جفتیارەیل نەینەوا رخیان چوود کشاوەرزییان بوودە ملهڕی زەرەدیگ
شەفەق نیوز/ شایەت محمد ئەبو سەیف ئمساڵ زۊەگەی وەجی بیلید، و ملهڕی کاڵینی هەکاتی پارەکین نەکەید، ئەوەیش چۊنکە پاڵپشتیکردن حکومەتی نییە، و هەژمار بووسان جۊر هەژمار بەرەگە نییە.
پارەکە، هەنای بەر سیفەگەی فرووشت، فرووشەگەی هەر چەنە ئەو خەرجە بۊ، و خەرجکردن زەۊ و تۊم و پەیین و سووتەمەنی ئاویاری قانجازەیل ئەبو سەیف باڵەو دا.
ئەبو سەیف ئەرا ئاژانس شەفەق نیوز ئۊشێد: خوازێد ئمساڵ زەۊەگەی بیلێدە جی، و مینەی کاریگ تر ئەرا خوەی بکەێد، تا ئەوەنە گیچەڵیان وەگەرد بەرەیل هاوردەکریاگ تەواو بوود، ک وەشیوەی گەورەیگ وەخراوی هاتە بان کشتوکاڵی و فرووشتن بەرهەم زەۊلیان.
دەربارەی پاڵپشتیکرد حکومەتی، ئۊشێد هەر نیە، نە ئەرا پەیین نەیش تۊم یا ئاویاری یا ئامێر. ئەبو سەیف ئۊشیدیش: فرە کەس جۊر خوەی شایەت لەی ساڵە زەۊەلیان بیلنە جی، ک توانای وەرزەیلیگ تر نەیرن ک شایەت هۊچ پۊلیگ لەلی وەدەسیان نێکەفێد.
عائیشە ئەحمەدیش ک خوەی و خیزانەگەی زەۊ بۊچگیگ کاڵێدە سەوزی و بەرە وەرزیەیل، ئۊشێد: خوەی شۊەگەی دی لەکار بیخودی شەکەت بۊن، و ئەوەگ کەفێدە دەسیان تەنیا ئەرا نانەزگە، بەش ئەوەیش نێکەێد، و باس ژیان سەختیان لەسای نەۊن پاڵپشتیکردن حکومەتی کرد.
عائیشە ئەرا ئاژانس شەفەق نیوز ئۊشێد: بەرە هاوردەکریایلە فرەجار کاریگەری لەبان فرووشتن بەرەیلیان دیرێد، ک قانجازیان گوما کەێد، و جاروباریش زەرەدیانیش دەێد.
وتیش: ئەگەر من و شۊەگەم و کەسەیل خیزانەگەم کار لە جفتیاری و پاکەوکردن و ئاویاری نەکەیمن، وەنە چشتیگ وەدەسمان نەکەفت، ک ئەوەگ لە کۆتایی وەرزەگە کەفێدە دەسمان ئەوە وەپیمان نێکەێد خەرج کریکاریگ بیەیمن.
رەزوان مەحمود ئەویش کشاوەرزیگ ترە خەڵک مووسڵ ئۊشێد: گرفت سەرەکییان هالە دوو کار، یەکەمەگە نەۊن پاڵپشتیکردن حکومەتی ئەرا جفتیارەیل، و دۊەمیان ئەوەسە ک پلانیگ ئاشکرا نییە ئەرا رەفتارکردن وەگەرد چشتەیل هاوردە، و هەمیش ئۊشێد؛ ئەگەر پلانسازی خاسیگ بوود نەڕسیمنە ئی رووژە. مەحمود لە قسەیلی ئەرا ئاژانس شەفەق نیوز هوشداری لەوە دەێد ک ئیسە کشتوکاڵی کەفێدە نوای.
و دەسنشان ئەوە کەێد ک هەزاران لە کشاوەرزەیل شایەت واز لەکار خوەیان بارن ئەگەر کاریگ تر ئەرا دراوردن تیکەنان خوەیان و خیزانەیلیان پەیا بکەن.
ئۊشیدیش؛ رووژ دۊای رووژ کشتوکاڵی مرێد، وئی کەرتە وەپای خوەی نێوسیەێد ئەگەر حکومەت چارەیگ گونجیاگ ئەرا رەفتارکردن وەگەرد هاوردە و پاڵپشتیکردن کشاوەرز وە تۊم و پەیین و ئەو چشتەیل پەیا نەکەێد.
هەمیش ئۊشێد: ئەگەر خوازینیگ راسی بۊاتاد، وەنە عراق گشت بەرهەمیگ ئەرا دەوڵەتەیل هاوسا هەناردە کرد، باوجی ئی رووژە ک کەفتیمنەسە ناوی هیلێد گشت چشتیگ وە پۊل بسینیمن، و ئیمە هایمنە وڵاتیگ دوو چەم ئاو رووشن هاناوی، وەلێ کەسیگ وەئەرزش ئەو نعمەتە نێزانێد، و چۊن وەکاری باریمن تا کەرت کشتوکاڵی بکەفێدە وەرانوەر کەرت نەفت.
فەرحان ئەحمەد، ئەویش جفتیاریگە خەڵک شەنگال، ئۊشێد؛ ئەو زیانە ک گشتی باسی کەێد خوەی راسییگە، و ئەرا نموونە، لە تاوسان گوزەشتە، زەۊیگ داشتم تەماتە لەناوی کاڵیم، و بەر گەورەیگ لەلی چنیم، باوجی نرخەیل بازاڕ وەگورەی تەما نەۊ.
فەرحان لە قسەیلی ئەرا ئاژانس شەفەق نیوز دیاری کەێد ک ئەگەر نرخەیل لە مانگەیل دۊایین لە وەرز چنین و فرووشتن گرانەو نەۊاتاد، وەنە مەینەتی ساڵیگ لەدەسمان چگ، و دیاری کرد ک ئەو پۊلەگ کەفتە دەسیان تەنیا ئەرا خەرجەگە بۊ، و گشت چشتیگ وە قەرز سینیمن، چ تۊم بوود یا پەیین و سوتەمەنییش، و بایەتە دۊای وەرزەگە قەرزەگە بیەیمن.
فەرحان ئمساڵ لە کاڵین دوودڵە، لەرخ دووارەبۊن نەهامتیەگەی پارەکە، ک هەزاران لە کشاوەرزەیلیش جۊر خوەین.
