ئایا پویچەڵکردن پولیس ئەخلاق ناڕەزایەتیەیل ئیران وسنێد؟

شەفەق نیوز/ رووژنامەی «ووڵ ستریت جورناڵ» ئەمریکی، راپۆرتیگ لەباوەت سووکەوکردن بەشیگ لە پاوەنەیل لەبان ژنەیل وەلایەن دەسەڵاتەیل ئیران بڵاو کرد، ک وەگەرد بەرزەوبوین خوەینشاندان و ناڕەزایی ئەرا یانزهەمین هەفتە لەناو وڵاتەگە تیەێد.

راپۆرتەگە باس تەگبیر دەسەڵاتەیل ئیران وە سووکەوکردن قەیەغیەلی لەبان رەفتار ژنەیل کرد، ک وەگەرد ئەوەیش ناڕەزایل ئیران بانگەواز ئەرا خوەینشاندان خەسیگ لەناو تەهران پایتەخت کەن، ئەوەیش وەگەرد بایکۆتکردن گشتی لەلایەن دوکانەیل بازرگانی و کۆمپانیایل.

رووژنامەگە لە زوان وەرپرسەیلیگ ئیرانی وت: تەگبیر دیرن دویاترین دەسکاری وە پلان چاکسازی رزگارکردن ئەو یاسایلە تەواو بکەن ک پەیوەندی وە پڕتاڵ ژن دیرن.

رووژنامەگە وتیش: مەزەنەیگ نییە ک سووکەوکردن و ئاڵشتکردن بڕیار حکومەت بیلێد ئەو ناڕەزایلە ک مکیس ئەرا خوەینشاندان خەسیگ لە تەهران ئەرا سوو چوارشەممە کەن، ئارام و رازی بوون.

رووژنامەگە دەسنشان کرد ک وەگەرد وەردەوامی خوەینشاندان، دەسەڵاتدارەیل تونەڕەو ئیران دەسکردنە تەقەلای لاوردن پشتگیری لە ناڕەزایل، ک گامەیلیان وە پویچەڵکردن پولیس ئەخلاق دەسوەپی کرد، ک ئەو پولیس ئەخلاقە ژینا ئەمینی، ئەو دویەت کوردە وە سنگ لەچگ سەری دەسگیر کرد، و لە ژیر ئەشکەنجە کوشتەی.

رووژنامەگە، لە زوان خانمیگ لە ناڕەزایل ئیران وت: راگەیانن لە پویچەڵکردن پولیس ئەخلاق ،خەوەریگ چەواشەکاری بوی، تا مەردمەگە دویر لەو بانگەوازە بخەێد ک ئەرا خوەینشاندان خەسیگ کریەێد، و تا گومان و تەفرتوینی بکەڤێدە ناویان، ئەو خانمە ئەرا رووژنامەگە وتیش: یە لە خوسەی مەردمەگە ئەرا ئی رژیمە کەمەو نیەکەێد، و ناڕەزایی هەر وەردەوامە.

رووژنامەگە دیاری کرد ک خوەینشاندەرەیل ئەوەسا لەی هەفتە کەفنە ژیر تاقیکردن، لە پلان بەشداریکردن بڕەیل گەورەیگ لە مەردم لەناو خوەینشاندان تەهران، ک بانگوازەیل جارانی تەنیا بڕەیل کەمیگ هاوردنە بان جادە، هەرچەن پشتگیری جەماوەری فراوانیگ ئەرا خوەینشاندان دژوە رژیمەگە هەس.

رووژنامەگە وتیش: خاوەن دوکانەیل و رانندەیل بارهەڵگرەیل لە ئیران، دویەکە لەناو نزیکەی 40 شار و ناوچە بایکۆت کردن، ئەوەیش لە پشت بانگەوازیگ ئەرا بایکۆتکردن کار تا ماوەی سێ رووژ لە ئاست وڵاتەگە، ک حکومەت رازی نەوی دووپات لەبان پویچەڵکردن پولیس ئەخلاق بکەێد.

رووژنامەگە وتیش: لە جیای ئەوە، رووژنامەیل ئیرانی باس دەوریەیل زیاتریگ لە پولیس ئەخلاق کردن، تایبەت لە شارەیل ئاینی، ک ناچار ژنەیل کەێد حیجاب بپووشن.

رووژنامەگە لە راپۆرتەگەی وتیش: جیوەجیکردن بایکۆت وەلایەن خاوەن دوکانەیل رازی خوەینشاندەرەیل کەێد، چوینکە دیار دا ک بیزاری لەدەس رژیمەگە هیمان لەناو گەورە شارەیل باوە جویر: تەهران، کەرەج، ئەسفەھان ،مەشهەد، تەبریز، شیراز، وتیش: 19 شار  لە خوەرئاوای ئیران کەفتنە ناو بایکۆتکردن، ک فرەیان کوردە.

هەرلیوا، رووژنامە ئەمریکیەگە لە زوان هادی غیمی، وەڕیەوبەر جیوەجیکەر ناوەند ماف مرۆڤ لە ئیران، ک ریخریاییگە سەروەخوەی، بارەگای ها نیویۆرک، وت: ئیرانیەیل ئیسە کاریگ وە پولیس ئەخلاق نەیرن، ک هاتێ جویلەیل رژیم ئیران گاڵ خوەینشاندەرەیل زیاتر بەێد.

غیمی وتیش: خوەینشاندەرەیل تەنیا لە دەس پولیس ئەخلاق داد نیەکەن، یا لە دەس یاسای حیجاب ، ک یە نییە هیشتیە سەدان کەس هیمان گیان خوەیان بخەنە وەر گولە، کارەگە رەسیە گومان وە گشت رژیم سیاسی.

وتیش: هاتێ پویچەڵکردن پولیس ئەخلاق دویای کوشیان ژینا ئەمینی وە کوتپڕ جیوازییگ بیاشتاد، باوجی لەی مەوقە، ئەو کارە تەنیا تەقەلایگ بیخودە وەلایەن رژیمەگە ئەرا کەمردن لە داوایل فراوان ناڕەزایل، وە لەناوبردن دەسەڵات ستەمکار ئاخونەیل.