وه‌ل ئسرائيل و هاووڵاتيه‌يل ئسرائلييش قه‌يه‌غه ئه‌كريه‌ن له گه‌شتكردن ئه‌را ئه‌و هه‌ردوگ وڵاته.
له‌ى باوه‌تيشه‌و، ده‌زگاى هه‌واڵگرى ناوخوه‌يى ئسرائيلى دوياى ره‌سين روزنبرج ئه‌را ته‌لئه‌بيب چڕيه‌ى و دانيشتنيگ وه‌ليا ساز كرد، وه‌لى باس له‌وه نه‌كرياگه ك ئايا تومه‌ت دادگايى بخريه‌يده پاڵ روزنبرج، وه‌لى وه‌رپرسه‌يل دادوه‌رى ئسرائيلى ئه‌و مه‌سه‌له وه دوير زانستنه.
كه‌ندا داوا له روزنبرج كرد له سوريا ده‌ربچێد، وه‌ل ئه‌وه‌يشا باڵوێزخانه‌ى كه‌نه‌دى له ئسرائيل يه‌كسه‌ر باس له گله‌وخواردنى نه‌كرد.
ئى دويه‌ته يه‌هووديه ك له بنه‌چه‌كه‌و كه‌نه‌ديه له‌وراوه هه‌ر وه ته‌نيا كووچ كردگه وه‌ره‌و ئسرائيل، وه‌لى تويش كيشه‌يگ هات وه ل ده‌سڵاته‌يل ئه‌مريكى.
له‌ساڵ 2009 روزنبرج له ئسرائيل ده‌سگير كريا له‌باوه‌ت مه‌سه‌له‌ى كووچكردن و كووچ وه‌پيكريا ئه‌را وڵاته‌يل يه‌كگرتگ و له‌ورايش ماوه‌يگ له زيندان برده سه‌ر.
له‌ى باوه‌تيشه‌و، ياهيل بن ئوفيد يه‌كيگ له پاريزه‌ره‌يلى وت: روزنبرج له ساڵ 2013 ئازاد كريا وه‌رجه ته‌مامكردن ماوه‌گه‌ى، ئه‌ويش وه‌و مه‌رجه له‌ژير چه‌وديرى بمينيد يا له‌ناو خاك ئه‌مريكا يا له ئسرائيل.
بن ئوفيد هه‌ميش وت: باوه‌ڕم ئه‌وه‌سه له‌وه‌خت خوه‌ى روزنبرج ئه‌و ياسا جيوه‌جى نه‌كردگه‌و چيه وه‌ره‌و سوريا، ك يه‌يش كيشه‌يگ ئه‌راى دروس كرد و وه‌رپرسه‌يل ئه‌مريكييش باس له‌وه كردن ك كيشه‌گه يه‌كلاوه ئه‌كه‌ن.
