یەک بازی و هەزار زاڕوو.. خەڵک پارێزگایگ عراقی لە قەورسان جەژن کەن
شەفەق نیوز/ پارێزگای دیالە زیان لە کەمی شوینەیل گەشتوگوزاری نموونەیی وەخوەی دوینێد، ک هیلێد مەردمەگەی وەخت جەژن و خوەشییان لە مەزارەیل ئاینی وقەورسان بوەنە سەر.
چالاکوان مەدەنی موراد عەزاوی ئەرا ئاژانس شەفەق نیوز ئویشێد: جیماگەیل رەوشەیل ئاسایش و زووربازی سیاسەت تایفەگەرەیل پەک پڕۆژەیل ئاوەدانی خستن وه تایبەت پڕۆژەیل گەشتوگوزاری، هەر لە بەعقوبە دەسوەپی کەێد تا رەسێدە گشت یەکەیل ئیداری، بیجگە خانەقین ک سرووشت و رەوشەیل تایبەت دیرێد.
و دووپات کرد ک زیاتر لە ٧٠% لە دانیشتگەیل دیالە جەژن و خوەشییان لە مەزارەیل ئاینی وقەورسانەیل گوزەران کەن، ودیاری کرد ک بەشیگ لەوانەگ پویل دیرن روی وەرەو هەرێم کوردستان یا دەوڵەتەیل هاوسا کەن، چوینکە سەیرانگایلیگ نموونەیی نییە، و چینە نەدارەگەیش لەناو مەزار وقەورسانەیل مینن، ک ئەوانیش ئەرا خوەیان دەسکەنە نزا و لە خودا لاڵکیەن تا بەشکی ژیانیگ خاستر بکەفێدە دەسیان.
لەلای خوەییش موقاول ماهر سەعدی ک کار لەبان دروسکردن سەیرانگا ئاسانەیل کەێد، دیاری کەێد ک فرەی سەیرانگایل دیالە ئاسان و بویچگە وەچەو ئەو پارێزگایلتر، وتیش ئەوە چوینکە لایەنەیلیگ سیاسی ک دەسیان چوود لەبان پڕۆژەیل گەشتوگوزاری زاڵن، و تەنیا کارەگە کەفتیەسە بان پڕۆژە وبازیەیلیگ تا ئەوەنە پویل فرەیگ لەلیان بچوودە گیرفانیان.
سەعدی ئەرا ئاژانس شەفەق نیوز وت: پەیمانەی سەیرانگایل گەشتوگوزاری لە دیالە بویەسە یەک بازی ئەرا هەر ١٠٠ مناڵ، وەگورەی ئامارەیلیگ نیمچە فەرمی لەلایەن چالاکوانەیل وریكخریایەیل پەیوەندیدار وە ماف مرۆڤ، وتیش: فرەی یەکەیل ئیداری شوین گەشتوگوزاری خاسیگ لەناویان نییە، بیجگە بەعقوبە ک دوو سەیرانگا لەناوبەین دوو پیەڵەگە و یانەی ئەسپ سواری لەناوی هەس، وئەوانەیش کار ئاوەدانکردن و گەشەپیدان خوازن وەگەرد وەردەوامی لە زیایبوین هەژمار دانیشتگەیل.
ئەحمەد ئیحسان (٣٨ ساڵان) ئەویش کار دەسفرووشی لەناو قەورسان شەریف کەێد، دووپات کرد ک قەورسانەگە لە جەژن رەمەزان وقوربان هاتن بڕەیل فرەیگ لە مەردم وەخوەی دوینێد، ئەوەیش دویای ئەو رویداوەیل تیرۆریە ک قوربانیەیل فرەیگ هیشتنە جی.
ئیحسان لە قسەیلی ئەرا ئاژانس شەفەق نیوز وت: خیزانەیل بەعقوبە وچەن ناوچەیگ لە دیالە، لە یەکەم رووژەیل جەژن، یەکەم جار تیەنە سەردان مردگەیلیان لە قەورسان، ئیجا روی وەرەو شونەیل گەشتوگوزاری کەن هەرچەن کەمن، و مەزارەیل ئاینی مەردم فرەیگ ئەرایان چوود.
لەلای خوەییش، ئەحمەد ئەرکان روبەیعی وەرپرس راگەیانن ئەمینداریەتی تایبەت وە مەزارەیل ئاینی لە دیالە وت: سەردان مەردم دیالە ئەرا مەزارەیل لە جەژن و خوەشییان، کاریگ دڵخوەشی ودڵتەنگیە لە خود وەختەگە.
روبەیعی ئەرا ئاژانس شەفەق نیوز وت: کارە دڵخوەشکەرەگە ئەوەسە ک خودا پەرەسی و دوعا ونماز خوەنین لە شوین و مەزارەیل ئاینی بوود، و دڵتەنگکەرەگە ئەوەسە ک لە جەژن و خوەشیەیلە شوین وسەیرانگایل کەمە، هەرچەن دیالە خاوەن شوین گرنگیگە لە عراق، ک خوەی جویر عراقیگ بویچگە و هەمەڕەنگی لە دانیشتگەیل دیرێد وهەمیش خاوەن کەلەپوور میژووی وشارستانی کۆنیگە.
روبەیعی باس پلان مەزارەیل ئاینی لەی جەژن قوربانە کرد، ک دەوام کادرەیلی لە ٨ شه‌وه‌كی ئەرا نزیکەی ١٢ی شەو درویژەو کریەێد، وەهەماهەنگی وەگەرد بنکە ودەزگایل ئەمنی، ودیاری کرد ک جویلەی خیزانەیل و گەردین لە مەزارەیل ئاینی لە ساعەت هەیشت ونیم تەواو بوود، بیجگە مەزارەیل بەعقوبە ک تا نیمەی شەو مەردم ئەرایان تیەن.
دیالە لە وەخت رمیان رژیم وەرین تا ئیسە، زیان لە بەدی کەرت گەشتوگوزاری و نەمان سەیرانگایل وە بەراورد بەغداد و هەرێم کوردستان وئەو پارێزگایل وەخوەی دوینێد، لەوەر ئەو زوورکاریە ک زاڵە، وگەندەڵی ورەوشەیل ئاسایش ک پەک پڕۆژەیلی خستن
