ئایا ساڵەیل سەخت لە هەرێم کوردستان خەو "هۆنگ کۆنگ خوەرهەڵات ناوڕاس" لە هۊر برد؟
شەفەق نیوز/ هەرێم کوردستان لەناو ساڵەیل ٢٠٠٤ و ٢٠١٤ هەلقوڵانیگ چینەیی وەخوەی دی، شیوەی ئاوەدانی ئاڵشت کرد، وهیشتەی بوودە شۊن نووڕین جەهان پۊل و کاروبار ئەرا ماوەیگ، تا گەشبینی بەشیگ لە چەودیرەیل رەسیە باسکردن ئەوە وە "موعجیزەی ئابووری" ک مەزەنە کریا هەرێم کوردستان بوودە "هۆنگ کۆنگ خوەرهەڵات ناوڕاس".
لەبان ئی نووڕین گەشبینە، وەلێ ئەو قەیران داراییە ک لەماوەی دوو ساڵ گوزەشتە هەرێم کوردستان گردە وەر، تا رەسیە پەککەفتن بەشەوکردن مووچەی فەرمانبەرەیل، پرسیارەیل فرەیگ هاوردە بان.
داهات نەفتی دەمار ژیانە
پسپۆڕ ئابووری هاوڕێ فاخر لە قسەیلی ئەرا ئاژانس شەفەق نیوز ئۊشێد: هیمان هەرێم کوردستان هەکاتی عراق وەگشتی، لە داهاتەیلی پشت وە نەفت بەساگە، و مەزەنە کریەێد ک رووژانە بڕەسێدە زیاتر لە ٥٠٠ هەزار بەرمیل لەڕی بەندەر جیهان تورکیا.
هەرێم کوردستان بازاڕیگ خەرجکردنە
لەباوەت ئەو هەلقوڵان ئابووریە لە هەرێم، فاخر ئۊشێد " ئەوە وە بەرهەمهاوردن دەیان ملیار دۆلار کریا، ک زووری هاوردە بان موڵك و ماڵ و بەشیگ لە کەرتەیل بینای ژیرینە، لە وەختیگ کەرت بەرهەمه‌یل کشتوکاڵی و پیشەسازی و پیشەیی گرنگییگ وەخوەی نەی.
فاخر هەمیش ئۊشێد: وەیجۊرە هەرێم کوردستان بۊە بازاڕیگ خەرجکردن ئەرا بەرهەمەیل دەوڵەتەیلیگ جۊر تورکیا و ئیران و چین، و ئی دەوڵەتەیلە گرنگترین سێ هاوبەشن ئەرا هەرێم کوردستان، ک بەش هەریەک لەلیان لەناو بازاڕەگەی لەلای کەمەو رەسێدە ٣٠% ، و هەرێم کوردستان زیاتر لە ٩٥% لە دەیشت هاوردە کەێد.
گرفتەیل دریژماوە له ناونی هه‌ولێرو بەغداد
دۊای ماوەی ئەو ئەوزەڵکردنە ک وەماوەی دە ساڵ هەرێم کوردستان وەپی رەد بۊ، گەردەلۊلیگ پڕ لە قەیرانەیل گەپ داگە له هەرێم، لەلیان داوەزین نرخ نەفت و جەنگ داعش و قەیران وەرد بەغداد.
ئەحمەد عەلی شارەزای باوەتیل پەیوەندیەیل گشتی، لە قسەیلی ئەرا ئاژانس شەفەق نیوز ئۊشێد: ئەوەگ هەرێم کوردستان وەپیا رەد بۊ لە شکستەیل ئابووری، هووکار سەرەکیی ئەو ناکووکیەیل وەردەوامە وەگەرد بەغداد ، لەبان باوەتەیلیگ پەیوەندی وە هەناردەی نەفت و داهاتەیل ناوخوەیی، ئەو کارەیلە هیشتن رەوش ئابووری لە هەرێم وەرەو دۊا بچوود، ک داوەزینیگ لە بەرهەمهاوردن ناوخوەیی و وسیان سەدان پڕۆژە و لاتبۊن کۆمپانیایل دروس کرد.
وسیان ٦٠٠٠ پڕۆژە لە سلێمانی
لەساڵ 2017 ئەنجومەن پارێزگای سلێمانی، وسیان نزیکەی شەش هەزار پڕۆژەی خزمەتگوزاری ستڕاتیژی راگەیان، هەمیش سەدان لە په‌یمانكاره‌یل لاتیی خوەیان لەماوەی سێ ساڵ دۊایین راگەیانن.
خەدیجە عەبدولجەبار خانمە سەرۆک دەسەی پڕۆژەیل لە ئەنجومەن پارێزگای سلێمانی وت: نزیکەی ٦٠٠٠ پڕۆژەی خزمەتگوزاری ستراتیژی لەکار وسیان، لەوەر ئەو قەیران داراییە ک یە سێ ساڵە هەرێم کوردستان وەپی رەد بوود.
٩٠٠ کۆمپانیا لەکار وسیان
یەکێتی پیشەسازەیل لە هەرێم کوردستان، ئەویش لاتبۊن ٨٠٠ تا ٩٠٠ کۆمپانیا لە بنچینەی ١٢٨٠ کۆمپانیا و وسیان نزیکەی هەزار پڕۆژە راگەیان.
محمد عەتا جیگر یەکێتی پیشەسازەیل لە سلێمانی ئەرا ئاژانس شەفەق نیوز وت: کار پیشەسازەیل ها رەوش فرە بەدیگ، ئەوسا وەرجە هاتن داعش خاس بۊ، باوجی دۊای ئەوە کار گشت پیشەسازەیل وسیا، و هەنای دووارە چالاکییان هاوردنەو، ڤایرۆس کۆرۆنا هاتە دەر تا لەنووەو کاریان بوسیەێد.
وتیش: زیایبۊن باجەیل لەبان کۆمپانیایل هەمیش بۊە هووکاریگ ئەرا ئەوەگ لەکار بوسیەن.
