جیماگەیل داعش هیمان هەڕەشەی خەڵک ئەنبار دەن

شەفەق نیوز/ دویای دەور سێ ساڵ لە دەرکردن چەکدارەیل ریخریاگ داعش لە دویاترین شارەیل پارێزگای ئەنبار، بەڵکەم ژەهرەیل ریخریایەگە هیمان زەرد لە گیان خەڵک ئەنبار دەن، لە ری جیماگەیل ریخریایەگە، وەتایبەت لە مین و تەقەمەنیەگان ک چەکدارەیل داعش وەرجە شکستیان و واینیان لە وەردەم هێزە عراقیە هاوبەشەگان هیشتنەیانە جی.
چەن تەقەمەنییگ لە جیماگەگان
هەرچەن هێزە ئەمنیەگان سەرکەفتنە لە لاوردن بڕەیل گەورایگ لەو مینەیلە، بەڵکم وەرپرسیگ لە وەزارت ناوخۆ ئەرا ئاژانس شەفەق نیوز دووپات کەێد ک مینەیلیگ لە جیماگەیل داعش هیمان هانە چاڵ وهەڕەشەی خەڵکەگە دەن، وەتایبەت خەڵک شارەیل بەرزایی فوڕات جوور هیت و بەغدادی و عانە و راوە و ئالوس وجبە وقائیم و روتبە و حەدیسە و نخێب و ناوچەیلیگ سنووری تر وەگەرد ئوردن و سوریا وسعودیە.
وەگورەی وەرپرسەگە، لە نزیکبوین وەرز واران هەڕەشەی ماڵین و دەرکردن بەشیک لەو مینەیلە دەێد، جوور ئەوەگ لە زمسان گوزەیشتە بوی، بەڵکم لە خود وەختەگە مەترسیەگە لەناو شارەگان گەوراترە ، وەتایبەت لە گەڕەکە هەڕەمەکیەگان و لە ئاوای وناوچە کشتوکاڵیەگان، ک ئەنبار لە سەرەتای ئی ساڵە کوشتن ١٨ مەدەنی وە زەخمداربوین ٥٠ کەس لەلای کەمەو وە تەقەمەنیەگان ریخریاگ داعش تۆمارکرد، لەناویان سێ مناڵ لە باشوور فەلوجە کوشیان.
ناوچەیل گوڕمە و فەلوجە و قائیم و روتبە گەوراترین شارەیل ئەنبار خوەیان فرەترین مەترسیدارن لە ژمارەی مینەگان چوونکە ئەو ناوچەیلە لەلای ریخریاگ داعش سەنگەر یەکەم بوین ئەرا ریگری لە هێزە عراقیەگان وە تەقەمەنی و مین.
شیوەیل مزیڕیگ
تێبینی کریاگە ک مینەگان داعش وەشیوەیل مزیڕیگ دانریانە، وەگورەی عەلی دلێمی چالاکوان لە لاوردن مینەگان، ک وەگەرد رێکخراویگ خۆجێیی کار کەێد، لە وەختیگ گوزەیشتە هاوکاری لەی باوەتە لە نەتەوە یەکگرتووەکان وەرگردگە.
دلێمی ئەرا ئاژانس شەفەق نیوز ئووشێد: ریخریایەگە مینەگان لە ناوچەو و شوونەیلیگ دانا ک وە هویر کەسیک نێەکەفن، و لەیەوە زانیمن ک خوەی خوازێد زیاترین ژمارە لە مەدەنیەگان بکوشێد نەگ لە هێزە ئەمنیەگان، و هەڵمەتیگ هووشیاری وەرینیگ سەرکەفت لە هووشیارکردن خەڵکەگە لە مەترسی چشتە نەناسریایەگان، بەڵکم هەر رووداوەگان هەسەیان و وەداخەو فرەی قوربانیەگانیان لە مناڵەگانن و دوێەتیگ لە ناوچەی حسێبە وەرجە چەن هەفتەیگ وە یەکیگ لەو مینەیلە پای بڕیا.
دەسەڵاتە عراقیەگان وەرجە ماوەیگ هاوکاریەیل ناودەوڵەتی لە نەتەوە یەکگرتووەکان و هەمیش واشینتۆن ئەرا نواگردن باوەت مینەگان وجیماگەیل ریخریاگ داعش کەفتە دەسیان، بەڵکم فراوانی کرفتەگە ئەرا چەن پارێزگایگ، وفرەیی جیماگەیل ریخریایەگە لە مین و پێکهاتەیل مەترسیدار هیلێد ئەرک راگەیانن لە پاکەوکردن شارە رزگار کریایەگان لەی وەخته بوودە کار دویریگ.
لە ساڵ ٢٠١٨ مایک بومبیۆ وەزیر دەرەوەی ئەمریکا راگەیان پێشکەشکردن ١٦٠ مەلیۆن دۆلار ئەرا پشتکیری تەقەلایل عراق لە لاوردن مینەگان وجیماگەیل داعش.
ماڵیگ چەوسیاگ
وەرەو باشوور لە شار فەلوجە، شاریگە وەناو نعێمیە، هیمان گەوراترین ماڵ سیاپووش هاناوی، ک لەماوەی ئی ساڵە، مینەگان گیان دوو ژن و سێ مناڵ و پیاو پیریگ سەنن، و گشتیان وە تەقین مینەیلیگ مردن ک داعش لە ناوچەیلیگ کشتوکاڵی و ریەیل خەڕگین هیشیەسە جی.
حکومەت خۆجێیی فەلوجە کار ئەرا چارەسەری ئەوە کەێد، و سەرکەفتنەیل ئاشکرایگ وەدەس هاورد، بەڵکم دیارە سەختیەگە لە توانایل ناوخۆیی شارەکە گەوراترە، و دەسوەردان حکومەت فیدڕاڵی خوازێد.
لە وتاریگ ئەرا ئاژانس شەفەق نیوز، موستەفا عرسان جیگر پارێزگار ئەنبار ئەرا باوەتەیل ئیداری دووپاتکرد ک کارەیل لاوردن مینەگان لە وەخت رزگارکردن پارێزگاگە تا ئیسە هیمان وەردەوامن، و کەم توانایی تەکنیکی و دارایی کارەگە خەێدە دویا، و لە خود وەختەگە دووپاتکرد ک چەن ریکارەیلیگ ئەرا مقەیەتی دانیشتوەیل لەی جیماگەیلە بریانە، لەلیان؛ داناین تابلۆەیل هووشیاریکردن و بڵاوکردن
کەسەیلیگ ئەمنی ئەرا نواگردن هاووڵاتیبەگان لە نزیکەوبوینیان لەو شوونەیلە.
خوەشییگ نا تەواو
داڵگ ئەحمەد جومەیلی،ک وەرجە مانگیگ کوڕەگەی لە دەس داگە، ئووشێد: نەبایەد گلیە لە کوشتن کوڕەگەی لە کەسیگ بکریەێد لە داعش نەباشەد، و ئەرا ئاژانس شەفەق نیوز ئووشێد ، خوەشی کردیمن وە هاتنەوەمان ئەرا ماڵەیل خوەمان، و ئیمە هیچ زەرەدیگ لە تیرۆر داعش و لە قۆناغ ئاوارەیی نەڕەسیە پیمان، چوونکە میوان هەرێم بویمن، بەڵکم دیارە ک مردن لە دویای رەشەباگە چەوڕیمان کرد.
داڵگ ئەحمەد داوای هەڵمەتەیلیگ وە وەشکین ناوچەگە کەێد و دووپاتکردن لە هەسی مینەیلیگ تر تا داڵگیگ تر وە یەکیگ لە مناڵەیلی نەچەوسیەێد.