ئایا ئەنبار بوودە قیبلەی گەشتیارەیل؟
شەفەق نیوز/ ناحیەی بەغدادی سەروە قەزای هیت لە پارێزگای ئەنبار، یەکیگە لە نائارامترین ناوچەیل پارێزگاگە، ئەوەیش چۊنکە ناوچەیلیگ بیاوانی فراوانیگ دیرێد، ک دەسمیەتی ئەندامەیل ریخریاگ داعش ئەرا شاردنەوە و جۊلەکردن لەناوی دەێد.
ئی ناحیە یەکیگ لە گەورەترین و گرنگترین کامپەیل سەربازی عراق هاناوی، ک خوەی کامپ عەین ئەسەد ئاسمانیە، ک لەناوی هیزەیل هاوپەیمانی ناودەوڵەتی وە سەرپەرشتی واشینتۆن جیگر بۊنە، ک فرەجار کەفتە وەر پەلامار میلیشیایل سەروە ئیران.
لەبان ئەوەیش، وەگورەی قسەی شەرحەبیل عوبەیدی وەڕیەوبەر ناحیەگە ، حکومەت ئەنبار دیرێد پڕۆژەیلیگ گەشتوگوزاری لە ناحیەی بەغدادی جیوەجی کەێد، و دەسکردە دروسکردن تاڤگەیل دەسکرت، هیشت سەدان گەشتیار لە شارەیل جیاجیای عراق وەخوەی بکیشێد.
عوبەیدی لە قسەیلی ئەرا ئاژانس شەفەق نیوز وت: دۊای رزگارکردن ئەنبار لەدەس داعش، ک بۊە هووکار ویرانکردن نیمچە گشتگیریگ ئەرا بینا ژیرینەیل و شۊنەیل گەشتوگوزاری لە پارێزگاگە، و لەبان ئەو هەڵمەتەیل ئاوەدانیە ک یە چەن ساڵیگە لە شارەیلی کریەێد، باوجی پڕۆژەیل خاسەوکردن شۊنەیل گەشتوگوزاری کەمە، و تەنیا دەریاچەی حەبانیە شۊنیگ ئەرا خوەشگوزەرانی خیزانەیل بۊ.
وەخاتر پەیاکردن شۊنیگ ئەر خوەشگوزەرانی خیزانەیل ناوچەی بەغدادی، حکومەت ئەنبار دەسکردە پڕۆژەی ئاسانیگ لە دروسکردن تاڤگەی دەسکرت، باوجی وەگەرد رووژگارەگە بۊە شۊنیگ ئەر سەدان له خیزانەیل ئەنبار، ک هیشت وەردەوامی ئەرا گەشەکردن شۊنەگە بوود، تا بکریەێدە سەیرانگای گەورەیگ.
عوبەیدی وتیش: ناوچەگە گەشە کرد و بۊە شۊنیگ ئەرا سەدان لە خیزانەیل ناو ودەیشت پارێزگاگە، باوجی هیمان ناوچەگە کارەیل خاسەوکردن خوازێد، و حکومەت ئەنبار رینما وەکارکردن لەبان وەشکینیگ سەرەتایی ئەرا ناوچەگە دا، ئەرا دروسکردن تاڤگەیلیگ دەسکرت تر، وەگەرد دروسکردن کۆرنیشیگ و دوکانەیلیگ بازرگانی و چیشتەخانەیلیگ جەماوەری لە ناوچەگە.
و دووپات کرد ک دەسەگە دەسکردە وەشکین، و وەماوەی مانگەیل ئایندە، ئەوەسا ناوچەگە ئاڵشتبۊنیگ وەخوەی دۊنێد، هەرچەن ئەو پۊلە ک ئەرا پڕۆژەگە دانریاگە کەمە، ک شایەت وەگورەی ئاست تەما نەوود ئەگەر پۊلەگە زیای نەکەن، وتیش: ئەگەر بخوازیمن گەشە وە ناوچەیل گەشتوگوزاری بکەیمن، بایەتە کار لەبان خود ئەو گامەیلە بکەیمن ک حکومەت هەرێم کوردستان وەبانی ری کەێد، ک هیشت هەرێم کوردستان بوودە شۊنیگ ئەرا رۊکردن گەشتیارەیل لە گشت دەوڵەتەیل جەهان.
لەلای خوەییش، موئەیەد مشوح وەڕیەوبەر سەیرانگای حەبانیە وت: دۊای رزگارکردن پارێزگاگە لە دەس داعش، کار لەبان گەشەکردن کەرت گەشتوگوزاری لە پارێزگاگە کریا، چۊنکە لە گرنگترین کەرتەیلە ک گەشە وە ئابووری لە گشت دەوڵەتەیل جەهان کەێد.
مشوح ئەر ئاژانس شەفەق نیوز وت: دۊای تەواوکردن بەسیان کامپ ئاواره‌یی حەبانیە، و گلەودانیان ئەرا ناوچەیلیان لە ساڵ ٢٠١٩، دەسکریا هەڵەمت ئاوەدانکردن شارەگە، ک شالێە و شۊنە سەوزەیلە و یاریگایل وەرزشی و یانەیل و هۆڵەیل ئاهەنگ گردە خوەی، ک هیشتەی بوودە شۊنیگ ئەرا رۊکردن سەدان گەشتیار لە گشت پارێزگایل وڵاتەگە، تایبەت لە وەرز تاوسان.
وتیش: حکومەت ئەنبار کار لەبان جیوەجیکردن چەن پڕۆژەیگ کرد، ئەرا گەشەکردن شۊنەیل گەشتوگوزاری، ئەوەیش وە دەسمیەتی وەگەرد وەڕێەوبەرایەتیەیل شارەوانی قەزایل پارێزگاگە، و وەکارهاوردن رەدبۊن چەم فورات وەناوی، تایبەت لە کنارەیل سەرەکی شارەگە، ئەرا جیوەجیکردن چەن پڕۆژەیگ لەلاین ناوچەیل کورنیش فەلوجە و رەمادی و هیت و حەدیسە، ک هووکار لە گورجکردن ئی شارەیلە بۊ.
مشوح هەمیش باس لەیەکڕەسینەوە وەرد وەزارەت روشنهۊری کرد ئەرا گلەوداین دەریاچەی سەرسار ئەرا سەر ئەنبار، ک یەکیگ لە گرنگترین ناوچەیل گەشتوگوزاری بۊ لە پارێزگاگە، و دیاری کرد ک ئەو جیگربۊن سیاسی و ئەمنیە ک لە ئەنبار هەس، دەسمیەتی لە کیشانن هەزاران گەشتیار لەگشت پارێزگاییلە دا.
