جبوری، خه‌نجه‌ر وه ته‌قالا ئه‌ڕا به‌شبه‌شه‌وكردن عراق تومه‌تبار ئه‌كا
زیاتر ووتگه : ئیرنگه عراق وه‌شێوه‌ێ پراكتیك به‌ش به‌شه‌و كریاگه و به‌شێگى هاله ژێر كونتروڵ پێشمه‌رگه و به‌شێگترێ هاله ژێر ده‌سه‌ڵات داعش و به‌عزێ له عه‌شره‌ته سونیه‌گانیش ناوچه‌یل زلوعیه و عه‌له‌م كونترول كردنه و حه‌شد شه‌عبییش چه‌ن ناوچه‌ێگ هاده‌سێه‌و وه‌ێ جوره عراق به‌شه‌و كریاگه و ئیمنه‌یشه تازه ئه‌خوازیم یه‌كێ بخه‌یم.
مشعان جبوری وه‌ده‌ركردن به‌یاننامه‌ێگ له‌ێ باوه‌ته ووتگه : خه‌نجه‌ر یه‌كێگه له‌و كه‌سه‌یله ك داوای هه‌ریم سوننی ئه‌كا و كومه‌ك ئه‌و كه‌س و لایه‌نه‌یلیشه ئه‌كا ك كار ئه‌ڕا به‌ش به‌شه‌و كردن عراق ئه‌كه‌ن.
زیاتر ووتگه : ئمڕویش خه‌نجه‌ر ته‌قالاێ تازه‌ێگ ئه‌كا تا وه‌كومه‌ك ئه‌مریكا و چه‌ن وڵاتێگ خه‌لیجی عه‌ره‌به‌یل سوننه وه‌جیا له حكومه‌ت عراقی پڕ چه‌ك بكه‌ن ، ئه‌ڕا ئه‌وه‌گ جه‌نگ ناوخوه‌یی له ناونی خود سونیه‌یل و له ناونی سونیه‌یل و حكومه‌ت ناوه‌ند دروس بكا ، تا زه‌مینه ئه‌ڕا دخاڵه‌ت هیزیل عه‌ره‌بی خوه‌شه‌و بكا ك ئامانجه ئاشكراگه‌ێ پارێزگاری كردن له عه‌ره‌به‌یل سوننه‌س و نهێنیه‌گه‌ێ دروس كردن هه‌ریم فدرالیه ك له لایه‌ن ئسرائیل و هاوپه‌یمانه‌یلی پشتگیری ئه‌كریه‌ێ.
جبوری له دریژه‌ێ به‌یاننامه‌گه‌ێ ووتگه: من نگه‌ران ئه‌وه‌م ك كونفرانس پاریس ته‌قالاێ تازه‌ێگ بێ ئه‌ڕا پشتگیری كردن له پڕوژه‌گه‌ى كونگرس تایبه‌ت وه پڕچه‌ك كردن عه‌ره‌به‌یل سوننی وه دوێر له به‌غدا و به‌شه‌و كردن عراق ئه‌ڕا سێ وڵات كورد و سوننی و شیعه ، جور گامێگ ئه‌ڕا جیاوه كردن سوریه و حزبوللا و بڕین ڕێ زه‌مینی ئیران ئه‌ڕا ئه‌و دو وڵاته تا ناوچه‌گه له ڕوى ئاینی و مه‌زه‌بیه‌وه به‌شه‌و بكه‌ن و به‌هانه‌ێ دروس كردن ده‌وڵه‌ت یه‌هودی بێه‌نه ئسرائیل.
مشعان جبوری له به‌شێگتر به‌یاننامه‌گه‌ێ ووتگه : ئه‌ڕا ڕوڵه‌یل عراق ته‌ئكید ئه‌كه‌م ، ئیمه وه‌بێ له‌وه‌ر چه‌و گردن ته‌قالاگان خنجه‌ر و ئه‌فسه‌ره‌یل سوپای به‌عس و سه‌روك عه‌شره‌ته‌یل نیشته‌جاى ئوتیله‌یل ئوردون و كوردستان و ئمارات ته‌ئكید ئه‌كه‌یم ك مه‌ردم عه‌شره‌ت جبور و چه‌ندین عه‌شره‌تتر ناوچه‌گه ك ئمڕو دژ وه داعش جه‌نگ ئه‌كه‌ن ، پابه‌ندیم وه‌یه‌كیه‌تی خاك عراق و دروس كردن هه‌ر هه‌رێمێگ فدرالی ره‌ته‌و ئه‌كه‌یم.
ئه‌و په‌رله‌مانتار سوننه له كوتایی به‌یاننامه‌گه‌ێ ووتگه : ئه‌وان پشتگیری حكومه‌ت ناوه‌ند ئه‌كه‌ن و په‌یمان وه‌خودا و ملله‌ت ئه‌یه‌ن ك له وه‌راوه‌ر هه‌ر فتنه‌ێگ له ناونی عه‌ره‌به‌یل عراق ئه‌وسن و ئه‌وانه‌گ داواێ هه‌رێم فدرالی ئه‌كه‌ن له ناوچه‌گه ئه‌تاڕنن و هویچ هێزێگ ناتوێه‌نێ عراق به‌ش به‌شه‌و بكا.
